Galatia Uram 4
4
“Sun dib tenen nang ara Musa arungdeirin uram aryi tabwe demna nang tuba kum kunung,” ebmou uram
4:1-7
1Ni kwit yabwe, niryi kiklina uram tubto kiklirbinkwinsin. Mabwe nermabwe deiraming nang ara er nai biryi boranci bona talena asi unuboka dobdobkwandiryok a mi ara mitik tuba kuranci ura, bona bon kumnyi bitonyi kurande. Ato kurande mi ara, nena kum kuanci obura, ninyi wa irmilinanyi bitonyi kurandiryi, bona bon talena ton kum bororande. 2Eda, bona kalingmilin nang aryi er bona asi tiya kalingnamingnyi ani, er nai biryi minob ebdeianci uki tum berekmaci ura, er bona dobdobkwandinyi bira er bona asi dobdobmaci ura, iya kalingdorande. 3Ura, nunbabyi ato kuboka neiktoto kunub. Nunda dib tenen nang ara mitik mabwe ato kuramoubwe ba, nunda minob nun abwe yabwe aryi, “Ato-ato kubdarur,” eramnyi uram asi miliramaburyi, wa irmilin nang ab tabwe deansei nang ab ato kuramoubwe. 4Ani, nun Nai Imtamnyi biryi minob ebdeiamwe uki tum berekmou ura, nun Nai biryi Er Mi asi nunti bokwetebmasou. Ara, nun Du Yesus bira diba ati ninyi kibdanmouci, Musa Uram aryi tabwe deamunyi bitonyi kibkwamwe ati, er kwin biryi Ersi deibmou. 5Ara, nunda Musa Uram aryi tabwe deansou nang asi lebkwamwe ati, nunda Musa Uram amwetam kun nang tuba kum kubkwamoubwe ati, nun Du Yesus biryi nunsi lebdeibsou. Tonda, nunda Er Imtamnyi mabwe nermabwe kiboka Er Imtamnyi kisal dangsina langdeiboka dobdobkwamoubwe ati, nun Du Yesus bira Musa aryi tabwe deamunyi bitonyi kibmou. 6Ba, sun Galatia nang ababyi Er Imtamnyi mabwe nermabwe kurandum deyok aryi, nun Nai Imtamnyi biryi Er Mi Er Kanya Roh Kudus asi sun kanya dam karebmasou. Sirya karebmasou ura, Roh Kudus ara nun kanya dam kusururnyi biryi uram doboka Er Imtamnyi bisi, “Abba, nun Nai,” ermururur. 7A deyok aryi, sunda ikin wa bon nang ato tuba kum kundarur. Tonda, tabwe deansei nang ato tuba kum kundarur. Eda, nunda Er Imtamnyi mabwe nermabwe sirya kibdeibsou ati, sunda nun Nai biryi ebdeibsou bona dobdobkwaming nang ato kibdandobdau. Ara, nun Nai Imtamnyi biryi nunsi ebdeibsou ati ato ebman.
Paulus biryi sun Galatia nang asi wenebmou uram
4:8-20
8Minob ura sun Galatia nang ara nun Nai Imtamnyi bisi kum bingnangdauci, sunci sun kwemdeina asi molorandau. A kwemdeina ara talyi dinyi asi molorandau ba, sun kanya yuk-yuk asi tabwe demnansei ati ebman. 9Ato kuransou bok, ukuryok ara sunci nun Nai Imtamnyi bisi diboka bingnandum ba, nun Nai Imtamnyi biryi sun yuk-yuk asi diboka bingsurur. Bok, sunda unato ati nun Nai Imtamnyi bisi taklobmarumci, sun minob tukwetam nang aryi, “Ato-ato kubdarur,” en uram asi tubto kunurandum do? Minob tukwetam nang uram ara mikib kum dinyi ton talyi dinyi akwe kunung ara, sun kum bingdarur do? Galatia nang se! Sunci, “Minob tukwetam nang uram aryi nunsi tabwe tubto demsina teleb,” tenerandum do? 10Sun Galatia nang ara, “Nun abwe yabwe aryi minob eteren dinyi kunubtibyi,” tenen kwalina yuk-yuk asi tamuboka kwalirandum. Ara, sun abwe yabwe aryi sunsi takurdeirisiransei to, sunci uki yuk-yuk asi tamuboka dibde kwalindarur. Ara, wala yuk-yuk asi dibde kwalindarur, li yuk-yuk asi dibde kwalindarur, tonda, tahun yuk-yuk asi dibde kwalindarur. 11A deyok aryi, ni Paulus biryi sunti ato tenesunun. “Teleb Uram asi busul kuboka etereranse bok, talyi etereranse do?” tenesunun uca, sunti ni kanya ara mambul kuranir.
