Keluaran Uram 38

Er Iya Erebdobnyi biti dama deiboka uk dan keil dungna kiknibmai deyok

38:1-7

1Er Imtamnyi biti dama deiboka uk dana ati keil dungna kiknibmai ara co si penaga aryi kiknibmai. Ara, cangtam kiklina 2,2 meter baryi, dumdam tam kiklina ababyi 2,2 meter baryi kiboka, in lingna dumbaryi likoka kiknibmai. Ba, dangdang cang ara kiklina 1,3 meter baryi kikliboka sekmai. 2Ura, in lingdona dumbaryi nirya yang belebdeibnin yibinmai. A yang kikniboka belebdeibmaia nirya ara tembaga aryi denebmai. 3Ura, a lamna dinyi ara sici deirinkwaminya ati kuali totoa, sekop totoa, me kwena totoa, te kwaleng sendok totoa, uk kalum kin dinyi totoa, ani yuk dinyi-yuk dinyi nirya tembaga aryi kiknibmai. 4Ani, tonda a dama deirin lamna amwetam asi tembaga aryi uk kwamingca sangna ati, a co lamna deyok dam aryi denebde welebmai ani, co lamna amwetam asi sibarya akeibmai. 5Ura, toubna dumbaryi kubkub dina-dina tembaga aryi biribdongobmai. Ba, bobde yibankungnyi ura, kolokwaminyi co ara a toubna umbura dongoboka boyibana ati ato kubmai. 6A kiknibmai co ara penaga aryi kiknibmai ura, tembaga aryi denebmai. 7Denebmai ura, in lingdona asi toubna biribdongobnin yibinmai umbura asi co penaga aryi dongobdongobnin yibinmai. Ara, dama deirin lamna ara bobde yibankun ura, co dongoboka bobde bana ati ato kubmai. A lamna ara co aryi sangkol kiboka kiknibmai.

Yan me ilingna meyok kiknibmai deyok

38:8

8Yan me ilingna ati, tembaga aryi yangaboka ilila meyok sangkol kiknibmai ara a Kemah Suci ai bublan dam wa iramnyi nerabwe sun kimil dirdaramnyi dinyi aryi kiknibmai.

Er Imtamnyi ai Kemah Suci dobmai dam atei keta kiknibmai deyok

38:9-20

9Kemah Suci dobmai dam atei keta kiknibmai. Akatei keta outam asi lika dobmai aruma ila ara namin aling si lenan tabwe aryi oboka wiamnyi dinyi kiklina cang ara 44 meter baryi kikliboka dobmai. 10Ba, a ila asi abyokomna asi 20 baryi ikmai. A abyokomna ikwamai dikum ara tembaga aryi yangaboka ikmai. Uca, dungdongona ab, laboka dangna ab ara perak aryi dukdongoboka denebmai. 11Eitam lika dobmai aruma ila kiklina cang ababyi 44 meter baryi kiklibmai. Ba, abyokomna 20 baryi ikmai. Yangamna ara tembaga aryi yangabmai. Ba, dungdongona ab, laboka dangdongona ab, ara perak aryi denebdongobmai. 12Kitingbantam ara aruma ila kiklina 22 meter baryi sekoka dobmai. Ani, yaletam ababyi neiktoto ukubmai. Ba, abyokomna ara takubaryi ikmai. Abyokomna tembaga aryi yangaboka ikmai dinyi ab, ton abyokomna aryi-ton abyokomna dibdongobnin binmai ara perak aryi deneneboka dukdongobdanin binmai. 13Yaletam ara aruma ila kiklina ababyi 22 meter baryi kiklibmai. 14Weik bisik bublan dam dinatam ila ara kiklina 6,6 meter baryi kikliboka sekoka ibmai. Ara, abyokomna winiryi asi yangaboka tikeibmai. 15Ani, weik bisik bublan dam dinatam ababyi neiktoto ukubmai. Lika bublan dina-dina nirya ila ara kiklina 6,6 meter baryi sekoka ibdongobmaci, abyokomna winiryi ikoka yangabdongobmai. 16Lika dobmaia nirya ara namin aling lenan tabwe aryi oboka wiamnyi aryi dobmai. 17Abyokomna ikwamnya dikum yangabmai ara tembaga aryi yangabmai ba, dimdongorban dikum ab, dungdongona ab ara perak aryi dukdongobnin yibinmai. 18Ba, bisik bublan dolorkweten aling ara kuruta bol tabwe wis bol ab, unduk bol tabwe ab, kirmizi bol tabwe ab, namin aling lenan ab, aryi bol turukna-turukna wiamnyi aryi bublan dam dolobkwetebmai. Kiklina cang ara 9 meter baryi kikliboka dobmai. Uca, lika aruma im dub dangdang cang ab, keta bublan dam dolorkweten aling ab kiklina ara 2 meter baryi kikliboka seknin binmai. 19Abyokomna dumbaryi ab, yangana ab ara tembaga aryi yangabmai. Noutumang dungdongona ab, kubkub dimdongon dikum ab abyokomna sengdona denerdongona ab ara perak aryi denebmai. 20Er Imtamnyi molon ai Kemah Suci co ingna babyi, lika abyokomna babyi nirya ara tembaga aryi ikmai.

