Bilangan Uram 16
16
Korah ab, Datan ab, Abiram ab aryi Musa ab, Harun ab asi malyi kibmai deyok
16:1-50
1Lewi deibdoba bok, Kehat yalanyi Yizhar mi Korah ab, Ruben deibdoba bok, Eliab mabwe si Datan ab Abiram ab, Pelet mi On ab aryi Musa ab Harun ab asi mar moun yiboka yu bobmai. Ura, sunci Israel nang yuk nang asi “Musa ab Harun ab ibinkwayeb,” eboka arukmai. 2Ani, Israel nang kalingna nang 250 baryi nang ab aryi sunsi miliboka Musa bisi malyi kibkwamaici, bulubmai. A sien nang ara Israel ninyi kalingna ati wiamnyi weik nang kuramnyi. 3Ura, sun nirya Musa ab, Harun ab dam bindoka warikmaici, uram ato ebmai, “Musa ab, Harun ab sirya a kunum erebdanandurum! Nun Israel nang nirya ara Er Iya Erebdobnyi biryi wiboka Er mabwe kibsou nang kunub. Ba, Er Iya Erebdobnyi bira nun kankan dam a kurur. Bok, Musa ab, Harun ab sunda Er Iya Erebdobnyi mabwe dam asi unatoa ati suncok arukoka kalingsururum do?” ebmai. 4Ato ebmai ura, Musa kutam ikdongoboka Er Iya Erebdobnyi dam asi luknubdongoboka Er Iya Erebdobnyi bisi molobmou. 5Ura, Musa biryi tubto tikokmouci Korah ab, er milibmai nang ab asi ato ebmou, “Ambutum belekuna aryi Er Iya Erebdobnyi biryi uram ebdeibkwamasir. Ara, unanyi bisi Imtamnyi wa inanyi kibkwamar do? Ani, unanyi bisi Er Imtamnyi yuk wibdeiboka Er dam yangana kikimanyi ebkwamar. A wibmarinyi bisi Er Iya Erebdobnyi imam wa ibkwande. 6Sunci ato kubdarur, Korah kan ab, kan milibmaking nang ab aryi uk kalum deirin dinyi dobdarur. 7A doboka deibmamunyi uk kalum deirin dinyi asi uk sekmunyi ura, tong teleb en dinyi uk daboka Er Iya Erebdobnyi ai dam deiryankwandarur. Ba, ambutum aryi Er Iya Erebdobnyi biryi unanyi bisi wibci ura, a wibmarinyi bira Er Imtamnyi biti dama deirina ati imam wa ina kikimanyi kibkwande. Lewi yala nang, ni kuma, eda sunci a kunum erebdandoka malyi kibmandarur!” ebmou.
8Ura, Musa biryi Korah bisi ato ebmou, “A kekendarur Lewi yala nang! 9Sunda, ‘Mitik dinyi aca,’ malyi tenebmarum do? Ba, Er Imtamnyi biryi Israel nang kankan dam aryi sun Lewi yala nang asi kum wibsou do? Ba, sunda, ‘Er Imtamnyi ai Kemah Suci ai wa ibkwandum,’ dinyi ab, ‘Sun Israel nang aryi Nisi molobkwamanumunci, sun Lewi yala nang aryi sun urasintam tikoka ukubkwayeb,’ erandum dinyi ab ati wa karebsou ara mitik do? 10Ani, kan Korah ab, kan ai nang Lewi yala nang ab ara Er Iya Erebdobnyi biryi sirya wibsou. Ani, sun Er Iya Erebdobnyi dam yandoka Er ai umbura indarur wa ara bousina kum kubsou do? Ati, sunci, ‘Nunbabyi imam nang kibkwayeb,’ tenebmarum do? 11Ato tenebmarumci, sun yala nang ab, sun ai nang ab aryi Harun bisi malyi kibmarum ara Er Iya Erebdobnyi bisi malyi kibmarum. Harun bira Er Imtamnyi biryi wiboka imam wa karebwe,” ebmou.
12Ura, Musa biryi ninyi asi arukmou ba, “Eliab mabwe Datan ab, Abiram ab asi inirbindarur,” ebmou. Bok, sunci ato ebmarei, “Nun kum yankwamanim! 13Musa kanci Mesir mutuk yina ilinto kuramwe mutuk dam aryi boboka yina kum mutuk dam a boyasoumci, obminikwansirim ara bouna kum kubkou do? Kanci weik sienyi kiaminci, nunsi iya arukwansirim do? 14Musa kanci nunsi yina sul ilinto kuranci mutuk bobinkwansirim do? Kum. Kanci mutuk yuk nuksiminci, anggur wa in mutuk yuk likeibkwansirim do? Kanci nunsi tola ati esurum! Ati, nun kum yankwamanim,” ebmarei. 15Ura, Musa yu wekmouci, Er Iya Erebdobnyi bisi ato ebmou, “Nai, Kanci sun yandoka dama deibmangci, molonmang dinyi dorona mem! Niryi sun malyi bisam keledai ton doboka yina kum kubman. Niryi sunsi yu dinyi ton kum kunun,” ebmou.
