Imamat Uram 2
2
Er Imtamnyi biti yina-yina dama deiboka molon dinyi si Korban Sajian deyok
2:1-16
1“Ura, sunci Er Iya Erebdobnyi biti yina-yina dama deiboka molobkwamamunyi ura, anda yina-yina asi dama deiboka molobkwandarur. Ara, telebto tepung ab, co zaitun du yung ab tonkwa dongobkwandarur. Tonda, tong telebto co kemenyan kubmangnyi ara a tepung alib deibkwandarur. 2Ura, Er Imtamnyi ai wa in nang imam nang Harun mabwe asi bobindoka karebkwandarur. Ba, sunci a bobinmamunyi tepung ab, zaitun me ab asi te ongomna tentok aryi dobkwanung. Tonda, sun bobinmamunyi telebto tong co si kemenyan nirya asi dobkwanung. Ura, a dobmangnyi dinyi ara sun imam nang aryi dama deirinin keil dungna dub deiboka uk dankwanung. Ba, a uk dabmangnyi ara mitikanun doboka dabmangnyi bok, Er Imtamnyi biryi eibokabdiryi teneibkwamaca ara, ‘Sunci weikanun karebmaning,’ tenenkwande. Ba, uk dabingnyi siltong yubnyi ura, Niryi sun bobinmangnyi nang asi kanya deibkwansin. 3Ba, Er Imtamnyi biti bobindoka dama deibmamunci kablobmamunyi dama ara Harun ab, er mabwe ab dinyi kimkwande. Ara, iya lek dinyi kibmaci deyok aryi sun imam nang dinyi kimnikwandur.
4Sunci sangkuna roti asi kikniboka dabmunci dama deibkwamamunyi ura, ato roti asi ato kuboka dama deirinkwandarur. Ara, tepung teleb ab, bungbung ena dongona kum kubmamunci, zaitun du yung ab aryi tabtabukoka kiknibmamunyi tokol roti ab asi dama deiboka molobkwandarur. Ani, tonda roti bungbung en keica si ragi dongona kum kubmamunyi roti bok, ila roti minyak zaitun aryi likoka inibmamunyi roti asi dama deiboka molonkwandarur. 5Ani, roti kwaning dan keica aryi diboka dabmamunyi roti asi dama deibkwamamunyi ababyi neiktoto kuboka dama deirinkwandarur. Ara, tepung teleb ab, zaitun du yung ab, bungbung ena aryi dongoboka kiknina kum kubmamunyi tokol roti asi dama deirinkwandarur. 6Ba, a deibkwamamunyi dama yina-yina ara touboka-touboka a keil dungna er urub-urub asi deiboka zaitun du yung dikdongobnin yibinkwandarur. 7Ba, sunci kuali aryi dabmamunyi roti asi dama deibkwamamunyi ura, a roti ara tepung teleb ab minyak zaitun ab aryi likoka kiknibmamunyi roti asi dama deiboka molobkwandarur. 8Ato kuboka Er Iya Erebdobnyi biti yina-yina dama deibkwandarur. Deibmunyi ura, sun imam nang dam boyankwandarur. Ba, sun imam nang aryi Er Imtamnyi biti dama deirin keil lamna dam bobankwanung. 9Ura, sun imam nang aryi a dama nirya asi meica kukoka Er Iya Erebdobnyi biti yuk wimdeirinkwanung ba, Er dinyi kinkwandur. Ato sirya kubingnyi ura, a keil dungna dub deiboka uk dankwanung. Ba, Er Iya Erebdobnyi biryi a teleb siltong yubokabdiryi kanya deibkwandur. 10Ba, a dama aryi kablobingnyi dinyi nirya ara sun Harun mabwe imam nang dinyi kimnikwandur. Ara, Er Iya Erebdobnyi biti yuk wiboka deibmamunyi ba, sirya iya lek dinyi kibmaci deyok aryi sun imam nang dinyi kimkwandur.
11Ni Iya Erebdobnyi biti yina-yina dama deiboka molobkwamanumunyi yina-yina ara roti kwaning bungbung erande keica si ragi aryi dongoboka kiknina mem. Ara, ragi ab, kwiryi yung ab aryi, Ni Iya Erebdobnyi biti dama deiboka uk dana mem. 12Bok, sun wa iamunya yuma kibmamunyi koubdoba ara tonkwa ragi ab, kwiryi yung me ab aryi tonkwa dikmamunyi dinyi ara Ni Iya Erebdobnyi biti, ur dama deibkwanindarur. Bok, a dinyi ara, ‘Niti siltong kekebkwande,’ tenen ati, keil dungna deici dama deiboka uk dana mem! Eda, Ni ai wa in nang ati boyankwandarur. 13Anda yina koubdoba dama deibkwamanumunyi ura, to en keica si garam dokmun cok asi deibkwanindarur. Ni sun molonindarurnyi biryi ebdeiansinyi to kuboka dama deirin dinyi nirya asi garam dokoka deirinkwanindarur.
14Ani, sun wa iamunya yuma kibmamunyi gandum ara Ni Iya Erebdobnyi biti dama deiboka molobkwanindarur. Ba, sun koubdoba gandum du yalyi kweboka uk dabmamunyi dinyi ababyi boyandoka, Niti dama deibkwanindarur. 15Ba, a gandum deici ara zaitun yung ab, to en dinyi kemenyan ab aryi dikdongobkwandarur. Sunci koubde yirandum yina-yina ara Ni Imtamnyi biti dama deibkwanindarur. 16Ba, Niti ninyi dama deirin nang aryi a zaitun me ab, kemenyan ab, gandum du ab te ongomna tentok ara uk dabkwanung. Ba, a uk dabmangnyi ara mitikanun doboka dabmangnyi bok, Er Imtamnyi biryi eibokabdiryi teneibkwamaca ara, ‘Sunci weikanun karebmaning,’ tenenkwande,” ebmou.
Currently Selected:
Imamat Uram 2: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
