Keluaran Uram 39

Er Imtamnyi biti dama deirin nang imam nang ongon aling wibmai deyok

39:1-31

1Er Iya Erebdobnyi bisi Kemah Suci dam molonkwamangiryi ongonkwamnyi aling wibmai. Akaling bol ara kuruta bol wis bol ab, unduk bol ab, kirmizi aling ab, namin aling lenan ab aryi wibmai. Ara, Er Iya Erebdobnyi biryi ebdeiamwe to kuboka imam Besar Harun ongonkwamwe teleb ongon aling ababyi wibmai.

2Ani, Imtamnyi ai wa in nang imam nang ongon aling si efod asi emas aryi, tonda kuruta bol wis bol aling ab, unduk bol aling ab, kirmizi aling ab, namin aling lenan ab tabwe oamnyi aryi wibmai. 3Emas ila kiknibmai ura, sekoka-sekoka emas tabwe kibmai. Ura, a tabwe aryi kuruta bol aling wis bol ab, unduk bol ab, kirmizi aling ab, namin aling lenan ab aryi denebdongobnin yibinmai. A wibmai ara a aling wina bingnamunyi biryi kikniamwe dinyi aryi wibmou. 4Ani, efod aling takonya deirin yubwe dina takonya-dina takonya dungdongonkwamnya kiknibmai. 5Ura, ongon aling si efod der arikna ababyi efod ato akwe wibmai. Ara, kuruta bol aling wis bol ab, unduk bol ab, kirmizi aling ara Mesir dam aryi anaboka yanandau wala ati ebmang ab, namin aling lenan ab tabwe oamyi aryi, Er Iya Erebdobnyi biryi Musa bisi eamwe to kunuboka wibmai. 6Ba, dengna weik keil si krisopras ababyi nunuboka asing dina ati Israel ninyi sun abwe Yakub mabwe amolbaryi nang si yuk-yuk uturuboka sekdongobmai. 7Ura, a efod aling takonya singirdongona dam asi deibdongobmai. Ato kubmai dinyi ara Er Imtamnyi biryi Israel nang yala amolbaryi asi teneirdenkwandur tenen ukubmai. Ani, Er Iya Erebdobnyi biryi Musa bisi ebdeiamwe to kuboka ato kubmai.

8Taram limna ara wina bikdobnyi biryi taram limna wibmou. Ara, efod aling ato akwe wibmou. Emas aryi kuruta bol aling wis bol ab, unduk bol ab, kirmizi aling ab, namin aling lenan ab tabwe oamwa aryi wibmai. 9Akaling wibmai ara in lingdona dumbaryi likasuboka wibmai. Ani, likasumna bitinyi likasuboka taram limna aling wibmai. Cangtam kiklina ara 22 sentimeter baryi kiklibmai. Ani, dumdam tam kiklina ababyi neikto akwe kikliboka wibmai. 10A kiknibmai dinyi ara dengna weik keil aryi dumbaryi lelebdeibmai. A dengna weik keica si ara bi bol yapis ab, krisolit ab, malakit ab yuma yakna lelebdeibmai. 11Bitinyi yakna lelebdeibmai ara ining keil ab, lazurit ab, yaspis yikmakla bol ab lelebdeibmai. 12Winiryi yakna ara dengna weik keil si ambar ab, akik ab, kecubung ab lelebdeibmai. 13Dumbaryi dinyi yakna ara dengna weik keil si pirus ab, krisopras ab, nefrit ab lelebdeibmai ura, emas aryi denebmai. Ukuboka taramtam limna aling wibmai. 14A dengna weik keil amolbaryi ara Israel yala amolbaryi si yuk-yuk si sekoka deibmai. 15Ton kiknibmai ara taram limna kiknibmai. Ara, aling win tabwe wiboka tabtabingna kum emas aryi denebmai. 16Ani, taram limna denen tabwe ara bitinyi likasuboka denebmai. Ara, teleb emas aryi labaruboka denebmai. Ani, taram limna dinyi kubkub bitinyi dina-dina ara emas toubna aryi biribdongobmai. 17Ba, emas tabwe kouamnya aryi a taram limna aling kubkub toubna biribmai deici asi biribdongobmai. 18Ani, ton dinatam tabwe kubkub aryi a biribmai emas deici asi dukdongobmai. Ato kuboka a taram limna aling si efod kiknibmai. 19Ani, toubna bitinyi taram limna aling aitam kubkub asi biribmai. 20Ani, ton yuk emas toubna bitinyi aryi taram limna aling ara dinatam-dinatam, der arikna dungdongona dikum biribdongobmai. 21Ba, a toubna bitinyi-bitinyi aryi a ongon aling ab, taram limna ab kuruta bol tabwe aryi, “Okising-okising ebcei,” tenen biribdongobmaici, denebmai. Ara, Er Iya Erebdobnyi biryi Musa biti eamwe to kuboka kunubmai.