12Ati, ni kwit yabwe e, ni ebdarabkwinsin uram asi diboka kekenindarur. Sunci tamuboka ni kunun to miliboka kunubdarur. Nira minob Teleb Uram eterebmasise ba, Yahudi yala nang kuransiryi, nibabyi sunsi miliboka Musa Uram aryi tabwe deamunyi bitonyi kimdanse. Ati, ukuryok ara sunbabyi nisi milibnumunci, Musa Uram aryi tabwe tuba desin dinyi nirya ara taklobdarur ati ebman. Ati, sunci, “Musa Uram deici aryi lebdandobkwayeb,” tenena asi taklobdarur. Niryi ato ebmasin bok, sunci nisi malyito kum kurdeiriranindau ati ebman. 13Minob ura yuma kobdob ara niryi deyok kouboka sunsi Teleb Uram lak eterebkalibmasise ara ni nong u yiranou bok, niryi Teleb Uram eterebmasise. A dinyi ara sun bingnindarur. 14Ni nong ara diba ati youn yiranou bok, niryi sunsi Teleb Uram eterebmasise. Ato kuboka Teleb Uram asi eterebmasise ba, sunci nisi ina kum ngilikmanindau. Eda, sun Galatia nang aryi ni uram asi diboka dobdobmandau. Ara, nun Nai Imtamnyi biryi bongkweterur nang Er uram eryuryangananyi bitonyi Teleb Uram asi dobdobmandau. Tonda, sunci niti, “Nun Du Kristus Yesus bitonyi kuboka dib en uram eterebmasir,” tenen Teleb Uram asi diboka dobdobmandau to sunci nibabyi neiktoto, “Nai,” tenen diboka dobdobmanindau. 15Ura, minob ura sunda kilkil kanya boboka Teleb Uram dobdobmandau asi, unato ati, sun kanya danguboka Teleb Uram ati mambul kuransir ba, kilkil kuransou dinyi ara deiblobmarum do? Minob ura sunci ni uram asi diboka dobdobmandau asi sunci teneibdendarur. Ati, niryi, “Sun asing kwebtaleboka nisi karebnindarur,” eboka molobmasitinyi ababyi, sunci ato en uram ababyi kunuboka sun asing kwebdandaute. Sunci ni uram nirya asi diboka dobdobmandau ati ato ebman. 16Ba, ukuryok ara niryi sunsi tamuboka dib en uram asi lak eteresunun ati, sunda unato ati ni Paulus biti, “Nun bimsa yarisinanyi,” teneranurum do?
