Habakuk Uram 3
3
Er Imtamnyi uram ermurunanyi si Habakuk biryi Er Imtamnyi bisi uram sisikoka molobmou uram deyok
3:1-19
1Nabi Habakuk biryi Er Imtamnyi bisi ato eboka uram sisikoka molobmou. A molona ara, “Ni boukwe se,” eboka urumna enmangiryi semnaming ato kuboka molobmou molona.
2Nai Iya Erebdobnyi, “Kanda ilil tenen dinyi kiknirumnyi kurum.”
Ninyi ilinto aryi Kanci minob kubde yangaramoumwe dinyi asi nukde banung ba, ni sirya kekebmanci, bikmakin.
Uca, Kanda Erebdobnyi biryi wa iramoumwe dinyi ati ni ilil kunurur.
Ati, Nai, Kanci minob ura ilil tenen dinyi ukuramoumwe to ukuryok talak ababyi tubto ukubdum. Ara, nun ukuryok kunmab talak ababyi Kanci ilil tenen dinyi kiknibminci, lak kibdeibdum.
Nai, Kan kanya nunsi yu boansiminyi ababyi, Kanci nunsi boukwe kibdobsurum.
3Niryi kunumna deici aryi asing dinmonwe uca, nun Nai Imtamnyi bira tingyandoka mutuk Teman aryi anaboka yanganmo asi eibmonwe.
Er ilil weik kuboka Ererdeirinanyi bira Paran mutuk dubtam aryi yuryanganmo asi eibmonwe. Sela
Ba, Er mikib ab milil ab ara imtam tukwetam nirya langdibmou.
Ura, sun im dangna tukwe dangna nang nirya aryi Er si weik enmang asi eibmonwe.
4Er Imtamnyi mikib ab milil ab ara kiting sinarya ato kubmou.
Belekuna kiting anarande to, Er Imtamnyi mikib ab milil ab anabmarei.
Er taruk mikib aryi kuboka Erci bebe lingdeirirur to dinyi dobkwetebmou.
5Er Imtamnyi biryi, “Tukwetam nang asi wenebkwan,” tenen dobkwetebmou ba, ninyi youn kurdeirin dinyi Er urasintam menekoka yanganmou.
Ba, Er Imtamnyi bisirbanmou ura, ninyi dimdeirin dinyi ara Er dongtam kuboka yanganmou.
6Ura, Er Imtamnyi bira yibanmou ani, tiklobmou ba, tukwe nirya lulukmou.
Ba, Erci dina-dina dirkankaningmou ba, sun im dangna tukwe dangna nang nirya lukdanmai.
A talak ara minob talak aryi sasiboka bukamwe mutuk ababyi dalubde sangmou,
Kwalina o kwali-o kwali kibde yangaramnyi iya bukamwe mutuk konkon ababyi daluboka sakdanmou.
Er Imtamnyi bira minob talak aryi kuboka ilil weik dinyi kiknirur ani, aminda ababyi iya kiknibkwande.
7Kunumna deici aryi tuba dinmonwe ba, sun Kusyan mutuk nang ababyi ilil mitik kum donmai asi asing eibman.
Tonda, sun Midian mutuk nang ababyi ara sirim weik talenmou.
8Nai Iya Erebdobnyi, Kanda mikib kuboka yuryanganmoumwe asi asing eibman ati, unatoa ati yuryanganmoumwe do?
Kanda yu weik kanya borandimnyi biryi sun weik me yibarura katum dam kunung nang ati yu kanya borandim do?
Tonda, Kanci sun weik me kwan dingirande ato kun nang ara Kanci deibmoumwe wilimna asi bisirbaraming nang ati tin kanya borandim do?
Kan yuryanganmoumwe ara mikib kuboka Kan ordana nang asi muna kibdongobkwamoumci, bitonyi yuryanganmoumwe.
Ara, bisam kuda deici buraming ordana nang aryi mikib weik kuboka sun ordana nang asi muna kimdongoraming to, Kanbabyi neiktoto mikib weik kuboka Kan ordana nang asi obminikmoumwe.
Tonda, kuda aryi lirtalen ai bun nang ara mar iboka ninyi ilinto oboka muna kimdongoraming to, Kanbabyi neiktoto mikib kuboka Kan ordana nang asi muna kibdongobmoumwe.
9Kanda Imtamnyi yuryanganmoumwe ba, Kanci Kan yin sirya doboka deibmoumci, Kan mar ara sirya yin tabwe kumkum dibtaleboka ibokmoumwe. Sela
Ba, tukwetam ara Kan ya aryi anglorongnamoumwe ba, weik me yibardarur me yuk-yuk ara anabkaboka yibarande.