16Ura, Musa biryi Korah bisi ato ebmou, “Korah, kan ab, kan milibmakin nang 250 baryi nang ab nirya Er Iya Erebdobnyi dam yankwamandarur. Ara, kan kikwa kuma, eda Harun bibabyi Er Iya Erebdobnyi ai dam yankwamarum. 17Ara, sunci doboka uk kalum kirdeirin dinyi yuk-yuk bobmamunyi aryi uk sekmunyi ura, tong teleb en dinyi uk daboka Er Iya Erebdobnyi ai dam deiryankwandarur. Ura, a dinyi Er Iya Erebdobnyi bisi dama deibmunci, molobkwandarur. Ani, kan ab, Harun ab ababyi tong teleb en dinyi Er Iya Erebdobnyi bisi dama deirina ati yuk-yuk bobkwandurum,” ebmou. 18Ura, ninyi yuk-yuk uk kalum kirdeirina bobmaici, uk kalum ab, tong teleb en dinyi ab kibdongoboka bobinmai. Ura, Kemah Suci ai bisik bublan dam tikmai. Ara, Musa ab Harun ab ababyi neika tikmai. 19Ba, Korah biryi bulubdeibmou nang nirya urasin ara Musa ab Harun ab asi diblulubdanmai. A talak aryi sun Israel ninyi nirya ababyi buluboka Musa ab, Harun ab sun urasintam tikmai. Ba, sun nirya ara Er Iya Erebdobnyi milil ibarya asing eibmai. 20Ura, Er Iya Erebdobnyi biryi Musa ab, Harun ab asi ato ebmou. 21“Sun a nang dam aryi kisibdobdurum. A uki aryok Niryi sun nirya obkabkun,” ebmou. 22Bok, Musa ab, Harun ab aryi kutam tukwe ikdongoboka ato ebmarei, “Nai Imtamnyi, Kanda nun Molokunubnyi, Kan kanya Roh aryi ukutotoa nirya isin karerum. Ani, tentoknyi biryi malyi dinyi kurur bok, a wekmang ninyi nirya obkwamarim do?” ebmarei.
23Ura, Er Iya Erebdobnyi biryi Musa bisi ato ebmou. 24“Israel nang asi ato ebdum, ‘Korah ab, Datan ab, Abiram ab keis ol ai dam ara kisibdobdarur,’ ebdum,” ebmou. 25Ura, Israel yala yuk-yuk sien nang Musa milibmai ba, Musa ab tonkwa Datan ab Abiram ab atei binmai. 26Ura, Musa biryi Israel ninyi asi ato ebmou, “Yu ilinto nang keis ol ai dam ara kisibdobdarur. Ani, sun dinyi ukutotoa asi bolirdena mem! Asi, sunci ni ebman dinyi kum kunubmunyi ura, sun ab tonkwa kum dansekwamarum. Ara, sun malyi kuramunyi dinyi aryi dibsekwamarum,” ebmou. 27Ura, Israel ninyi nirya ara Korah ab, Datan ab, Abiram ab atei dam aryi kisibdobmai. Ura, Datan ab, Abiram ab, sun nerabwe ab, mabwe nermabwe ab ai aryi sakweteboka sun ai bisik bublan dam tingyanmai. 28Ura, Musa biryi ato ebmou, “A kubkur dinyi aryi sun bikwamarum. Ara, nisi Er Iya Erebdobnyi biryi naboka wibnou ba, sun dam weiknyi kibsiryi a kunun. A weiknyi kibsiryi kunun dinyi ababyi ni tenebmanyi tok kum kununun. 29Ani, anda ninyi asi ninyi dinung to kuboka dibingiryi, ninyi mambul kanya boraming to kubingnyi ura, nira Er Iya Erebdobnyi biryi kum wianiriryi. 30Bok, Er Iya Erebdobnyi biryi ukurdena kum kurur dinyi kubkwamar. Ara, tukwe dilikoka si akci ura, sun nong ab, sun bona-bona ab kam kibmaning din nang tukwe umbura wengbinkwamang. Ato kubci ura, sunci a kubmar dinyi ara, ‘Er Iya Erebdobyi bisi malyi kimnung nang,’ tenebkwamarum,” ebmou. 31Ura, Musa sirya uram erdongou karin ara sun tikmai yan dam asi tukwe dilikmou. 32Ba, a dilikoka si akmouci, Korah ab, Datan ab, Abiram ab, sun nerabwe ab, sun mabwe nermabwe ab, sun bona-bona nirya ab a tukwe umbura weksekmai. Ani, yuk nang Musa ab Harun ab asi malyi kibmai nang ababyi nirya tukwe umbura weksekmai. 33Ato kuboka a winiryi nang ab, sun tam kuramnyi ninyi nirya ab ababyi kam kibmaning din nang kunung tukwe umbura dam wengbinsekmai. Ura, tukwe dilikoka si akmou ara tubto singibdongobmouci, minob kuamwe to kubmou. 34Ba, Israel nang nirya ara a tukwe umbura wengbinsekmai ninyi ngolongnamnyi uca, uram kekebdongoboka cukdobmai. Cungdonmaici, uram ato enmai, “Cukdobkwayeb-cukdobkwayeb! Nunbabyi mutuk aryi tomoboka amubsicob,” ebmai. 35Ura, Er Iya Erebdobnyi biryi uk dobkwetebmou ba, Kemah Suci ai dam uk kalum kirdeirin dinyi umbura tong teleb en dinyi dama deirinmai nang nirya uk yibmou. A nang ara Korah miliramnyi nang nungna ara 250 baryi nang nirya uk yibmou.
