Bilangan Uram 31
31
Midian nang aryi Israel nang asi muna kibdongoamnyi ati tamuboka ibinmai uram deyok
31:1-24
1Ura, Er Iya Erebdobnyi biryi Musa bisi ato ebmou, 2“Israel nang aryi Midian nang asi ibinung. Ba, Midian nang aryi sunsi muna kibdongobnyi dinyi ara sunbabyi nirya obkabkwamang. Sirya ukubingnyi ura, Musa kan dibkwandim” ebmou. 3Ura, Musa biryi Israel nang asi ato ebmou, “Sun yin dakmunci, Midian nang mar bobdarur. Ba, sun Midian nang kun dinyi ara Er Iya Erebdobnyi biryi sun kubyi to kuboka mar boum tamubkwamar. 4Ati, sun Israel yin doun nang yala yuk-yuk 1.000 baryi anabdarur,” ebmou. 5Ura, Israel yin doun nang yala yuk-yuk 1.000 baryi wibmai. A yin doun nang nirya antaniboka nungna ara 12.000 baryi wibmai. 6Ura, Musa biryi, “Israel nang asi imam Eleazar mi Pinehas ab bindarur,” ebmou. Ba, “Pinehas bira Kemah Suci ai dam deirin beterdongona mem bona-bona ton ab, buu ena si trompet ab boboka buu ebkwande ati bindarur,” ebmou. 7Ura, Er Iya Erebdobnyi biryi Musa dam ebdeibmou to kuboka Israel nang aryi Midian nang mar bobmaici, Midian sal nang nirya obmai. 8Ani, Midian weik sien nang amubaryi ababyi obmai. A nang si ara Ewi ab, Rekem ab, Zur ab, Hur ab Reba ab obmai. Tonda, Beor mi Bileam bibabyi ninyi on ya aryi obmai. 9Ba, sun nerabwe ab, mabwe nermabwe ab ara Israel nang aryi tabwe deboka bobde binmai. Ani, Midian nang sun winin bisam ab, bona-bona ab nirya ababyi arabdobmai. 10Ba, Midian nang weik atei ab, sun keis ol ai doboka kun atei ab ara nirya uk dabmai. 11-12Ura, Midian nerabwe ab, winin bisam ab, bona-bona ab arabmai dinyi ara Musa dam ab, imam Eleazar dam ab, Israel ninyi nirya ab bobinmai. Ba, Israel nang a talak ara Moab mutuk lu bok, weik atei Yerikho atei me Yordan me yibinamwe dam bindoka kuramnyi.
13Ura, Musa ab, imam Eleazar ab, Israel yala nang weik sien nang ab sun kuramnyi atei aryi anaboka yin doun nang bisik dam dirbinmai. 14Ura, Israel nang yin doun nang sien nang ab, 1.000 baryi yin doun nang sien nang ab, 100 baryi yin doun nang sien nang ab asi, yin doun nang ab mar ordarbinmai ani, dirbinmai. Ura, Musa yu wekmouci, yin doun nang sien nang asi kerebmou. 15Ura, Musa biryi ato ebmou, “Unatoa ati Midian nerabwe nirya kum obmarum do? 16Sun kanyi teneibdendarur. Ara, Peor mutuk dam aryi Bileam biryi, Midian talyi yortamni nerabwe asi, ‘Israel nang dubdendarur,’ eamwe deyok aryi Midian talyi yortamni nerabwe aryi Israel nang dubdenmai. Ara, Israel nang sun molondarurnyi Er Iya Erebdobnyi bisi deiblobdarur. Deiblobmunci, ‘Nun kwemdeina asi molobkwayeb,’ ebsei. Ato ebsei deyok aryi Er Iya Erebdobnyi biryi ninyi orminingna youn karebsou. 17A deyok aryi Midian sal mabwe ab, nerabwe sal ab tonkwa kuramingnyi nerabwe ab nirya obdarur. 18Bok, sal ab tonkwa kuna kum nerabwe ara ona mem, eda ur sun dobdobdarur. 19Ba, sunci ninyi obmarum nang ab, din nang tukwi talebmarum nang ab ara atei yangana mem! Eda, uki tabaryi baitam yandoka kubkwandarur. Ani, uki winiryi tum ab, uki tabaryi tum ab ara sun ab, sun nerabwe ab sun nong me kekdongoboka sun malyi kun dinyi nirya kilibdankwandarur. 20Ani, sun ongon aling ab, bisam kala aryi kikniamingnyi dinyi ab, bisam kambing otong aryi kikniamingnyi dinyi ab, co aryi kikniamingnyi dinyi ab ara me ilikoka malyi kun dinyi kilibkwandarur,” ebmou.