17Sun kankan asi kuraming tola uram eteren nang ara busul weik kuramingiryok, “Nun uram kekebting,” teneransing ati ebman. A nang aryi sunti, “Teleb kubdeibtibyi,” tenen kum kuransing. A nang aryi tenen kanya ara, “Paulus uram kekebingnyei,” tenebda kuraming. Ara, “Sunda Galatia nang aryi busul kuboka tola uram asi talebting,” tenen a nang aryi niti bisik sengnaning. 18Busul kun dinyi ara teleb dinyi kurur. Ara, “Teleb dinyi asi ukubkwayeb,” tenen busul kimdana ati ebman. Bok, tentok-tentok akwe busul kimdana ara malyito kurur. Tuba-tuba busul kimdana ara teleb. Ati, ni sun ab tonkwa kubibyi atikwe kibdankwandarur kuma. Eda, yuk-yuk kuramibyi talak ababyi sunci, “Teleb dinyi ukubkwayeb,” tenen busul kimdana teleb. 19Ni kwit yabwe boukwe kusunun nang. Sunda ni mabwe nermabwe ato kundarur. Niryi sunti, “Nun Du Kristus bisi diboka milibkwanting,” tenen mambul weik bosunun. Mi deibkwanci ner aryi mi deyok yinmaci ba, mambul weik dorande to, nibabyi neiktoto sunti mambul weik bosunun. Ara, “Teleb Uram eterena biriman aryi nun Du Yesus Kristus sun kanya dam kubci ba, diboka du moubte,” tenen ni kanya mambul weik kuranir. 20Ni kwit yabwe Galatia nang se! “Ni sun ab tonkwa ebdatibiryi, niryi uram danguboka namin uram akwe ebsitinyi,” tenesunun uca, ni kanya ara sunti kankana kuranir. Ati, niryi sunti, “Nun Du bisi dib tenena asi dongtam kibibiryi, Musa takubdeibmasou uram asi tuba kunurderaming do?” tenena aryi ni kanya ara sunti kankana kuranir.
Nun abwe Abraham nerabwe bitinyi si Hagar ab Sara ab aryi kiklibdeibmasirei uram
4:21-31
21Ura, sunda, “Musa Uram aryi tabwe demna nang kurantibyi,” tenerandumci, sunci Musa Uram deyok asi diboka kekerorandum do? 22Musa Uram umbura aryi ato kerek sekmasou. “Nun abwe Abraham bira mabwe bitinyi deibmou. Er mi dunyi bira nun abwe ab er ner tabangdongon ner si Hagar ab aryi deibmarei. Ba, er weitnyi bira nun abwe ab er ner kobdoba si Sara ab aryi deibmarei. Hagar bira ikin wa bon ner kuramwe bok, Sara bira ikin wa bon ner kum kuramwe. 23Nun abwe ab ikin wa bon ner ab aryi deibmarei mi ara tukwetam nang aryi mi deiriraming to mi deibmarei. A mi ara er kwin bira wise danana kum bok, mi deibmou. Ara, Hagar biryi er mi Ismael deibmou ati ebman. Ba, nun abwe ab ikin wa bon kum ner, er ner kobdoba ab aryi deibmarei mi ara tukwetam nang aryi deiriraming to aryi kum deibmarei. Eda, nun Nai Imtamnyi biryi Er minob ebdeiamwe uram asi kunubdeibmou ura, ‘Nai e,’ tenen dinyi kiknibmou uca, iya wise ner si Sara biryi er mi Ishak deibmou.”
24A nukmasin uram ara kiklina uram asi nukmasin. A nerabwe bitinyi ara yuk-yuk tenen kanya boraming nang ato kurandei. Nun abwe ner si Hagar bira ikin wa bon ner kuramwe ati, ikin wa bon nang akwe deiriramwe ati ebman. Hagar biryi deibmou nang ara Musa Uram kunurderaming nang kiklirur. A nang ara mutuk kon Sinai dam asi Musa Uram kekebmai nang ato kuramingiryi, Musa Uram diboka taleraming. 25Hagar bira Arab mutuk kurur mutuk kon si Sinai kiklirur ati ebman. Sinai mutuk kon dam asi Musa biryi, “Ukubdarur-Ukuna mem,” eboka takubdeibsou. A deyok aryi, ukuryok sun Yerusalem atei kuraming nang ara Hagar er mabwe nermabwe ato kunung. Ati, sunci, “Musa takubdeibsou uram kunubdetibyi,” teneraming ati, tabwe deamnyi nang ikin wa bon nang ato kunung. 26Tukwetam Yerusalem atei nang ara Hagar milin nang ato kuraming nang ati ato ebman. Ba, imtam Yerusalem atei nang ara ikin wa bona kum ner milin nang ato kunung. A nang ara nun Nai Imtamnyi biryi sirya lebdeibsou ati ebman. Nunda nun Du Yesus bisi dib tenen nang ara imtam Yerusalem atei mabwe nermabwe kunub. Imtam Yerusalem atei ara kikliboka nun kwin bito kusurur. 27A dinyi ara Er Imtamnyi Uram umbura kerek sekmou to kurur. Er Imtamnyi Uram ermuruna kerek sekmounyi biryi nun dib tenen nang ati ato eboka kerek sekdeibmasou,
“Mi dein kum ner se, kekebnurum! Kan kanya kilkil kuna teleb.
