Yunus Uram 4
4
Yunus bira yu kubmou uram deyok
4:1-11
1Er Imtamnyi biryi boukwe kubmou ati, Niniwe atei ara kum dakmou bok, er Yunus bira yu weik kubmou. 2Ura, erci Er Iya Erebdobnyi bisi ato eboka uram sisikoka molobmou, “Yo, Iya Erebdobnyi, Kanci sun Niniwe atei nang asi lebkwamoumwe ati, bokdonoknoumwe darib. Nira Niniwe atei a yangana kabul talak ni mutuk dam tuba kuranse talak aryi Kan tenen dinyi ara minob bikoka ni sirya Kan dam asi eanse. Ara, Imtamnyi Kanda kanya naminyi ab, ninyi boukwe kimdumnyi ab kurum. Kanda yu dinyi ola kum kunurumnyi kurum. Kanda tanglona kum uca, iya milirumnyi kurum. Ton ati, ‘Atei dangna ara Ni li,’ tenerumnyi kurum. Ara, Kanci nun Israel nang ab mar ordana nang asi lebkwamoumwe dinyi sirya bikmakise ati, ‘Ni li,’ tenen kitingbantam mutuk Tarsis inirdarorbanmase. 3Ati, Nai Iya Erebdobnyi, nira kam kuna ara ni li kubmanir. Eda, dirongna asi teleb kubmanir. Ati, Kanci ukuryok akiryi ni isin nebneb en dinyi dobdobdum,” ebmou. 4Uca, Er Iya Erebdobnyi biryi Yunus bisi ato ebmou, “Kanda unatoa ati yu kanya bobmarim do? Kanci ato dinyi ati, yu bobkwamarim ara kikiman kum,” ebkarebmou.
5Ebmou ura, Yunus bira Niniwe atei aryi kuboka yaletam binmou. Binmou ura, bara ai durubdeiboka, “Er Iya Erebdobnyi biryi Niniwe atei dakabokwande do kum do?” teneboka dibde buramwe.
6Ato teneboka dibde buramwe ba, Er Iya Erebdobnyi biryi, “Yunus kiting koka dikum asi buranci uca, er kanya kilkil kubkwande,” tenebmou. Ura, Erci arukmou ba, mitik co tentok ola abmouci, co bok ilinto kubmou. Er Iya Erebdobnyi biryi Yunus biti kiting koka kimdeirin dinyi karebmou ba, Yunus er kanya kilkil mitik kum kubmou.
7Ura, Yunus bira kitingtam sintam nirya ara kiting koka ati, a co deyok akwe burbaramwe. Asi, uki tentok tum ara mabmou ani, belekuna talak aryi Er Iya Erebdobnyi biryi beici tentok asi arukmou. Ba, a beici aryi a co yating nirya sesek-sesek eboka yibkabokmou uca, a co ara yalakdobmou ba, kiting koka buramwe ai ara kum danmou. 8Kiting koka wekdobmanto ai ara kum danmou bok, kiting dukduk en ara Er Iya Erebdobnyi biryi arukmou ba, yaletam aryi kuboka uk tin ato kumwe ton likdonokmou. Ura, Yunus er kisok u weik yinmou uca, lalakmanto kubmou. Ato kubmou ura, er kanya aryi ato tenebmou, “Kam kuboka mambul dona ara ni li. Ni ur a dibokmanun,” tenebmou.
9Ato tenebmou bok, Er Iya Erebdobnyi biryi Yunus bisi ebmou, “Yunus a, kanda a co yalakmar ati, Nisi yu bobmanirim do? Kanda yu wengkina kuma,” ebmou. Ba, Yunus biryi, “Yo, niryi Kansi yu bobmakinyi tok ani dibkwaman,” ebmou.
10Ebmou ura, Er Iya Erebdobnyi biryi Yunus bisi wenebmou, “Kan kekerum, a co ara kanci kum koubmoumwe ba, abmou asi, kiting tin aryi yalakmar. A co ara er yuk aryi ambutum abmo ani, arub yalakdobmar dinyi ara bikdob dinyi kuma bok asi boukwe kubmakir. 11Ba, Niryi sun Niniwe atei nang asi boukwe kiboka dirlilinun ara malyito ukurur tenebmarim do? Ato tenen kum. Weik atei Niniwe nang ab ninyi winin dinyi ab ara malya kuma. Akatei ara ninyi ilinto kunung. Akatei mitik mabwe akwe nungna obura, 120.000 baryi kunung. Ninyi winin dinyi ababyi ilinto wininung. Kanda akatei nang asi Niryi boukwe kimna ara teleb kum tenerum darib?” ato eboka Er Iya Erebdobnyi biryi Yunus bisi wenebmou.
Currently Selected:
Yunus Uram 4: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