21Ura, Imam Eleazar biryi Israel yin doun nang asi ato ebmou, “A yan memen uram ara Er Iya Erebdobnyi biryi Musa dam ebdeibwe. 22-23Ara, ato, ‘Uk yina kum dinyi, emas ab, perak ab, tembaga ab, mirin timah ab, kurun timah ab aryi kikniamingnyi dinyi nirya ara uk dabmunyi ura, betebdongobmamunyi dinyi kilibkwandarur. Ani, sirya uk dabmunyi ura, me touboka kilibkwandarur. Ba, uk yibmanto dinyi ara me aryi ilikwandarur. 24Ba, sun ongon aling ara uki tabaryi tum aryi ilikoka me kekdobkwandarur. Ato kubmunyi ba, sun malyi kun dinyi sirya kilibsici ura, atei wengyankwandarur,’ ebdeibwe,” ebmou.
Midian atei dalubmai bona-bona nukmai uram deyok
31:25-54
25Ura, Er Iya Erebdobnyi biryi Musa bisi ato ebmou. 26“Musa kan ab, imam Eleazar ab, Israel yala nang sien nang ab aryi Midian atei aryi daluboka boyanmang bona ab, nerabwe ab, bisam yabwe ab nukdarur. 27A boyanmang bisam yabwe ab, nerabwe ab, bona-bona ab ara meici kukoka bitinyi kibkwandarur. Ara, ninyi ibinmongwe yin doun nang ton, Israel nang yuk nang ton kibkwandarur. 28Ba, Ni Imtamnyi biti karebkwamanumunyi dinyi ara yin doun nang ati karebmaminyi dinyi asi doboka karebkwanurum. Ara, nerabwe ab, bisam sapi ab, bisam domba ab, kambing ab yuk-yuk nukwandum. Ura, 500 baryi nukmaminyi dinyi yuk-yuk tentok-tentok dobnin yibinkwandum. Ura, a dobmaminyi dinyi ara Ni Imtamnyi bisi karebkwanurum. 29Anda dinyi ara imam Eleazar biti karebkwandum. A karebminyi dinyi ara Ni Iya Erebdobnyi biti dama deibkwanirim. 30Ba, Israel nang ati karebmaminyi dinyi nerabwe ab, bisam sapi ab, bisa domba ab, bisam kambing ab nukwandum. Ura, 50 baryi nukmaminyi dinyi yuk-yuk tentok-tentok dobnin yibinkwandum. Ura, a dobmaminyi dinyi ara Ni Iya Erebdobnyi ai Kemah Suci ai wa inung nang Lewi yala nang ati karebkwandum,” ebmou.