22Ura, a efod ongon aling deici alib lamangna aling kiknibmai. Ara, akaling kikninanyi biryi kuruta bol aling aryi a nirya kiknibmou. 23Ngang dam ara kat ongon aling si zirah aryi ngang dam ato kuboka kiknibmai. Kubkub sengdona ara, “Kwiribsakcei,” tenen denebdongobmai. 24Ba, a ongon aling yantam sengdona ara co si delima du aryi lumuboka boongobmai. Ara, kuruta bol tabwe wis bol ab, unduk bol tabwe ab, kirmizi bol tabwe ab aryi denebmai. 25Tabtabingna kum emas aryi tentok-tentok ceblobmaici, kiknibmai ura, yalinenga du aryi kwaknambok dikdongobnin yibinmai. 26Ba, co delima du ab, emas yalinenga du ab aryi atam limna aling bulul asi dina-dina turukoka denebmai. Ba, Er Iya Erebdobnyi biryi Musa bisi ebdeibmou to kuboka Er Imtamnyi molon ai Kemah Suci wa irbankwamwe tum ara a ongon aling ongonkwamnyi ati kiknibmai.

27Ani, Harun ab, er mabwe ab ongonkwamnyi ati, namin aling lenan aryi tebumna ongon aling wibmai. 28Ani, namin aling si lenan aryi Harun kisok aringdan aling kiknibmai. Ba, tonda er mabwe kisok kouna aling ababyi lenan aryi wibmai. Ani, bumang celana ababyi lenan aryi wibmai. A tabwe ara tabwe oamnya aryi wibmai. 29Der arikna ababyi namin aling si lenan tabwe ab, kuruta bol wis bol ab, unduk bol ab, kirmizi ab bol turukna-turukna bol oamnya aryi wibmai. Ara, Er Iya Erebdobnyi biryi Musa bisi ebdeiamwe to kunuboka wibmai. 30Ani, emas teleb yuk dinyi tabtabingna kum uca, emas dem aryi meterai atoanun uturuboka kiknibmai. Ura, a kiknibmai dinyi deici asi ato eboka kerek sekmai, “Anyi bira wiboka Er Iya Erebdobnyi wa inanyi,” eboka kerek sekmai. 31Ura, kuruta bol aling tabwe aryi kisok arikna deici asi denebdongobmai. Ato kubmai ara Er Iya Erebdobnyi biryi Musa bisi ebdeiamwe to kunubmai.

Er Iya Erebdobnyi molon ai Kemah Suci doramnyi ati, Musa er teleb kubmou deyok

39:32-43

32Ato kuboka Er Iya Erebdobnyi molon ai Kemah Suci ai utotoa nirya sirya memeboka dobmai. Er Iya Erebdobnyi biryi Musa biti minob, “Ato kuboka dobkwandarur,” eamwe to kuboka dobmai. 33Ura, Kemah Suci ati keis ol aruma ab, ai umbura don dinyi nirya Musa bisi boyanmai. Tonda, dungdongona ab, abilinga ab, noutam kolongna ab, abyokomna ab, yangamna ab Musa bisi boyanmai. 34Ani, yim domba kala asi bi bol turukna-turukna wiamnyi asi alib kalurdongona ab, me kwan umbura kurande dinyi si lumba-lumba kala ab boyanmai. 35Tonda, Er Imtamnyi biryi, “Ukubdarur-ukuna mem,” en uram deirin co sangkol ab, a co sangkol bublan Ni ab sun ab antanirdana alib eitam tiringdongona ab, co maloua kiboka boyibana co ab 36Er Imtamnyi biti dama deirin roti kwaning ab, a roti kwaning deirin co lamna ab boyanmai. 37Ani, tabtabingna kum emas aryi kikniamnyi uk ubna yabla ab, uk ubna kobdob a nirya a deici lilibdeiboka a keica kiknibkwamnyi dinyi nirya a boyanmai. Ani, uk ubna me ababyi kiknibdeibmai. 38Ani, emas aryi Er Imtamnyi biti siltong ena ati dama deirin co sangkol ab, kisok deici dingna me ab tong teleb co yung ab, Er Imtamnyi molon ai bublan dolorkweten aling ab boyanmai. 39Tonda, Er Imtamnyi dama deiboka uk dan molon lamna tembaga aryi kikniamnya ab, botorkweten bisik te kwalengdeirin tembaga ab, co maloua caboka boyiban co ab, yuk dinyi ababyi nirya ab, yan me ilingna meyok ab, a meyok lulu ab boyanmai. 40Ani, lika ila ab, abyokomna ab, yangamna ab, lika bublan dolorkweten aling ab, tabwe birin co ab nirya kiknibmai. Ani, Er Imtamnyi ai Kemah Suci ai dobkwamnyi ab ati buluamnyi. 41Ani, a beterdongona mem ai wa in nang ara Er Imtamnyi molonkwamangnyi tum aryi ongonkwamnyi ongon aling wibmai. Ara, Imam Besar Harun bira iya beterdongona mem aling wibmai. Ba, er mabwe ara Er Imtamnyi ai wa in nang ongon aling wibmai. 42A aling wibmai ab, Imtamnyi molon ai dobkwamnyi keica nirya ara Er Iya Erebdobnyi biryi Musa bisi, “Ato kuboka kiknibdeibkwandarur,” eamwe to kunuboka kiknibdeibmai. 43Ura, Musa biryi a dobmai dinyi nirya diblilibde yibanmou uca, Er Iya Erebdobnyi biryi ebdeibmou to kunuboka dobmai asi asing eibmou. Ura, a dobmai nang asi Musa biryi kisal dakmou.

Currently Selected:

Keluaran Uram 39: MTG

Highlight

Copy

Compare