10Tonda, mutuk konkon nirya aryi Kansi asing eibmai ura, sun sirim weik talebmouci, lulungmou.
Ura, imtam aryi kuboka mo weik sangmou uca, obde yangan me ereboka onmou.
Ara, obde yangan me un weik erebmouci, me dala mutuk ab mutuk kon ababyi nirya oyibmou.
11Kanda Imtamnyi biryi, “Ninyi wenebkwan,” tenen yuryangamoumwe ba, Kanci Kan mar bebe ato dinyi ilinto doramoumwe
Tonda, Kanci, “Ninyi obkwan,” tenen Kan te balang ninyi on dinyi doubmoumwe.
A talak aryi kiting ab wala ab ara imtam bis yibanmarei cok, lukdandoka sun kurandei tam yuk-yuk asi tiklobmarei.
12Ara, Kanda Imtamnyi bira yu ilinto wekmakou ba, tukwetam yibarkiringmoumwe.
Kan yu aryi im dangna tukwe dangna nang nirya yan yanirsitaramoumwe asi asing eibmonwe.
13Kanci anaboka yuryanganmoumwe ara, “Ni dam kun nang asi lebdeibkwan,” tenen yuryanmoumwe.
Tonda, Kanci, “Niryi wiboka tikeianse nang asi lebdeibkwan,” tenen yuryanganmoumwe.
Ba, Kanci sun yu nang kalingnamwe weik sienyi bisi diboka obmoumwe.
Kanci Er ongon aling kwiribkabokmoumwe uca, er ongon aling teleb aling ara tuba kum ongoramwe. Sela
14Nai Imtamnyi, sun yu nang mar menekoka boyangan sienyi biryi nunti, “Obkwan,” tenen yanganmou ba, Kanci er mining te balang dobtaleboka anyi bisi obmoumwe.
Ara, nun mar ordana nang aryi mikib ting eboka luna mumuboka iyanganmasei bok, Kanci nunsi lebdeibsoumwe.
Ati, Kanci sun mar menekoka boyangan sienyi dam bindoka er mining te balang asi dobtalebmoumwe ura, er kisok lukeiboka obmoumwe.
15Kanda Imtamnyi biryi mikib weik kuboka bisam kuda deici bukoka yin doun nang sienyi bitonyi kuboka yuryanumuryi, Kan ordana nang asi muna kibdongobmoumwe.
Ara, weik me kwan deici aryi yibindoka yan yanisitamoumwe.
Yanisitamoumwe uca, me kwan me kwatib-kwatib enmou bok, Kanci nun ordana nang asi obmoumwe.
16Ba, Kanda Imtamnyi yibanmaminyi lilim asi kekebne ba, ni kanya ara sirim taleranou.
Tonda, ni si bama ara birbir eboka darum-darum eranou.
Ba, ni yok kum dandoka tub dem tangloranou.
Ara, ilil weik deyok aryi, ni yan taruk nong nirya ara sirim weik taleranou.
Nira ilil weik kanya bonun cok, niryi lamabdongoboka Er Imtamnyi boyankwande wenen uki tum asi dibde bukwan.
Ara, “Er Imtamnyi biryi nun iyangaransing nang Kasdim nang asi weik wenen dinyi karebkwande,” tenen dibde bukwan.
17-18Co keta li doanci bok, du moun dinyi kum mouranci ababyi,
co anggur du ton kum mouransici ababyi,
tonda, co zaitun ara du mundu loboka mouna kum kuransici ababyi,
nira Er Iya Erebdobnyi biti kanya kilkil asa aryi mot semkwan.
Wa in dam tukwe aryi yina-yina ton anardeirina kum kuransici ababyi nira Er Iya Erebdobnyi biti kanya kilkil asa aryi mot semkwan.
Tonda, nun winin bisam kambing domba ai dongon ai aryi yangkweteramingnyi ababyi,
tonda, bisam sapi ab dongordeirin ai aryi dirlalaramingnyi ababyi,
nira Er Iya Erebdobnyi biti kanya kilkil asa aryi mot semkwan.
Ara, Er Imtamnyi bira nun lemsinanyi bisi kanya karyi asa aryi mot seboka kironkwan.
19Ni Nai Imtamnyi, Iya Erebdobnyi bira ni mikib kimdeirininanyi kurur.
Ni yan mitang kubmanici ababyi Erci bisam si rusa mikib ting eryibarande yan ato kurdeiriranir.
Nira mutuk kon dub ai sangkiringmanyi ababyi, Erci nisi mikib kareranir ba, ni mikib kuboka yibanun.
A mot ara a kunum sirya sebman. A mot ara gitar ato dinyi si kecapi oboka mot semna deyoknyi biti semdeiriraming mot asi a sirya sebman.
Currently Selected:
Habakuk Uram 3: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
