1Timotius Uram 1
1
Paulus biryi Timotius bisi, “Teleb,” eboka kibmou uram
1:1-2
1-2Teleb ni kwit Timotius. Ni Paulus biryi a kerek sengna kerek sekeibkwinkin. Kanbabyi nun Du Yesus Kristus diboka dib tenerum ati, niryi kanti, “Ni eterena uram diboka kekenurur mi,” tenerankin. Ni Paulus bira nun Du biryi ebdeibmanou Uram Teleb asi ermuruboka lak eterenunyi kunun. Ara, nun Nai Imtamnyi ninyi Lemsururnyi ab, nun Du Kristus Yesus nun dibde bunubnyi ab aryi takubdeibmanirei to, niryi Teleb Uram ermuruboka lak eterenunyi kunun. Nun Nai Imtamnyi ab nun Du Kristus Yesus ab aryi Timotius kanti, “Nun mi,” tenen kisal dangkina teleb. Tonda, nun Nai ab, nun Du ab aryi kanti bico teneboka kan kanya asi teleb kurdeirikina teleb!
Sun tola uram eterena nang asi, “ ‘Tola uram eterena mem,’ ebdum,” uram
1:3-11
3Timotius, kanda Efesus atei tuba kuna teleb. Ara, minob ura Makedonia mutuk binkwansiryi ebdeibmakise to, ukuryok tubto ebdeibmakin. Ara, niryi, “Efesus atei ara yuk nang aryi tola uram etereraming,” tenen deyok aryi niryi kansi, “Timotius, kanda Efesus atei a kubdum,” ebdeibmakin. Ati, kanci, “Tola uram eterena asi takdarur,” eboka sun Efesus nang atei kuramingnyi tola uram eteren nang asi wenebdum. 4Ato eboka weneraminci, a nang asi ato eboka wenenkwandum. “Malyi nunung eterena dinyi ara takdarur,” eboka eterenkwandum. Tonda, sun abwe yabwe aryi mi yaldangnamnyi deyok ababyi dirlilina mem. Ninyi aryi ato uram liliramingnyi ura, malyi deyok atikwe lulurdaraming. Ba, dib en uram ara diboka kum kekeboka Er Imtamnyi biryi dib tenena biriman aryi karesurur lemsin dinyi ara malyi kimsiniraming. 5Er Imtamnyi biryi teleb tenesurur to ara lulurdana uram kuma. Eda, Erci, “Ninyi aryi yuk nang asi boukwe weik kubting,” tenen erdeirisurur. Ara, teleb kanya bobokabibiryi, “Malyi kun dinyi ara sirya bai donokmab,” tenebkwanub. Tonda, kanya wilimna kanya ara bai donokokabibiryi, nunci Er Imtamnyi bisi dib tenebibiyi ura, yuk nang asi boukwe weik kibkwanub. 6Ninyi ton nang ara sun damnyi wanikminikdanmai uca, ato tenen kanya tuba kum boraming. Eda, sunci malyi kubingiryok, talyi uram akwe etereraming ati ebman. 7A nang ara sun damnyi bingna nang kiknirdanungci, ato erdanung. “Er Musa biryi ebdeibmasou uram lilibde eterenub nang kunub,” erdaraming. Sunci akata kuboka ato erdaraming bok, sunda er Musa biryi ebdeibmasou uram deyok ara bita kum bingnung. A nang ara, “Musa Uram ara ato-ato kurur,” eraming asi, sunci etereramingnyi uram deyok ababyi bita kum bingnung.
8Er Musa biryi ebdeibmasou uram ara teleb uram akwe kurur ara nun bingnub. Ara, er Musa Uram deyok asi diboka etereranting ura, a uram teleb akwe kurur. 9Er Musa biryi ebdeibmasou uram ara sun Er Imtamnyi Uram diboka kunung nang asi tatab-tatab eboka kum wenesurur. Eda, sun malyi kun nang akwe tatab-tatab eboka wenerur. Ara, sun er Musa Uram yan yaniraming nang ab, sun kalingna nang uram asi kekena kum nang ab, sun Er Imtamnyi biti, “Nun Nai,” tenen kum nang ab, sun malyi kuramingnyi nang ab asi er Musa Uram aryi tatab-tatab eboka wenerur. Tonda, sun, “Malyi kubkwan,” tenen kanya bon nang ab, sun Er Imtamnyi Uram teneina kum nang ab, sun nai sun kwin kobdoba asi oramingnyi nang ab, sun ninyi obmangnyi nang ab. Sun ato kuramingnyi nang nirya asi er Musa biryi ebdeibmasou uram aryi tatab-tatab eboka wenerur. 10Tonda, sun ner sal talyi yordana nang ab, sun sal nang sun mamun yordana nang ab, sun, “Nun wa ibsiting,” tenen ninyi ukula boduknurban nang ab, sun tola uram en nang ab, sun yuk nang asi tola ati tatab-tatab en nang ab. Sun ato kuramingnyi nang ababyi er Musa Uram aryi tatab-tatab eboka wenerur. Tonda sun yuk malyi kun dinyi kuboka dib eteren uram asi yan yaniramingnyi nang ababyi er Musa Uram aryi tatab-tatab eboka wenerur. 11Teleb uram ara ninyi kanya berengdeirin uram ababyi ato eboka eteresurur. Nun Nai Imtamnyi bira Er si weik enubnyi biryi ni Paulus bisi a Teleb Uram asi ebdeibnou. Ara, “Teleb Uram ebmuruboka lak eterebdum,” eboka Erci nisi arukmanou.
