Galatia Uram 3
3
“Er Imtamnyi biryi nunsi dororansir ara dib tenena deici aryi dororansir,” eboka eterebmou uram
3:1-14
1Galatia nang se! Sunda iya ati luba talebdob nang ninyi kanya ton borondarur do kum do? Teleb Uram talena asi taklobmarum darib? Unanyi biryi sunsi bowanikminikmasir do? Minob kurandau talak asi, sunci kanya teneibdendarur. A talak ara nunci sunsi Teleb Uram etereransoubwe. Ara, “Nun Du Yesus Kristus bisi co lase deici bing dakmai ba, dibmou,” tenen liliboka etereransoubwe. Ati, nunci, “Nun Du bira ato-ato kuboka dibmou,” tenen liliboka etereransoubwe ba, sun Galatia nang aryi nun Du Yesus dibmou deyok asi asing eirin nang ato kubmandau. 2Ati, niryi sunsi asirdena ton asibdenkwinsin. Minob ura nun Nai Imtamnyi biryi sunsi Er Kanya Roh Kudus karebmasou ara unato dinyi deici aryi karebmasou do? Sun Galatia nang ara Musa Uram asi kunurandau deici aryi nun Nai biryi Er Kanya asi sun kanya dam karebmasou do? Ato tenen kum. Eda, sunci nun Du Yesus bisi dib tenebmandau deici aryi Erci Er Kanya Roh Kudus karebmasou do? Ara, diba. Sunci nun Du Yesus uram Teleb Uram kekebmandau deici aryi dib tenebmandau biriman aryi nun Nai biryi sunsi Er Kanya Roh Kudus karebmasou ati ebman. 3Sunda ninyi kanya diboka kum borandarur nang se! Sunda unatoa ati yuma ara nun Du Yesus bisi dib tenerandau ani, ukuryok ara dib tenen dinyi ara taklobmarum do? “Musa Uram kununa deici aryi lebdandobkwayeb,” tenerandum ati ato ebman. Ati, sunci deyok kouboka Er Imtamnyi Kanya Roh Kudus asi dobdobmandau ani, sirya kobdob ara wanikminikoka ninyi talyi tenen dinyi akwe kunurandum darib? Unato ati sunci ato kurandum do? 4Minob ura Teleb Uram dobdobmandau ati, ninyi aryi sunti, “Kristus milin nang nun li,” tenen sunsi mambul weik kurdeiriransei. Bok, sunci, “Mambul weik kibdeibsingnyi ababyi, nunci nun Du Yesus bisi milinub,” tenerandau. Ani, ukuryok ara sunda ninyi kanya aryi talyi tenen dinyi kurandum. Ati, niryi sunsi asibdenkwinsin ara, “Minob mambul weik kimdeirisiransei dinyi ara talyi ati dobdobmandau do?” Ato tenen kum. 5Nun Nai Imtamnyi biryi sunsi unato deyok aryi, Er Kanya Roh Kudus asi karesurur do? Tonda, unato ati, Erci mikib kuboka sun kankan aryi, “Nai e,” tenen dinyi kiknisurur do? Sunci Musa ebdeibsou uram asi kunurandum ati, nun Nai biryi sunsi a dinyi nirya karesurur darib? Ato tenen kum. Eda, sunci nun Du Yesus uram Teleb Uram kekeboka dib tenerandau deyok aryi, nun Nai biryi a dinyi nirya karesurur.
6Minob ura nun abwe Abraham bira neiktoto kuramwe. Nun abwe bira Er Imtamnyi bisi dib teneramwe ati, nun Nai Imtamnyi biryi ersi liliboka, “Ni dam kunanyi kibdeibkwan,” teneramwe.#Kej. 15:6 7Sunci a dinyi bikdarur. Sun dib tenen nang ara nun abwe Abraham er mabwe nermabwe kobdoba ato kunung ati ebman. 8Minob Er Imtamnyi Uram ermuruna kerek sengnanyi biryi nun abwe Abraham biti ato eboka kerek sekmou. “Er Imtamnyi biryi Abraham bisi ato ebmou, ‘Kanda nisi dib teneranirim ati, Nira Imtamnyi biryi kansi kisal dakiniryi, sun im dangna tukwe dangna kuraming yala nang nirya asi kan ab tonkwa kisal dakwansin,’ ebmou.” Ara, “Sun yuk yala nang ababyi dib tenebingnyi ura, nun Nai Imtamnyi biryi sunbabyi kisal dakwande,” tenen erci ato eboka kerek sekmou. Tonda, “Er Imtamnyi biryi sun Yahudi yala kuma nang asi, ‘Ni dam kun nang,’ teneboka dobdobkwande,” tenen minob bikmou ati, a kerek sekmounyi biryi ato eboka minob kerek sekeibmou.#Kej. 12:3; 18:18 9Ati, nun Nai Imtamnyi biryi nun abwe Abraham dib tenebmounyi bisi kisal dakmou to, Erci sun dib tenen nang yuk nang ababyi nun abwe ab tonkwa kisal dangsurur.