36Er Iya Erebdobnyi biryi Musa bisi ato ebmou, 37“Imam Harun mi Eleazar bisi arukdum. Ba, erci uk kalum kirdeirina aryi doboka a uk yibmar dinyi kalum nirya kiboka yuk mutuk donongbirur. Bok, uk kalum dinyi ara beterdongona mem dinyi ati ebman. 38Ara, sunci uk kalum ab, tong teleb en dinyi ab Er Iya Erebdobnyi biti dama deirin dinyi boyanmongwe. Ba, a boyanmang dinyi ara beterdongona mem dinyi kibmar. Ati, sun uk kalum kirdeirin dinyi boyandoka Er Iya Erebdobnyi dam dama deibmongwe dinyi ara doboka uk nunubminyi ura, dama deirin keil dukoka lamdeirina dub ai asi ililib ebdeibdum. A ukuaminyi dinyi asi Israel nang aryi eibingiryi, kanya teneibdengnyi ura, ‘Ato ati kubdeibsou,’ tenebkwanung,” ebmou. 39Ura, imam Eleazar biryi a uk yibmou nang uk kalum kirdeirina doboka teikoka Er Imtamnyi biti dama deirin keil lamna dam denebdongobmou. 40A kubmou dinyi ara Israel yala nang ati yan memebdeibmou. Ara, “Harun yala nang kum bok, Er Iya Erebdobnyi biti uk kalum kirdeirina umbura aryi tong teleb en dinyi Er Imtamnyi biti dama deiryangana kum kubkwaming,” tenen kubmou. Ba, talya dama deiryangnyi ura, Korah ab er miliramnyi nang ab kubwe to kubkwande. Ara, Er Iya Erebdobnyi biryi Musa dam asi minob ebdeiamwe to kuboka Eleazar biryi kunubmou.
41Bok, ambutum berekwe ura, Israel nang aryi Musa ab, Harun ab asi kerebmai. Ara, ato kuboka uram ebmai, “Sunci Er Iya Erebdobnyi mabwe obdurumwe,” ebmai. 42Ura, Israel nang nirya bulubmaici, Musa ab Harun ab asi malyi kibmai. Ba, sun urasin ara Kemah Suci ai dam tam deibmai. Ura, Er Iya Erebdobnyi ai asi duwa aryi libdobmouci, Er Iya Erebdobnyi milil ibarya kuboka tingyanmou. 43Ura, Musa ab, Harun ab Er Iya Erebdobnyi ai dam binmarei.
44Ura, Er Iya Erebdobnyi biryi Musa bisi ato ebmou. 45“Anda ninyi kankan dam aryi kisibdobdum. Ni Imtamnyi biryi nirya kum dandeibkwaman,” ebmou. Bok, Musa ab, Harun ab aryi kutam ikdongoboka luknubmarei. 46Ura, Musa biryi Harun bisi ato ebmou, “Kan uk kalum kirdeirina Kemah Suci ai umbura o dobminci, boyarum. Ba, a uk kalum deirina ara dama deirin keil lamna dub bobindoka uk kalum kibdongobdum. Tonda, tong teleb en dinyi uk kalum deici deibdum. Deibminyi ura, Israel nang dam olong bobirum. Ara, Er Iya Erebdobnyi yu ilinto wekmarci, ninyi on dinyi sirya wengyanmar. Ati, biminyi ura, ‘Sun ab, Er Iya Erebdobnyi ab antanibkwamarum ati sun malyi kun dinyi kilin dinyi kunubdarur,’ ebdum,” ebmou. 47Ura, Harun biryi Musa ebmou to kuboka kunubmou. Ara, Harun cungbinmouci, Israel nang wekmai kankan dam bindoka diramwe uca orminingna dinyi sirya lak kibmou. Ura, Harun biryi tong teleb en dinyi uk kalum deici kiboka bobmou dinyi aryi Israel ninyi ab, Er Iya Erebdobnyi ab antanibdankwamai ati sun malyi kun dinyi kilin dinyi kunubmou. 48Ba, Harun bira dibmai nang kan, kam tuba kubmai nang kan noutumang tikmou. Ura, ninyi orminingni dinyi ara kum danmou. 49A talak aryi dibmai nang nirya nungna ara 14.700 dibmai. A nukmai ara Korah ab, er milibmai nang aryi Musa bisi malyi kibmai ba, obmou nang ara kum nukmai. 50Ninyi orminingna dinyi sirya kum danmou ura, Harun tubto tamuboka Musa dam yanmou.
Currently Selected:
Bilangan Uram 16: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