Er Paulus biryi nun Du Kristus Yesus bisi, “Ei, ni Du,” eboka kibmou uram
1:12-17
12Ni Paulus biryi nun Du Kristus Yesus bisi, “Ei ni Du,” enun. Nun Du bira nisi mikib karenururnyi biryi niti, “Busulnyi,” tenen, “Teleb Uram ermuruna eterebkwandur,” tenen tikeibmanou ati, niryi Ersi, “Ei ni Du,” enun. 13Minob ura niryi nun Du Yesus bisi ina ngilingnanse asi, Erci nisi bico tenen teleb kubdeibnou. Tonda, niryi sun Ersi dib tenen nang asi, “Obkwan,” tenen domkiringnanse asi, Erci nisi teleb kubdeibmanou. Tonda, nira yu weik kuranse bok, nun Du Kristus Yesus biryi bico tenebmanou. Nira nun Du Yesus bisi dib kum teneransiryi, walwalnyi kuranse deyok aryi a malyi dinyi nirya kuranse. Ati, nun Du biryi niti, “Er walwal aryi malyi kuramwe,” tenen bico tenebnou ura, Erci nisi teleb kubdeibnou. 14Nun Du biryi niti, “Ni mi,” tenen kisal dangna dinyi ilinto langdeiboka kareboka abnouci, Erci nisi dib tenen kanya ton boukwe weik tenen kanya ton langdeiboka karebmanou. A dinyi ara nun Du Kristus Yesus biryok karesurur.
15Niryi a ebkun uram ara ninyi nirya aryi kekeboka dib tenena teleb. Ara, ato, nun Du Kristus Yesus biryi, “Malyi kun nang asi teleb kubdeiboka lebkwan,” tenen tukwetam yuryanmasou. A malyi kun nang kankan ara ni Paulus bira bisibkaboka iya malyi kun dinyi ilinto kuransinyi kunun. 16Nira iya malyi kunanyi kuranse bok, nun Du Yesus biryi nisi bico tenebmanou. Nun Du biryi teneiboka iya malyi kunanyi bisi telebnyi bito kubdeibmanou. Ara, ninyi nirya aryi, “Nun Du bira sun iya malyi kun nang ababyi ola u kum dokom erur,” tenen bikwamnyi ati, Erci ni iya malyi kuransinyi bisi bico tenebmanou. Tonda, sun aminda kubkwamnyi nang ababyi ni kunun to diliboka dib tenebingnyi uca, Er Imtamnyi ab tonkwa kuboka iya kam kubkwamnyi ati, Erci nisi minob bico tenebmanou. 17Ati, nun Nai Iya Erebdobnyi bira nun kalingsururnyi bisi si weik ena teleb. Minob yuma kobdob talak aryi kuboka aminda sirya kobdob talak ababyi Erci nunsi kalingsurur. Erda dibman kumnyi kururci, iya kam kurur. Nun Nai bira ninyi asing aryi eirina kumnyi kurur. Nun Nai Er kikwa iya mikibnyi kurur. Ato eboka nunci nun Nai bisi si weik ebkwayeb. Ukuryok aryi kuboka aminda sirya kobdob talak ababyi Ersi si weik erena teleb. Amin.
Paulus biryi Timotius bisi, “Ato-ato kuboka wa ibdum,” ebmou uram
1:18-20
18Timotius ni mi, sun Er Imtamnyi Uram minob bikoka ermururaming nang aryi kan deyok ati minob ebdeiankei to asi, kanya teneibdeminci, diboka kunubdum tenen ati ebmakin. Ara, kanda yin doun nang aryi ilil asa kum uca sun ordana nang asi bisik sengnaming to, kanbabyi ilil asa kum uca sun tola uram eteren nang asi bisik sekdum. Ati, kanci nun Du Kristus Yesus bisi milibminci, a dib en uram asi teneiboka talebnurubdobminci, sun tola uram eteren nang asi bisik sekdum. 19Bisik sekminci, kanci tanglona kum uca dib en uram asi dib tenebminci, teleb akwe kubkwandum. Ati, kanci kandamnyi biti, “Malyi kun dinyi bai donokman,” tenen tuba-tuba bikdankwandim ati, kanci teleb akwe kubkwandum. Ninyi ton nang ara dib teneamnyi ani, dangubokmai uca, “Teleb dinyi ara tuba ukuna nun li,” tenebyi ura, sunci dib uram dib tenena ababyi nirya taklobyi. 20A wanikminikdanmai nang kankan ara ninyi si Himeneus ab, Aleksander ab ton kuranding. A nang ara dib tenen dinyi nirya asi taklobmarei ura, Er Imtamnyi si ab nun Du Yesus si ab asi ina ngilikmarei. Ba, ni Paulus biryi a nang bitinyi asi, “Iblis taruk dam karebse ara sunci ina ngilingnanding dinyi asi taklobtiring,” tenebmasiryi, sun dib tenen nang kankan aryi kuboka yakdonoksiryi, isa sienyi si Iblis taruk dam karebmase.
Currently Selected:
1Timotius Uram 1: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