10Ba, sun, “Musa Uram kununa deici aryi lebdandobtibyi,” tenen nang ati nun Nai Imtamnyi biryi, “Iya wenebkwan,” erur. A dinyi ara, Er Imtamnyi Uram ermuruna kerek sekmounyi biryi kerek sekmou to, kunurur. Ati, erci ato eboka kerek sekeibmou,
“Unanyi-unaner aryi Musa Uram aryi kerek sekeibmou to tuba-tuba kum kunubingnyi ura, Er Imtamnyi biryi a nang ati, ‘Iya wenebkwan,’ erur,” eboka kerek sekeibmou. (Ulangan 27:26)
11Ninyi tentok ababyi Musa Uram kununa biriman aryi erdamnyi kum lebdandobte. Nun Nai Imtamnyi bira a nang ati liliboka, “Ni dam kun nang kibdeibkwan,” tenen kum dobdobkwande. Eda, Er Imtamnyi Uram ermuruna kerek sekmounyi biryi kerek sekmou to dib en uram umbura kurur. Erci sekeibmou to ara, “Er Imtamnyi biryi, ‘Ni dam kunanyi,’ tenen lemna dinyi karebkwande ner sal ara dib tenena deici aryi dobdobkwaming,” eboka kerek sekeibmou.#Hab. 2:4 12Bok, sun, “Musa Uram deib aryi nun damnyi lebdandobkwayeb,” tenen nang ara nun Du Yesus bisi dib kum teneraming. Eda, “Musa Uram kunubibyi uca, kam kun dinyi dobdobkwayeb,” tenena deici aryi Musa Uram kunurderaming. Ara, Musa Uram umbura aryi kerek sekeiamwe to ara,
“Unanyi biryi a uram asi kunubingnyi uca, kam kun dinyi dobdobkwaming,” eboka kerek sekeiamwe.#Im. 18:5
13Nun Du Kristus biryi nunsi lebdeibmasou ati, nunci, “Musa Uram kununa deici aryi lebdandobkwayeb,” kum tenenub. Eda, nun Du bisi dib tenena biriman aryi lemna dinyi doronub. Nun malyi kun nang tuba kunub ati, Musa Uram diboka kum kununub ati, nunda iya wenebmasin to nang kunub. Iya wenebmasin to nang kuramoubwe bok, nun Du Yesus Kristus biryi nunsi wenebmasin to dinyi nirya asi bobmouci, nunsi lebdeibmasou. Nun Du biryi nunsi lebdeibkwansou ati, nun Nai Imtamnyi biryi Ersi nun wenebmasin to dinyi karebmou. Er Imtamnyi Uram umbura aryi ato eboka eteresurur.
“Ninyi aryi co lase deici laboka bing dakmangnyi nang ara Er Imtamnyi biryi, ‘Niryi kikibto wenebman nang kunung,’ tenerur.” (Ulangan 21:23)
Ati, ninyi aryi nun Du Yesus bisi co lase deici laboka bing dakmai ba, nun Du Yesus bira nun malyi kun nang wenebmasin dinyi bobmouci, Er Imtamnyi biryi diba ati wenebmounyi kibdanmou. Er Imtamnyi biryi wenebmounyi kibdanmouci, nun Du Yesus biryi nunsi lebdeibmasou ati ebman. 14Ura, sun Yahudi yala kuma nang ababyi nun abwe Abraham ab tonkwa kisal dangna dinyi dobdobkwamnyi ati, nun Du Yesus Kristus diba ati wenebmounyi kibdanmou uca, Erci nunsi lebdeibmasou. Ara, nun Nai Imtamnyi biryi minob ebdeiansou to, nunci dib tenena biriman aryi Er Imtamnyi Kanya Roh Kudus asi dobdobkwamoubwe ati, nun Du Yesus biryi nunda dib tenen nang asi lebdeibmasou.
