Mikha Uram 1
1
Er Imtamnyi biryi Mikha bisi uram ebdeibmou deyok
1:1
1A kerek sengna uram ara Er Iya Erebdobnyi biryi atei si Moresyet kuramunyi si Mikha bisi ebdeibmou. Ara, “Samaria atei ab, Yerusalem atei ab ati ato-ato kubkwande,” en uram er deici ebdeibmou. A talak ara weik sien nang ninyi winiryi unubdandoka Yehuda mutuk taleramnyi talak. Sun si ara Yotam ab, Ahas ab, Hizkia ab kuramnyi talak aryi Er Imtamnyi biryi Mikha bisi ato eboka Er uram erdeiriramwe.
Israel mutuk dam weik atei si Samaria ab, Yehuda mutuk dam weik atei Yerusalem ab asi wenebkwamwe to ati uram ebmou deyok
1:2-7
2We, im dangna tukwe dangna mutuk yala nang sun nirya kekerandarur.
We, sun tukwetam kundarur nang sun nirya dirandarur.
Er Iya Erebdobnyi sun Molonanyi biryi sun malyi kuna diboka liliboka lak kibdeibkwansir.
Erci Er imtam ai iya teleb ai umbura dam aryi uram eboka lilibdeibkwansir ati kekerandarur.
3Ara, diba ati, Er Iya Erebdobnyi bira Er ai umbura aryi anabdobci ura,
yuryandoka tukwetam mutuk konkon ai yibinkirikwande.
4Ba, mutuk konkon Er yan yaninmaci ai ara daluboka sakwande.
Ba, bakan mutuk ara dikokabdiryi co iya uk sin ai deibdongoabingnyi uca,
nunurande to kubkwande.
Ani, me lum sangnanci ai aryi alalam eboka kum danarorande to kubkwande.
5A dinyi nirya kunubkwande ara Yakub yal dobdoba nang aryi Er Imtamnyi biryi erdeirin uram dangbisiramingnyi deyok aryi ukubkwande.
Israel nang aryi malyi dinyi ukun deyok aryi ukubkwande.
Una atei nang ara Yakub yaldangna nang kankan aryi Er Imtamnyi uram dangbisin atei nang kunung do?
Diba, sun Samaria atei nang ara nukoka Er Imtamnyi uram dakbisiboka malyi kimdeirinung.
Ba, una atei nang ara Yehuda mutuk atei nang kankan aryi iya malyi dinyi kunung atei nang kunung do?
Diba, Yerusalem atei nang aryi nukoka malyi dinyi kimdongonung.
6A deyok aryi Ni Imtamnyi biryi Samaria mutuk ara yini mutuk atei daklobdoba olong ato kibdeibkwan.
Ani, co anggur koun mutuk akwe kibdeibkwan.
Niryi akatei doramingnyi keil ara nirya bakan mutuk tam bongobkwetebkwan.
Ba, akatei nunukdeiboka doramingnyi keil nirya daldalubkabokwan.
7Sun kwemdeina molon dinyi kikniboka deiriramingnyi dinyi nirya daldalubdonokwan.
Yukut yon ner talyi yobdanin yibaramingiryi, dengdaraming dinyi utotoa nirya uk dabkwan.
Ani, sun yordan dinyi mikib kimna ati deiboka moloramingnyi kwemdeina ara sici kibkabokwan.
Ara, sun ato kuraming deyok aryi ukubkwan. Ara, talyi yukut yordaramingiryi, bobde buluramingnyi deyok aryi daldalubdonokwan.
Ba, a dinyi doboka bobde bindobkwaming nang ara a talyi yukut yordana ati dengdan ato dinyi asi doboka sun kwemdeina asi karebkwaming.
Mikha biryi sun Israel mutuk nang ab, Yehuda mutuk nang ab ati eboka mambul kirikmouci, uram ebmou deyok
1:8-16
8Ninyi si Mikha biryi sun Israel mutuk nang ab, Yehuda mutuk nang ab ati ato eboka mambul kirikmou.
“Nira, ‘Ato kubkwansir deyok aryi mambul kirikoka engebkwansin,’ tenesunun.
Ani, ‘Ni bisik ai yibaronmanyi ura, yan karuk ongorona kumkum yibaronkwan.
Ani, nong baning yibaronkwan,’ tenenun.
Tonda, ‘Bura kam aryi kamubde yibarande to ani,
maka sanib aryi bibde yibarande to kuryibankwan,’ tenenun.
9Ara, sunsi ato kusurur. Sun Samaria nang dilaka dorur dinyi ara ton nimdona kum kurur.
Eda, Yehuda mutuk dam ababyi sirya dakdongobdanin yibanung.
Ani, ni mutuk dam wengban lika bublan dam Yerusalem atei ababyi sirya dangdongorbinmang.
10A kunurur dinyi ara nun mar ordan atei Gat nang dam erdongona ara mem.
Sun akatei nang urasin dam engerdena mem.
Eda, Bet-Le-Afra atei nang asi sici borbosa kankan maboka dangum-alim ebde maronkwandarur.
11We, sun Safir atei nang ara nong baning dem aryi alyi asa aryi bungbung ena kuluboka bobdobmunyi ur anabdobdarur.
Ba, Zaanan atei nang ara akata doboka sun atei dam aryi anabkaboka yibinman kum kurur.
Bet-Haezel atei nang ara engenung deyok aryi mitang kurur ati, sunci mikib kuboka sunsi tubto lemdosina kum kubsunung.
12Mambul don dinyi ara Er Iya Erebdobnyi biryi dobkwetebwe.
A deyok aryi sun Marot atei nang aryi lemdeirin dinyi ati dibde bunung bok, talyitam ati dibde bunung.
Ba, Yerusalem atei wengban bisik bublan lika dam ababyi mambul donung.
13We, Lakhis atei nang a, sunci, ‘Lebdandobkwayeb,’ tenen sun bisam kuda ab kereta ab asi kiknibdeiboka ola cungyibindobdarur.
Sion atei ner sal ab aryi minob ura malyi dinyi kum kunuramnyi ani, sun malyi dinyi asing eibmai ura, sunbabyi neiktoto malyi dinyi kunuramnyi.
Ati, sunci deyok kouboka malyi kubkalibmandau to, sun Israel nang aryi neiktoto malyi kunuramnyi.
14A deyok aryi sun mar ordana nang aryi yandoka atei si Moresyet-Gat asi arabdobingnyi ura, Yehuda mutuk atei tuba kum kubkwande. Ati sunci, ‘Sirya a kum bokdab,’ tenen sunsi, ‘Ni kwit yabwe da bindarur,’ ebdarur.
Ba, Akhzib atei nang ara, ‘Sun Israel mutuk weik sien nang asi iya milibkwayeb,’ eramiryok, diba ati kum eramnyi.
15Ba, sun Maresya atei nang a, sun dam ara Niryi sunsi muna kibdongobkwansing nang karebkwansin.
Ba, sun Israel mutuk si sin nang ara Adulam mutuk keil umbong inirdarorbindoka lemdarorbinkwaming.
16Sun kanya deiramunyi mabwe nermabwe boukwe deyok aryi, ban otong kukdandarur.
Ani, kisok otong ara dilo kwabdandarur.
Sun kankan dam aryi sun mabwe nermabwe boboka yuk mutuk era mutuk asi deirlorbinkwaming.
A deyok aryi sun kisok otong dilo kwabdankwamamunyi ara
kisok otong kum tingnande maka si bangkai ato kuboka kukdankwandarur,”
ato eboka Mikha biryi mambul kirikmou.
Currently Selected:
Mikha Uram 1: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
