Yosua Uram 14

Kanaan mutuk tukwe asi bokdobmai deyok

14:1-5

1-2Sun Israel nang aryi Kanaan mutuk asi sun mutuk kibdobkwamnyi ati ato kuboka bokdobmai. Ara, Er Iya Erebdobnyi biti ninyi dama deirinanyi si imam Eleazar ab, ninyi si Nun er mi Yosua ab, sun yala yuk-yuk du nang kiamnyi nang ab aryi Kanaan mutuk asi bokeibmou. Ara, Iya Erebdobnyi biryi Musa deici asi ebdeiamwe to kuboka ninyi yala toubnibaryi nang ab, yala bitinyi meici kukoka tabakeiamnyi yala nang ab ati, mutuk Yordan kouboka kitingbantam kalimna asi ebmai ba, sun mutuk kibdobmai. 3-4Sun Yusuf deibdoba yala nang ara ninyi yala bitinyi kuramnyi. Ara, sun Manasye yala ninyi ab, Efraim yala ninyi ab kuramnyi. Asi Musa biryi Yordan kouboka yaletam tukwe ara sun Ruben yala ninyi ab, Gad yala ninyi ab, sun Manasye yala dinatam ninyi ab ati karebmou. Bok, sun Lewi yala ninyi ara tukwe ton kum karebmou. Eda, sun kwit yabwe yuk yala nang kankan aryi sun kuronkwamnyi atei-atei ab, sun bisam winironkwamnyi mutuk dikum ab akwe eterebmou. 5Er Iya Erebdobnyi biryi Musa bisi eamwe to kuboka sun Israel ninyi aryi a mutuk asi ato kuboka bokdobmai.

Yosua biryi Kaleb bisi Hebron mutuk nukeibmou deyok

14:6-15

6Ura, sun Israel ninyi nirya ara Gilgal mutuk bindoka keis ol ai doamiryi kuramnyi. A bindoka kuramnyi noutam uki tentok tum ara sun Yehuda yala ninyi nirya aryi Yosua dam binmai. Ura, Kenas yalanyi Yefune mi Kaleb biryi Yosua bisi ato ebmou, “Ni ab kan ab deyok ati Kadesh-Barnea dam aryi Er Iya Erebdobnyi biryi Er wa irmilinanyi Musa deici asi ebdeiansou ara sirya bingdum. 7Ni kam kuna kwalina 40 baryi kibmou talak aryi, Er Iya Erebdobnyi wa irmilinanyi si Musa biryi, ‘A mutuk Kanaan mutuk asi minob meimbirum,’ eboka Kadesh atei Barnea mutuk dam aryi bokdonokanou. Ba, a mutuk meimyananse ani, er dam bindoka dib sirik ni asing eianse to akwe er dam bindoka nukanse. 8Ba, ni kwit yabwe ni ab meimyanmoubwe nang aryi nun atei nang asi bindoka suncok tola-tola ati lukurama kibdeiamnyi ba, sun ilil weik kuramwe. Uca, nira Er Iya Erebdobnyi ni molonanyi biryi ebdeibwe to akwe tuba kununun,” ebmou. 9“Ba, a talak aryi Musa biryi dib en uram aryi ato ebmanou. ‘Kanci ni Nai Er Iya Erebdobnyi biryi ebdeibwe to akwe kunurum ati, kan yan yanibdemwe mutuk tukwe nirya ara kan ab, kan nermabwe mabwe ab mutuk tukwe akwe kibkwande,’ ebmanou. 10Ba, Iya Erebdobnyi biryi Musa bisi a uram ebdeibmou talak aryi kuboka Israel nang aryi yini mutuk dam kwalina 45 baryi talyi yibinkiringnamnyi. Ba, a kwalina nirya ababyi Er Iya Erebdobnyi biryi ni kam kuna Er minob eamwe to kuboka tuba-tuba kalingnururci, arub ara kwalina 85 baryi kwalirbinman. 11Uku talak ababyi Musa arukmanou ba, diryanmase mikib ato akwe tuba kubnou. Akiryi ukubabyi obdandoka, yibinkirikoka kimni mikib ara tuba kubmanir. 12A deyok aryi Er Iya Erebdobnyi biryi ebmou to mutuk konkon asi eterebnurum. Minob talak aryi ato ebmou asi kanbabyi kekebmoumwe, ‘Enak mutuk nang kunung dikum dora ilila atei lika doboka kunung,’ eamwe. Ati, Er Iya Erebdobnyi milibnici ba, Erci minob eanou to kuboka sun minob a kunung ninyi asi yakdonokwan,” ebmou.

13Ato ebmou ura, Yosua biryi Yefune mi Kaleb bisi kisal dakoka mutuk Hebron karebmou. 14Ura, Hebron mutuk ara Kenas deibdobanyi Yefune mi Kaleb mutuk kibmou. Ba, Kaleb bira Israel nang sun Nai Iya Erebdobnyi bisi miliboka iya dib teneramunyi kuramwe deyok aryi a mutuk ara ukubabyi tuba er mutuk kibwe. 15Ani, minob a mutuk kuramnyi ninyi Enak yala ninyi ara nong weik ninyi akwe neramnyi. Bok, Enak yala nang sun abwe Arba bira iya nong weiknyi neboka kuramwe. A deyok aryi Hebron mutuk si minob eramnyi si ara Kiryat-Arba eramnyi. Ato kuboka sun Israel ninyi ordana kum uca, Kanaan mutuk mangkau asa akwe kuramnyi.

Currently Selected:

Yosua Uram 14: MTG

Highlight

Copy

Compare