31Ura, Musa ab, imam Eleazar ab aryi Er Iya Erebdobnyi ebdeibmou to kuboka kunubmarei. 32Ba, a daluboka boyanmai dinyi yin doun nang dam tuba kubmou dinyi ara bisam kambing domba 675.000 baryi ab, 33bisam sapi yim 72.000 baryi ab, 34bisam keledai 61.000 baryi ab tuba kubmou. 35Ba, Midian nerabwe sal ab tonkwa kuramingnyi nerabwe doboka boyanamnyi nerabwe 32.0000 baryi tuba kubmou. 36Ba, meici kukoka ton dinyi mar ibinmai nang dinyi kubmou nungna ara 337.500 baryi bisam kambing domba ab kubmou. 37Ba, Er Iya Erebdobnyi biti buluboka karebmai dinyi ara bisam kambing ab, domba ab tentok-tentok doboka karebmai dinyi nungna ara 675 baryi karebmai. 38Tonda, bisam sapi yim a daluboka boyanmai dinyi ara 36.000 baryi tuba kubmou. Er Iya Erebdobnyi biti karebmai dinyi ara bisam sapi yim 72 baryi karebmai. 39Ba, yin doun nang dam tuba kubmou bisam keledai ara 30.500 baryi tuba kubmou. Ba, Er Iya Erebdobnyi biti dama deibmai dinyi ara 61 baryi karebmai. 40Ba, yin don nang dam tuba kubmou kam nerabwe ara 16.000 nerabwe tuba kubmou. Ba, Er Iya Erebdobnyi biti karebmai nerabwe nungna ara 32 baryi karebmai. 41Ura, Musa biryi Er Iya Erebdobnyi biti dama deibmou dinyi ara imam Eleazar biti karebmou. Ara, Er Iya Erebdobnyi biryi Musa dam ebdeibmou to kuboka kunubmou. 42Ura, Musa biryi yin doun nang dinyi yuk wibdeibmou to kuboka Israel nang dinyi yuk wibdeibmou. 43Israel nang ati wibdeibmou dinyi ara bisam kambing domba yabwe 337.500 baryi wibdeibmou. 44Tonda bisam sapi yim 36.000 baryi ab, 45bisam keledai 30.500 baryi ab, 46nerabwe 16.000 baryi ab Israel nang ati wibdeibmou 47Ura, Er Iya Erebdobnyi biryi ebdeibmou to kuboka Musa biryi Israel nang ati wibdeibmou nerabwe ab, bisam ab asi 50 baryi yuk-yuk tentok-tentok dobnin yibinmou. Dobwe ura, Lewi yala nang Er Iya Erebdobnyi ai Kemah Suci ai wa iramnyi nang ati karebmou.
48Ura, Israel nang yin doun nang sien nang ab, 1.000 baryi yin doun nang sien nang ab, 100 baryi yin doun nang sien nang ab Musa dam binmai. 49Ura, ato ebmai, “Nai nun yin doun nang nirya nukmab. Uca, ton waningna kum kubmabci, nirya a kunmab. 50Ati, nun boyanmab dinyi ara Er Iya Erebdobnyi biti dama deiboka karebkwayeb. A doboka boyanmab dinyi ara emas aryi kikniamingnyi dinyi karebkwayeb. Ara, toubna dama dongona ab, yan kweirya ab, taruk du ongona ab, amol ongona ab, uryi ab, bakima ab nirya karebkwayeb. Ba, Er Iya Erebdobnyi biryi nun kam kun dinyi tuba-tuba kalikwansir,” ebmai. 51Ura, Musa ab, imam Eleazar ab aryi emas aryi kikniamnyi boyanmai bona-bona nirya dobmarei. 52Ani, yin doun nang sien nang aryi Er Iya Erebdobnyi biti yuk dama deibmai emas ikin 200 kilogram dobmarei. 53Bok, yin doun nang sien nang aryi bona-bona dalubmai dinyi ara sunbabyi ton kibdobmai. 54Ura, Musa ab, imam Eleazar ab aryi anda emas boboka Er Iya Erebdobnyi ai Kemah Suci ai umbura bobinmarei. Ba, Er Iya Erebdobnyi biryi Israel nang kalingkwamwe ati ato kubmarei.
Currently Selected:
Bilangan Uram 31: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