Kemah Suci dobkwamnyi ati co bok bulubmai deyok

38:21-31

21Er Imtamnyi molon ai, “Ukubdarur-ukuna mem,” en uram deirin ai dobkwamiryi uang buluramnyi. Ani, keil uang buluramnya nirya kerek sekamnyi ara ato. Yuma Musa biryi, “Ukuboka dobdarur,” eamwe. Ba, Harun mi si Itamar biryi Imtamnyi ai wa inanyi kiamuryi, sun Lewi yala akai wa irmilin nang asi, “Ukuboka nukoka kerek sekwandarur!” eramwe ba, nukoka kerek sengnamnyi. 22Yehuda yalanyi si Hur biryi deibdoba asi, Uri mi si Bezaleel biryi Er Iya Erebdobnyi biryi Musa deici ebdeiamwe dinyi nirya kunuboka wa iramwe. 23Ani, Dan yalanyi Ahisamakh mi si Aholiab bibabyi utotoa kiknina ab, kaluna si lenan wina ab, bol kuruta aling ab kuruta bol aling ab, bi bol aling ab wina bikamunyi kuramwe. 24Er Imtamnyi ai Kemah Suci dobkwamnyi ati, emas yala nirya buluboka dama deiryanamnyi ara kiklina 1.000 kilogram baryi koubmai. Kemah Suci aryi ikin kubmanto kiklirden dinyi aryi kiklibmai. 25Sun Israel si sekamnyi ninyi aryi deibmai perak ara nukoka kerek sekmai ara 3.430 baryi kilogram kiklibmai. Kemah Suci aryi ikin kubmanto kiklirden dinyi aryi kiklibmai. 26Ninyi tentok ara, “Ukuboka dekdarur,” ebmai to akwe timbang kibdeboka bulubmai. Ara, ninyi si nirya sun deiamnyi kwalina nukdeboka kerek sekmai. Ara, kwalina 20 baryi sekoka eitam baryi kwaliamnyi nang asi kerek sekmai. A kerek sekmai ninyi nirya ara yubwa 603.550 baryi ninyi asi kerek sekmai. 27Ba, 3.400 kilogram perak ara Imtamnyi molon ai abyokomna yangana ab, noutumang wilimna abyokomna yangana ab kiknibmai. Ara, 34 baryi kilogram perak aryi yangana tentok kiboka kiknibmai. 28Tonda, kablobdobmai dinyi ara perak ikin kiklina 30 baryi kilogram ara abyokomna dibdongobnin yiban dinyi ab, abyokomna urub asi deneboka limdongona ab, ton ananya dibdongobnin yibana ab kiknibmai. 29Tembaga dama deiryanmai ara koubne 2.425 baryi kilogram deibmai. 30A dinyi akiryok Kemah Suci bisik bublan dam yangabmai. Ani, dama deiboka uk dan keil dungna ab, dam deiboka keil dungna wa in dinyi yuk-yuk ab kiknibmai. 31Ani, tonda a dinyi aryok Er Imtamnyi molon ai Kemah Suci lika yangana ab, a lika bisik bublan dam yangana ab Imtamnyi molon keis ol ai biriboka ikdongobnin yibinmai dinyi nirya kiknibmai.

Currently Selected:

Keluaran Uram 38: MTG

Highlight

Copy

Compare