2Tesalonika Uram 3
3
Er Paulus biryi Tesalonika nang asi, “Nunti molobmilisindarur,” eboka molobmou uram
3:1-5
1Ura, nun kwit yabwe, sunci nun Nai Imtamnyi bisi nunti molormilisina teleb. Ara, nunci ninyi ilinto asi Er Imtamnyi Uram eterebibyi ba, Er Imtamnyi Uram dib tenebkwaming ati molobmilibsindarur. Tonda, yuk nang ababyi Teleb Uram asi eterebmurubkwaming ati molormilindarur. Ba, sunci, “Nunci nun Du Yesus deyok Teleb Uram dobdobmoubwe to, yuk nang ababyi nun Du Yesus deyok uram dib tenena teleb,” tenen molobmilibsindarur. 2Molobmilisumunyi ba, sunci, “Sun malyi kun nang ara nun kwit yabwe asi dubdengnyei,” eboka molobdarur. Ninyi nirya ara Er Imtamnyi Uram asi dorona kum kunung ati ato ebman. 3Malyi kun nang ara nunsi dumdesingnyei bok, nun Du Yesus bira tanglona kum uca nunsi iya milisurur. Erci sun kanya yuk-yuk asi katabum ebdeibdiryok, sunsi kalikwansir. Malyi kunanyi biryi bisik sekoka sunsi dubdendesici ababyi Erci kalikwansir. 4Sunda Er Imtamnyi dam kun nang kundarur ati, nunci sunti ato teneirisunub. “Sunda nun ebdeibmasoubwe to kununung. Tonda, aminda ababyi kunubkwaming,” tenesunub. 5Ura, nun Du Yesus biryi karebsici ura, sunci ato teneina teleb. “Nun Nai Imtamnyi biryi nunsi boukwe weik kimsurur ati, nunci Er Uram asi kunubkwayeb.” Tonda, sunci ato teneina teleb, “Nun Du Kristus biryi tanglona kum uca Er Imtamnyi Uram kunuramwe to, nunbabyi tanglona kum uca Er Imtamnyi Uram asi kunubkwayeb. Ninyi aryi nunsi dumdesingnyi ababyi, ato kubkwayeb.” Sunci ato teneina teleb ati ebman.
“ ‘Wa ina nun li,’ tenen sulbalyi kubmunyei,” ebmou uram
3:6-15
6Ura, ni kwit yabwe, sun wa ina ati sulbalyi nang asi sunci kisibdobdarur. Tonda, sun nun ebdeibmasoubwe uram asi kum kunuramingnyi nang ababyi kisibdobdarur. Nunci uram ebdarab ebibiryok, nun Du Yesus Kristus si deib aryi ato ebdeibkwinsib. 7Sunci, “Una kuboka kubkwayeb,” tenen walwal kum kurandum. Eda, sunci, “Ninyi ara wa ina ati sulbalyi kubingnyei,” tenen bikmarum. Nunda sun ab tonkwa kuramaburyok, nunci busul kuboka Teleb Uram etereransoubwe. Tonda, busul kuboka wa bita iramuburyi, nunda yina yiramoubwe. A deyok aryi, sunci nun kuramoubwe to asi, “Ato-ato kuboka busul kuramnyi,” teneboka kununa teleb. 8Ara, yuk nang aryi talyi karebsin yina ara kum yiramoubwe. Eda, “Sunsi ikin bobminikibyei,” tenen kitingtam lukunda nirya wa bita ibnaryok, yina yiramoubwe. 9Nunda Teleb Uram eterebde ban nang kunub ati, “Yina karebsindarur,” eboka molona ara kikib kubte. Kikib kubte bok, nunci ato eboka kum moloramoubwe. Ara, “Nun ukuramib to kunubkwaming,” tenen ato kuramoubwe. 10Nun ab sun ab tonkwa kuramoubwe ba, nunci ato ebdeibmasoubwe. “Sun wa ina sulbalyi nang asi yina karebmunyei,” ebmasoubwe.
11Sun kankan ara wa ina sulbalyi kun nang kunung ati nun kekebmoubwe. A nang ara yibinkirikoka yuk mabwe silib nang asi, “Ato-ato kubdarur,” eboka arungnaming cok, diboka kuna kum nang kunung. 12Sun ato kuramingnyi nang ati nunci ato ebdeibkwamib. “Sun kanya darab-darab eboka busul kuboka wa ibnaryok, sun dinyi asi yina teleb.” Uram ebdarab ebdeibibiryok, nun Du Yesus Kristus si deib aryi nunci sun ato kuramingnyi nang ati ato wenebmab. 13Ura, nun kwit yabwe, sunci teleb dinyi kurandum ara tanglona kum uca iya kununa teleb.
14A kerek sengna umbura ebdeibmasib uram asi kum kekebingnyi nang ati uram ton ebkwinsib. Sunci sun dib tenen nang yuk nang asi lak kibdeiboka, “Anyi bira nun Du Yesus Uram kum kekerur,” ena teleb. Sunci a nang aryi kisibdobdarur. Sun ab tonkwa kubmunyei. Alyi kibkwandur ati ato kubdarur. 15Ato ebman bok, sunci a nang asi bimsa yarina mem. Eda, sunci, “Nun kwit,” tenebokabmunci, sun kanya namibdongoboka, “A uram asi kunubdum,” eboka wenebkwandarur.
Paulus biryi, “A kunum sekeibmasin,” ebmou uram
3:16-18
16Nun Nai Imtamnyi bira antanirdeirisina deyoknyi biryi sunsi tuba-tuba antanirdeirisina teleb. Antanirdeirisin dinyi utotoa asi Erci sunsi karesina teleb. Nun Du bira sun ab tonkwa kuna teleb.
17Ni Paulus biryi ni taruk kobdob aryi kerek sekoka, “Ni kwit yabwe,” ebmasin. Ni Paulus biryi a kerek sengna asi diboka kerek sekeibmasin bikwandum ati, sunci ni kerek sengnun to asi liliboka bikwandarur. Yuk kerek sengna ababyi ato kuboka sengnun. A deyok aryi, sunci, “Er Paulus biryi a kerek sengna asi kerek sekmou do? Yuknyi biryi kerek sekmou do?” tenen kankana kubsicei. Tonda, “A uram ara dib en uram do? Tola uram do?” tenen kankana kubsicei. Sunci niryi kerek sengnun to asing eibmamun ba, kankana kum kubkwansir. Eda, sunci, “Er Paulus biryi kerek sekmou,” tenen bikwandum.
18Nun Du Yesus Kristus biryi sun nirya asi tanglona kum uca teleb kurdeirisina teleb.
Currently Selected:
2Tesalonika Uram 3: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
