1Tesalonika Uram 4

“Ato-ato kubmunyi uca, nun Nai Imtamnyi biryi sunti, ‘Ei, Ni mabwe nermabwe,’ tenesurur,” ebmou uram

4:1-12

1Ura, nun kwit yabwe e, nunci minob ura etereransoubwe to, sunci diboka ukubmunci, tabakdongo-tabakdongo ukuna teleb. Minob ura etereransoubwe ura, nunci sunsi ato eransoubwe. “Sunci ato-ato kuboka teleb dinyi ukubmunyi uca, nun Nai Imtamnyi biryi sunti, ‘Ei, Ni mabwe nermabwe,’ tenebkwansir,” eboka etereransoubwe. Ura, ukuryok ababyi neik uram akwe ebkwinsibci, nunci uram ebdarab eboka, “Diboka kunubting,” tenen ebkwinsib. Sunbabyi nun Du Yesus dam kun nang kurandum ati, nunci ato eboka ebdeibkub. 2Nun Du Yesus biryi takubdeibsou to, asi nunci ermuruboka, “Ato-ato kuna teleb,” eboka etereransoubwe ati sun bikmarum.

3Nun Nai Imtamnyi bira, “Sun dib tenen nang ara ato-ato kuna teleb,” tenesurur dinyi ara sun sirya bikmarum. Ara, Erci sunti, “Niryi wibdeibmase nang ara ato kubingiryi, teleb dinyi akwe ukubting,” tenesurur. Ati, nun Nai Imtamnyi biryi sunti, “ ‘Ner ukula yobtinyi, sal ur talyi yobnute,’ tenen kanya ara bai donokting,” tenesurur ati ebman. 4Ara, sal babyi ner babyi sun damnyi diboka kalingdaramunci, talyi yordana tenen dinyi nirya asi bai donongna teleb. Ato kubmunci, sunci, “Teleb dinyi ukubkwamib ati nun Nai Imtamnyi biryi nunsi wibdeibsou,” tenena teleb. Tonda, sunci ato teneina teleb. “Nun Nai Imtamnyi ab tukwetam nang ababyi nunti, ‘Kikib tenen dinyi akwe kuraming nang,’” tenena teleb. 5Ati, sunci, “Ner talyi yobtinyi, sal talyi yobnute,” tenen malyi dinyi ukubmunyei. Sun yuk yala nang ara Er Imtamnyi Uram walwal nang aryi talyi yobdandoka ukuraming to, sunda dib tenen nang aryi ukubmunyei. 6Ati, sunci, “Ni kanya asi kalikdankwan,” teneboka ner talyi yordana mem. Unanyi biryi, “Ni kwit ner asi yobtinyi,” ton, “Ni kwit nebnyi asi yobtinyi,” tenebdinyi bira malyi dinyi kurandiryi. Sun kwit ner kum er nebnyi kum asi ukula yobdaute ura, sunci sun kwit bisi malyi kubdeibdaute. A deyok aryi, sunci a dinyi ara luba kibmunyei, “Nun Du Yesus bira sun ato kuramingnyi nang asi diba ati wenebkwande.” Minob ura, nunci a uram asi ebdarab erdeiriransoubwe ati, sunci diboka teneibdarur. 7Nun Nai Imtamnyi bira nun dib tenen nang asi nabsou ara talyi yordankwamoubwe ati nabsou do? Ato tenen kum. Eda, Erci nunsi nabsou ara, “Nira Imtamnyi biryi wibdeibse nang ato kubingiryok, teleb dinyi akwe kunubkwaming,” tenen Erci nunsi nabsou. 8A deyok aryi, sun a uram asi barwetam deibkwaming ner sal ara ninyi aryi erdeirin uram asi barwetam kum deibkwaming. Eda, nun Nai Imtamnyi bira Er Kanya Roh Kudus nun kanya dam dongobsounyi biryi ebdeibsou uram asi barwetam deibkwaming. Er Imtamnyi Kanya Roh Kudus ara, “Malyi dinyi ni li,” tenerurunyi bisi nun kanya dam karebsou ati, nunci Er Imtamnyi Uram asi barwetam kiboka malyi kun dinyi ukubtibyi do? Ato tenen kum.

9Sunda sun dib tenen nang asi sun mamun boukwe weik kimdana deyok ati sunsi, “Boukwe kimdarandarur,” kum eboka kerek sekdeibkwamasib. Eda, nun Nai Imtamnyi biryi sunsi a deyok ati sirya eterebmasou ati, sunci sun mamun boukwe weik kimdarandum ati ebman. 10Ati, sunci nun kwit yabwe Makedonia mutuk aryi kuraming dib tenen nang nirya asi boukwe kiboka teleb kurdeirirandum. Sunci ato kurandum bok, nunci ebdarab eboka, “Tabakdongo-tabakdongo boukwe weik kimna teleb,” ebdeibkwinsib.

