Yosua Uram 7

Akhan biryi malyi kun dinyi kubmou ati, Er Imtamnyi biryi obmou deyok

7:1-26

1Er Iya Erebdobnyi biryi sun Israel nang ati, Yerikho atei kuramwe bona talena nirya ara, “Ni dinyi akwa,” tenen sunci dona mem eamwe. Eamwe bok, Yehuda yalanyi si Zerah biryi mi si Zabdi deiamwe, Zabdi biryi mi si Karmi deiamwe. Ba, Karmi biryi er mi si Akhan deiamwe. Anyi si Akhan biryi dona mem eamwe dinyi kum bikana kuna dobmou. A deyok aryi Er Iya Erebdobnyi biryi sun Israel nang asi yu kanya bobmou.

2Uki tentok tum aryi Yerikho atei aryi Yosua biryi ninyi ton wiboka atei si Ai dam bokdonokmou. Akatei ara Bet-Awen atei dam Betel atei yaletam kuboka asi bokdonokmou. Ura, ato ebmou, “A mutuk nirya dirmeimbindarur,” ebmou. Ba, a nang anaboka Ai atei dirmeimbinmai. 3Dirmeimbinmai ani, tamuryanmai ura, Yosua bisi ato ebmai, “Israel nang nirya kum binkwayeb, erda ninyi yubwa 2.000 baryok kum, 3.000 baryi kum asi mar ibinkwaming. Ai atei nang nirya ara ninyi mitikanun kunung ati, Israel nang talyi mambul dobingnyei,” ebmai. 4Ura, Israel nang yubwa 3.000 baryi nang anabmaici, “Obkwayeb,” tenen ibinmai bok, sunsi Ai nang aryi Israel nang asi domkiringmai ba, “Obsingnyei,” tenen kwarakoka yanmai. 5Ara, Israel nang 36 baryi dikum Ai nang aryi obmai. Obmaici, Ai atei lika bublan dam aryi dobkirikde yanmai ani, Syebarim mutuk asi welena yandoka sun muna obmai. Ba, sun Israel nang kanya sulbalya mitik kum kubmou. 6Ato kubmou ura, Yosua ab, sun Israel weik nang ab ara sun boukwe aryi ongon aling kwilikabokmai. Ura, Er Iya Erebdobnyi biryi, “Ukubdarur-ukuna mem,” en uram deirin co sangkol deyok dam asi kutam ikdongoboka kisok tukwe dumubokabiryi, Er Imtamnyi bisi molonmai. Molonmaici, tukwe borbosa kisok lingdaronmai tok asi sintam danmou. 7Ura, Yosua biryi Er Imtamnyi bisi ato ebmou, “Se, ni Nai Iya Erebdobnyi una deyok ati Yordan kouboka bindarur eansoumwe do? Ani, ‘A Amori mutuk nang aryi obnung,’ tenen boyasoumwe do? Nunda Yordan kouboka otam kuronman bok, talyi iniboka boyasoumwe. 8Ani, Nai Imtamnyi, Israel nang asi sun mar ordan nang aryi sirya muna oboka murukdobmang ati niryi una ebkwan do? 9Kanaan nang ab a mutuk nang nirya a uram kekebingnyi ura, nun nirya obkiriboka a mutuk dam aryi kum dandeibkwansing. Ati, Kan si Erebdobnyi si malyi kibkwamaking ati una kuboka erebdandobkwamarim do?” ebmou.

10Ebmou ba, Er Iya Erebdobnyi biryi Yosua bisi ato ebmou, “Unatoa ati kan kisok luknubmarim do? Bukokdum! 11Sun Israel nang ara Niryi, ‘A bona talena dona mem,’ eanwe dinyi kum kunubmangci, ukula doboka sun bona kankan iniboka deibdobmang cok, ‘Nun ton kum dobmab,’ ebmang. 12A deyok aryi Israel nang sunci Ai atei nang asi muna obman kum kubmar. Eda, Ai atei nang aryi sunsi muna oboka murukdobmang ara sun Israel nang nirya kum dandeibmasin bok, teneboka takmasin. Tonda, sun dona mem en bona talena nirya, ‘Er Imtamnyi dinyi,’ tenen uk kum dabkiriamunyi ura, Nira sunsi kum milibkwansin. 13Bukokdum! Bukokminci, Israel nang asi ato ebdum, ‘Sun ab Ni ab ambutum ebdankwabmab ati malyi kun dinyi kununa kum uca, teleb dinyi akwe kunuboka kiklina dinyi aryi me kekoka, ongon aling me ilikoka kiknibminikmandarur. Ambutum ara malyi kibdongobsounyi sun kankan aryi wibkabokwamab. Ni Iya Erebdobnyi biryi sun Israel nang ati Niryi mem ebsise dinyi bona talena asi sun dam tuba deiriramunyi ura, mar ibimunyi ababyi sun muna ordongonkwansunung. Ati, sun kankan aryi malyi kun dinyi wibkabokwamab. 14Ara, ambutum belekuna ara Niryi sunsi yala yuk-yuk lilibdenkwamasin. Ni Iya Erebdobnyi sun Israel nang nirya nabsinyi ura, sun nirya buluryankwandarur. Ba, Niryi a yala tingyandarur ebnyi ura, a yala tingyankwanung. Ba, Niryi akai ninyi tingyandarur ebnyi ura, akai ninyi tingyankwanung. Tonda, Niryi a mabsilib tingyandarur ebnyi ura, a mabsilib tingyankwanung. Tonda, Niryi ninyi tentok-tentok tingyandarur ebnyi ura, a ebmanyi to tentok tingyankwandur. 15Ba, a mem en dinyi bona talena iniandinyi bikdongobnyi ura, a bona doboka iniandinyi ab, er mabsilib ab, er bona ab uk dabkwaman. Ara, Israel nang asi betebdongobmangnyi nang ara uk dabkwaman,’ ebdum!” Er Iya Erebdobnyi biryi ebmou.