“Musa Uram yuk kurur ba, Er Imtamnyi biryi, ‘Kisal dakwansin,’ ebdeibmasou uram yuk kurur,” ebmou uram
3:15-20
15Ni kwit yabwe, niryi nun kubde kuramib to aryi kiklina uram ton eboka kiklirbinkwinsin. Nunda tukwetam nang ara dina kum kubmabibiryok, nun bona yuk-yuk ati, “Una mi una nebnyi asi karebkwan do?” tenen kanya teneinub. Kanya teneinmabyi ani, “Ei, ni boboka talenun bona yuk-yuk ara ato-ato kuboka bokeibkwan,” tenebibyi ura, lak eramib dinyi ara yuk nang aryi nun uram asi dongtam kibdeibting do? Ato ara ukubman kum kubting. Tonda, yuk nang aryi yuk uram ebtabakwamating do? Ato kum ebting. Eda, nunci ebdeiamibiryi, kareamibyi to akwe nun mabwe nermabwe aryi bona talernururoraming. Ato kunub to asi Er Imtamnyi biryi nunsi ebdeibsou dinyi ara neiktoto kurur. Ninyi aryi Er Imtamnyi biryi erdeirisin uram asi dongtam kimdeirina ara ukubman kum. Tonda, ninyi aryi a uram asi ebtabakdongobman kum. 16Ura, nun Nai Imtamnyi biryi, “Kisal dakwan,” erdeiriramwe uram yuk-yuk asi Erci nun abwe Abraham ab er yalanyi ab asi erdeiriramwe. Ato erdeiriramwe ara, Erci, “Abraham yala nang asi kisal dakwan,” kum ebmou. Eda, Erci, “Er Abraham yalanyi bisi kisal dakwan,” ebmou. Ara, nun Nai biryi ninyi ilinto ati kum ebdeibmou. Eda, Erci ninyi tentok ati ebdeibmou. Nun Du Kristus bira Abraham yalanyi kurur ati, Erci nun Du Yesus biti, “Kisal dakwan,” ebdeibmou.#Kej. 12:7 17Ni kwit yabwe, sunci ni eterebkwinsin uram ara diboka bikdobdarur. Nun Nai Imtamnyi biryi, “Kisal dakwan,” eboka minob ebdeiamwe talak ara kwalina empat ratus tiga puluh baryi kuramnyi bok, Musa biryi, “Ukubdarur-Ukuna mem,” eboka takubdeibsou uram ara aminda aryi takubdeibsou. Ati, Musa biryi takubdeibsou uram aryi nun Nai Imtamnyi biryi minob, “Kisal dakwan,” ebdeiansou uram ara iya kurur uram asi dongtam kum kibdeibmou. 18Nun Nai Imtamnyi biryi kisal dangsina ara Musa Uram kununa deici aryi kum dobdobtibyi. Eda, a kisal dangsin dinyi ara, nun Nai biryi ebdeibsou uram deici aryok doronub. Musa Uram kununa deici aryi kisal dangna dinyi dororantibyi ura, nunci a kisal dangna ara Er Imtamnyi biryi ebdeibsou uram deici aryi kum dororantibyi. Bok, nun Nai Imtamnyi biryi nun abwe Abraham bisi teleb kubdeiboka, “Kisal dakwankin,” erdeiriramwe uram deici aryi kisal dangnamwe.
19Ato kuramwe ura, Musa biryi takubdeibsou uram kununa deici aryi nun Nai Imtamnyi biryi nunsi kisal kum dangsurur ati, Musa Uram ara unato ati Erci takubdeibsou do? Ninyi malyi kun dinyi lak kibdeiboka lika dobdeibkwansou ati, nun Nai Imtamnyi biryi a uram asi ebtabakoka takubdeibmasou. Ara, nun abwe Abraham yalanyi si Yesus Kristus kum yanmou bok, nun Nai Imtamnyi biryi Musa takubdeibmasou uram nunsi karebmasou. Musa takubdeibmasou uram ara nun Nai Imtamnyi biryi anmalokoka kum karebmasou. Eda, sun Er Imtamnyi Uram eryuryangan nang aryi Musa bisi eterebkarebmai ba, Musa biryi a uram lak etereboka sun Israel yala nang asi takubdeibmou. 20Musa bisi liknibdongoboka takubdeibmasou uram ara Er Imtamnyi Uram eryuryangan nang aryi Er Imtamnyi kan ninyi kan noutam kuramunyi si Musa biriman aryi takubdeibmasou. Bok, Er Imtamnyi biryi, “Kisal dakwan,” erdeirisin uram ara nun Nai biryi nunsi anmalakoka karebmasou. Ara, nun Nai Imtamnyi bira Allah tentoknyi kurur aryi, Erci Er erdeirisin uram asi nunti anmalakoka karebmasou.