Kanda mi kum deibmamuryok, mabwe nermabwe ilinto asi dobdobkwandim.
Mi deyok kum yibkou ner o! Kanci kilkil kuboka uram weik dobdum.
Kanci, ‘Ni akenyi taklobmanir,’ tenen ner ato yuk kurandim bok, kanci aminda aryi mabwe yaldakoka mabwe nermabwe yubwa-yubwa ilinto asi deibkwandim.
Kan ka ner ninyi doamwe ner ara mabwe nermabwe ilinto deibmou bok, Er Imtamnyi biryi kansi karebkici uca, kanda a ner asi bisibkaboka mabwe nermabwe nukmanto kum asi dobdobkwandim.” (Yesaya 54:1)
Er Imtamnyi Uram ermuruna kerek sekmounyi biryi ato eboka nun dib tenen nang ati kerek sekdeibmasou.
28Ba, ni kwit yabwe Galatia atei kurandum dib tenen nang, sunda nun abwe Abraham er mabwe nermabwe kurandum. Nun Nai Imtamnyi biryi nun abwe Abraham bisi, “Karebkwankin,” ebdeibmou uca, nun abwe Abraham ab nun tat Sara ab aryi sun mi Ishak deibmarei to kuboka sunbabyi neiktoto kurandum ati ebman. Ara, nun Nai Imtamnyi biryi ebdeibmou to, Erci sunbabyi nun abwe Abraham er mabwe nermabwe kibdeibsou. 29Ato kubdeibsou bok, nun abwe Abraham er mabwe bitinyi nebmarei ura, tonkwa kum kurandei. Eda, ninyi kanya tenenung to aryi deibmunyi mi aryi Er Imtamnyi Kanya mikib aryi deibmounyi bisi domkiringnamwe. Ara, Hagar mi Ismael biryi Sara mi Ishak bisi, “Obtinyi,” tenen domkiringnamwe. Ato kuboka ukuryok ababyi neiktoto kusunung. Ara, sun dib tenena kum nang aryi nun dib tenen nang asi, “Obtibyi,” tenen nunsi domkiringsunung ati ebman. 30Bok, Er Imtamnyi Uram umbura aryi ato eboka eteresurur,
“Er Imtamnyi biryi Abraham bisi ato ebmou,
‘Ikin wa bon ner Hagar ab er mi ab ara tonkwa yakdonokdum.
Ismael bira ikin wa bon ner mi kurur ati, erci Er Imtamnyi biryi Ishak bisi karebkwande kisal dangna asi kum dobdobkwande.
A deyok aryi, kanci a mi ab er kwin ab ara yakdonokdum.
Ba, Ishak bira ikin wa bon kum ner mi kurur ati, erci Er Imtamnyi biryi kisal dangna dobdobkwande,’” eboka eteresurur. (Kejadian 21:10)
31A deyok aryi, ni kwit yabwe, nun dib tenen nang ara ikin wa bon ner si Hagar mabwe nermabwe ato kum kunub. Eda, nunda ikin wa bon kum ner si Sara mabwe nermabwe ato kunub. Ati, nunda nun Du Yesus bisi dib tenenubci, Er Imtamnyi biryi kisal dangna doronub ati ato ebman.
Currently Selected:
Galatia Uram 4: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