16Ambutum belekuna ara Yosua biryi sun Israel nang asi yala yuk-yuk nabmou ba, er dam tingyanmai. Tingyanmai ura, lilinmou uca, Yehuda yala nang asi kukubdongobmou. 17Ura, Yosua biryi Yehuda yala nang asi, “A tingyandarur,” ebmou. Ura, deibdoba yuk-yuk lilinmou uca, Zerah deibdoba kukubdongobmou. Kukubdongobmou ura, Zerah deibdoba, “A tingyandarur,” ebmou. Ba, tingbinmai ura, lilinmou ani, Zabdi mabwe silib kukubdongobmou. 18Kukubdongobmou ura, Zabdi mabwe silib, “A tingyandarur,” ebmou. Ebmou ura, ninyi tentok-tentok tingbanmai ba, lilinmou uca, Yehuda yalanyi Karmi mi si Akhan bisi kukubdongobmou. 19Kukubdongobmou ura, Yosua biryi Akhan bisi ato ebmou, “A mi, nun Nai Er Iya Erebdobnyi urasin dam aryi, ‘Dib dobsiryi, a dikum deibse,’ eboka lak ebdum. Kunusa dongna mem,” ebmou. 20Ebmou ura, Akhan biryi Yosua bisi ato ebmou, “Diba, niryi Er Iya Erebdobnyi nun molonubnyi urasin dam aryi manmalibse ara ato kubse. 21A dalunmoubwe bona asi, Sinear mutuk aryi kikniamnyi ongon aling bol teleb ab, dengna weik perak ikin 2,3 kilogram baryi ab, dengna weik keil emas toukwe tentok ikin 0,6 kilogram baryi ab asi, ‘Ni bobdobtinyi,’ tenebse ura, bobokabsiryi, ni ai dam asi tukwe ukoka deibse. Ba, perak ara buntam nunukoka deibse,” ebmou.

22Ebmou ura, Yosua biryi ninyi ton arukmou ba, Akhan er ai dam bindoka diramnyi uca, diba a bindoka deiamwe asi eibmai. Ba, perak ara tukwe buntam nunukoka deiamwe. 23Bindoka deiamwe asi dobmai ura, Yosua ab sun Israel nang ab asi boyanmai. Boyanmai ura, a bona ara Er Iya Erebdobnyi urasin dam deibmai. 24Deibmai ura, Yosua ab, sun Israel nang ab aryi Zerah mi Akhan ab, bol teleb aling alib ongon aling ab, perak ab, emas toukwe ab, er mabwe nermabwe ab, er bisam lembu ab, keledai ab, kambing ab, domba ab, er keis ol ai ab asi mutuk Akhor bakan bobinmai. 25Bobinmai ura, Yosua biryi ato ebmou, “Kanci nunsi manmalibdongoansoumwe to, arub aryi kanbabyi Er Iya Erebdobnyi biryi kansi mambul dinyi karebkwinkir,” ebmou. Ebmou ura, Israel nang nirya aryi keil borbotok eboka obmaici, a nirya uk dongobmai. 26Dongobmai ura, a dikum ara ilila keil aryi tabokabiryi dukdanin welebmai. Ba, a dukdanin weleamnyi keil ara ukubabyi tuba kubwe. Ukubmai deyok aryi a mutuk si Akhor ara nun uram aryi, “Mambul Don Bakan,” enung. Ato kubmai ura, Er Iya Erebdobnyi yu boamwe dinyi sirya mundu lobmou.

Currently Selected:

Yosua Uram 7: MTG

Highlight

Copy

Compare