“Sunda Er Imtamnyi mabwe nermabwe kundarur,” ebmou uram
3:21-29
21Ato kusurur ura, Musa takubdeibmasou uram ara Er Imtamnyi biryi kisal dangsina uram yuk-yuk asi dongtam kibwe do? Ato tenen kum. Musa takubdeibmasou uram ara ninyi kam kum kurdeirisurur ati ebman. Musa Uram aryi ninyi lemdansute ura, nun Nai Imtamnyi biryi nunti, “Musa Uram kunuraming deici aryi ni dam kun nang kibdeibkwan,” teneransute. 22Bok, Er Imtamnyi Uram ermuruna kerek sekmounyi biryi ato eboka eteresurur. “Im dangna tukwe dangna nang nirya ara lebdanmanto nang ton kum kunung. Eda, a nirya ara malyi kun nang akwe kunung,” eboka eteresurur. Ara, nun Nai Imtamnyi biryi ebdeiansou to kunubkwamuryi, sun nun Du Yesus Kristus bisi dib teneramingnyi nang asi leboka kisal dakwande ati ato eboka eteresurur.
23Minob talak ara nun Du Yesus Kristus bisi dib tenebkwamabunyi lak kum kibmou talak ara Musa biryi takubdeibmasou uram aryi nunsi kalingnansou. Musa Uram ara lika don dinyi ato asi nunti karebmasou. Musa biryi, “Malyi dinyi kubingnyei,” tenen, “Ato-ato kunubdarur,” eboka nunsi takubdeibmasou. Ba, nun Du Yesus Kristus kum yanmou talak ara takubdeibmasou uram deyok aryi, nunda tabwe demna nang ato kuboka mambul kanya boramoubwe. Ato kuramoubwe ara nun Nai Imtamnyi biryi, “Yesus bisi dib tenebingnyi deici aryi Niryi sunsi Ni dam kun nang kibdeibkwan,” ebkwansou ati ato kuramoubwe. 24Ati, Musa takubdeibmasou uram ara lemsina uram asi kum takubdeiansou. Eda, a uram aryi, “Malyi kun dinyi kubingnyei,” tenen kalingsina uram ati lika doninto kuboka takubdeiansou. Tonda, Musa Uram aryi nunsi kalikoka nun Du Yesus Kristus dam bobasinanyi bito dinyi takubdeiansou. Ati, nun Du Yesus bisi dib tenena deici aryi nun Nai Imtamnyi biryi nunsi dobdobkwansou ati, Musa Uram aryi nunsi kalingnansou. 25Ura, ukuryok ara nun dib tenenubnyi nun Du Yesus lak kibmar ati, nunda Musa Uram aryi tabwe deansou bun nang tuba kum kunub.
26Ati, sun nirya ara nun Du Yesus Kristus dib tenerandum deici aryi sunda Er Imtamnyi mabwe nermabwe kurandum. 27A deyok aryi, unanyi-unaner aryi nun Du Yesus Kristus bisi dib tenebingnyi ba, Er si aryi me dongobsingnyi nang ara nun Du Yesus Kristus dam kun nang diboka kurandum. 28Nun Kristus bisi dib tenen nang ara bokdanman kum nang kunub. Eda, nun nirya antaniboka ara neik yala nang ato kunub. Ati, nunci, “Yahudi yala nang ara yuk, Yunani yala nang ara yuk,” kum enub. Tonda, “Ninyi aryi arukmangnyi tok ikin wa bon nang ara yuk, ikin wa bona kum nang ara yuk,” kum enub. Tonda, “Sal nang ara yuk, nerabwe ara yuk,” kum enub. Eda, nun nirya nun Du Yesus Kristus dam kun nang kunub aryi nun nirya ara neik kanya bonub. 29Sunda Galatia nang ara nun Du Yesus Kristus bisi milin nang kundarur ati, sunbabyi nun abwe Abraham yala nang ato kurandum. A deyok aryi, sunda Abraham yala nang kurandum ati, nun Nai Imtamnyi biryi nun abwe Abraham bisi ebdeibmou to, sunbabyi kisal dakwansir.
Currently Selected:
Galatia Uram 3: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
