Bilangan Uram 17
17
Harun kama keta oboka du moubmou uram deyok
17:1-13
1Er Iya Erebdobnyi biryi Musa bisi ato ebmou, 2“Israel nang asi ato ebdum, ‘Sun yala yuk-yuk weik sien nang amolbaryi kibdau to kama amolbaryi Nisi karebnindarur,’ ebdum. ‘A karebmakingnyi kama ara yala yuk-yuk weik sien nang kibyi to si sekdongobnin yibinkwandum. 3Lewi yala nang kama ara Harun si sekdongobkwandum. Ba, yala yuk-yuk ara kama tentok karebnin yibinkwandum. 4Sirya ukubminyi ura, anda kama amolbaryi ara Ni ab kan ab erdanunum ai Kemah Suci ai umbura bok, “Ukubdarur-ukuna mem,” en uram deibdau co sangkol alib dam yandoka deibkwandum. 5Ba, Ni Imtamnyi biryi wibninyi bira a kama luk anabkwande. Ato Ni Imtamnyi biryi kubnyi ura, kan dam asi yandoka tuba watukunung to kum kubkwaming. Ba, Nibabyi sun watuna kekena kum kubkwan,’ ebdum,” ebmou. 6Musa biryi Er Iya Erebdobnyi biryi ebmou to kuboka Israel nang dam ebmou. Ura, Israel nang yala yuk-yuk weik sien nang koklombaryi aryi kama koklombaryi karebmai. Harun kama ababyi neika tabakdongobmai ba, amolbaryi kibmou. 7Ura, Musa biryi anda kama doboka Er Iya Erebdobnyi keis ol ai umbura bobinmouci, “Ukubdarur-ukuna mem,” en uram kibdeiamnyi co sangkol alib deibmou. 8#Ibr. 9:4Ura, mabmai ani, berentam ara Musa Er Iya Erebdobnyi ai umbura wengbindoka diramwe uca, Lewi yala nang Harun douramwe kama asi luk anabmouci, keta teleb oboka badam du moubmou. 9Ura, Musa biryi anda kama nirya boboka ai dam sakwetebmou. Ura, Israel nang nirya ngalukdobnyi ura, anda kama Israel nang yala yuk-yuk weik sien nang kiamnyi to kuboka doryanmai.
10Ura, Er Iya Erebdobnyi biryi Musa bisi ato ebmou, “Harun kama ara tubto tamuboka, ‘Ukubdarur-ukuna mem,’ en uram co sangkol dam deirbirum. Ba, a kama aryi Israel nang Harun bisi tuba watubingnyi nang ara uram kilikdeibkwandum. Ba, sun Israel nang aryi watunmangnyi dinyi Ni Iya Erebdobnyi kum kekebkwan,” ebmou. 11Ura, Musa biryi Er Iya Erebdobnyi ebmou to kuboka kunubmou. 12Ura, Israel nang aryi Musa bisi ato ebmai, “Nunsi dibdesurum, kum dansekwayeb! Nun dibsekwayeb! Nun nirya kum dansekwayeb! 13Unanyi biryi Er Iya Erebdobnyi ai beterdongona mem ai dam yaci ura, dibkwande. Kum nun nirya kum dansekwayeb kum?” eboka Israel nang aryi Musa bisi asibdenmai.
Currently Selected:
Bilangan Uram 17: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