11Tonda, sunci, “Yuk nang ab antanibdeiboka kubdobkwayeb,” tenen teleb akwe kuna teleb. Tonda, sunci, “Ato-ato kubdarur,” eboka sun yuk mabwe silib asi arukmunyei. Tonda, sunci busul kuboka sun wa yuk-yuk ina teleb. Ati, nunci sunsi minob ebdeibmoubwe to, kununa teleb. 12Sun dib tenen kum nang aryi sun dib tenen nang ati, “Ei, a nang ara kikib tenen dinyi akwe kuraming,” eboka kisal dakwansing ati, ato ebdeibmasib. Tonda, sun kankan aryi ninyi tentok ababyi, “ ‘Yuk nang aryi karebkwaning kwaning yibkwan,’ ebcei,” tenen nunci sunsi, “Sun wa yuk-yuk diboka wa ina teleb,” ebdeibmasib.

Nun Du Yesus tamuryankwande uram

4:13-18

13Nun kwit yabwe, sun sirya dib tenen nang kankan aryi dinung nang deyok ati uram ton ebkub. Ati, sunti, “A deyok ati sun walwal kubcei,” tenen eterebkwinsib. Sunci sun ninyi dibmangnyi ba, tukwe dongobmamunyi nang ati, “Kam tubto kum bukokwaming,” tenebmunyei. A deyok aryi, sun kanya ara mambul kubsicei. Ara, sun dib tenena kum nang aryi mambul kuraming to sun kanya mambul kubsicei. Sun dib tenena kum nang ara, “Sun diamingnyi nang ara kam tubto kum bukokwaming,” teneraming ati, sun diamingnyi nang dam kun nang aryi, “Se,” teneboka boukwe akwe aryi mambul weik kuraming. 14Sun dib tenen kum nang ara ato kurande bok, nunda dib tenen nang aryi tenen kanya ara yukto kurur. Ara, nunci, “Nun Nai Imtamnyi bira sun dib tenen nang dibmangnyi ababyi kam bukeibkwansir,” tenen bingnub. Ara, nun Du Yesus dibmou ani, kam bukokmou to, sun nun Du Yesus bisi dib tenen nang ababyi neiktoto kubkwaming. Ara, sirya dibmangnyi asi nun Nai Imtamnyi biryi sunsi kam bukeibkwansir. Tonda, nun Nai Imtamnyi biryi nun Du Yesus biriman aryi karebsici uca, sun diamingnyi dib tenen nang ara nun Du Yesus bisi miliboka imtam ai wengbinkwaming. 15Nun Du Yesus imtam aryi kuboka tamuryankwande uki tum berekci ura, nunda kam tuba kubkwamibyi nang Er ab tonkwa yuma kum ebdankwayeb. Eda, sun dib tenen nang diamingnyi asi kam bukokingnyi ura, nun Du Yesus ab tonkwa yuma ebdankwaming. A uram ara dib en uram kurur. Nun Du biryi a uram nunsi lak kibdeibsou to, nunci neik uram eboka sunsi eterebmurubmasib. 16Nun Du Yesus imtam aryi kuboka tamuryangariryi, Erci arukci ba, sun dib tenen nang diamingnyi ara kam tubto bukokwaming. Ara, nun Du Yesus tamuryangaci ba, Er Imtamnyi Uram eryuryangan nang sienyi biryi uram weik dobkwande. Uram weik dobci ura, Er uram eryuryangananyi yuknyi biryi, “Er Imtamnyi biryi sun dibmangnyi nang bukeibkur,” tenen, “Sun dibmangnyi nang kekebingiryi, kam bukokwaming,” tenen buu ena si sangkakala dobiryi, lilim weik ebkwande. Lilim weik ebkwande uca, sun dibmangnyi nang ara nun Du Yesus Kristus dam kun nang yuma kobdob kam bukokwaming. 17Sirya kam bukoka imtam ai welebingnyi ura, nun Nai Imtamnyi biryi karebsici uca, nun kum diamibyi nang kam tuba kuramibyi nang ara aminda aryi welebinkwayeb. Welebinmabyi ura, duwa deici aryi kubibiryok, nunbabyi nun Du Yesus ab tonkwa ebdankwamib. Ato kuboka nun dib tenen nang nirya ara nun Du Yesus ab tonkwa iya kubkwamib. 18A deyok aryi, sunci a uram eterebdandoka sun kanya yuk-yuk asi katabum ebdeibdandarur.

Currently Selected:

1Tesalonika Uram 4: MTG

Highlight

Copy

Compare