Thekrü 3
3
Kepenuopfü Ngukemezhie Kechachie Baya
1Ae Kepenuopfü nouyie theu geinu kemezhiekecü ngukecü themiau zo;
2puoe a cha tha ze zeibouikecü kezie puorei ba kemonu vorshü;
3puo a rübei petsou di puo dzie yhashü,
teisozha pete, si sei ba tsote.
4Puoe a chü tsiu a zhü bu wetoite,
tsiu a ruko bietshebietshawate;
5puoe mha kepfhü tsiu kemezhiekecü bu a petsou mu a houpfüliete;
6puoe a bu kezei nu bate thiedzütho siaketamia tuoi.
7Puoe cakhapie a boliete a talie kenjüte;
puoe thegi ro mesi sekecü puo pie a phaliete;
8a kekhruohi cha shiekhouishü zorei,
puo a kecha rünyü mote;
9puoe radatsie pie a chako khawate,
puoe a cha chü kerüwiwate.
10Puoe thega puo tuoi a pfhe zhüte,
losha puo rüshü kezhü tuoi;
11puo a ze cha khie vo di a ciechücierhawate;
puoe a chüpie a bu a dzükezei chüte,
12puoe puo theü gapie bate,
tsiu puo theütsie la a pie kedzieguokecü vie puo chüwate.
13Puoe puo theütsiebou nunu theütsieu ciepie a kevi nu vawate.
14Ae a themia peteko krenyü chüte,
zhate uko thekre tsaliuta zo.
15Puoe mha kepfhü pie a ketshu chüwate;
puo a bu tsiena krie di mezete.
16Puoe a bu a hu pie tsiesenuo ta,
mu a bu mige nu rüphre;
17a ruopfüe noune jüte;
kenei sü kedipuo shi ae rükra mote;
18süla ae sie, “A zayieu tuo mote,
tsiu Jihova gei kemerü tuo mote.”
19A kemezhiekecü mu a kiükru jüketa lekeshüe tsiena mu chüthesie mhie zo!
20A ruopfüe süu rükra sei di,
a nou nu rünuo kete.
21Derei hau a sie le vorlie,
di a kemerü nyilie.
22Jihova kekhrie rüdirüli kemo-u mhakipuorei jütaya mo,#3:22 Syr Tg: Ibri Jihova, hieko dathewa mo.
puo u ngukemezhie puo thela jü;
23Süko teisoduü kesa sei baya;
n kedietho zha zalie.
24“Jihova sü a yau zo”
a ruopfüe siya,
“Süla a puo khremerü batuo.”
25Jihovae puo pfhe bayakezhamia gei tseiüvi,
mu puo mengu bayakezhau gei tseiüvishüya.
26Mia puoe zei-i di Jihova kelakelie pfhe bakelie-e vi.
27Mia puoe puo khriesarüü ki,
vocieu pfükelie-e vi,
28kemekrie di Niepuu u pie dakeshüu pfükelie,
29u tie se tsu nyophe nu zhüketau rei,
(sita zorei u kemerü ba zo),
30u dzo kereipie u kevümia tsüshü,
mu u pesekecü pie u tshupfülie rei.
31Kekreilamonyü Niepuue kechachie u khawalie lho.
32Puoe thenou kesuo khashü zorei,
puoe ngukemezhie kra phikecü ki ze u ngumezhieshütuo;
33kekreilamonyü puoe puoneipuonyü chü di themianuo pechüpenyü morei u nou chü pesuoya mocü la.
34Kijü nu kediemia pete mia phi khro nu kedewacü ki,
35Kuokejokejüu mhinguki nu themia mezhüu bie kedikewa ki,
36mia puo mezhü bie kerüwikewa ki
Niepuu süu ngu lho üme?
37Mhanuü Niepuue süu chüshü mo üro,
supuonie süu pushü mu chüshülie vi ga?
38Keviu rei kesuou rei Kuokejokejüu me nunu par mo üme?
39U keha kenyi supuonie u kephouma la siazha ngukelie ki panyalie vi ga?
40Úko u chako kimhie ba shiü mehoshü khe,
sidi rürei Jihova ki la vor khe.
41Úko u melou mu u dzie yhapie teigei Ukepenuopfü ki shülie khe.
42Hie phoumawa tsiu n petsousiete,
mu no vashü mote.
43No nouyie chü dzielie di hie whuo,
ngumezhie moto zo di dukhriwa;
44no kimhou puo se n keziliete süla kecha puorei pfüthe volie kenjüte.
45Noe hie chüpie themia donu mha kerhu tsiu kelhoukewa nyopfhü chüwate.
46Hie ngumvümia pete u tie tiehiepie hie petsou;
47kemichie tsiu mha preikecü hie gei vorte,
mha vakecü mu kepeka vorte.
48A themia kepeka la a mhidzü kerü nu dzükru tuoite.
49A mhidzü kruzhü zotuo,
kerülei jü di,
50Jihova teigei nu mehoshü kemochie si ba zotuo.
51A nadi nu thenumia kemedzüko rüli la a mhi-e a nou chü pesuote.
52A ngumvüko puocapuola kejü nu pera kewhuo chü a whuo kemerie chü tuote;
53ukoe perhei a kelhoupie kheho nu shü,
tsiu ketsie kelhoupie a va,
54dzü a tsü mho siete;
sitse a sie, “A sü tseite.”
55He-i Jihova,
a kheho kesouko nunu n za kieshü;
56noe a pfhe sishüte,
“A kekhruohi chakeshü ki n nyieto kegulieta hiecie,
derei kerülei kha a tsücie!”
57A n kiekeshü ki no a penuo vor;
no a ki, “Michie hiecie,” isi.
58He-i Niepu, no a yapieshüte,
noe a kerheiro kelashüte.
59He-i Jihova, noe a gei kekrükeshüko ngushüte;
a nyie pepishücie.
60Noe uko kelhiekecüko,
tsiu uko a petsoukecüko ngushüte.
61He-i Jihova, noe uko a krekecüko,
mu a petsoukecüko ngushüte.
62A ngumvüko zhate kenoupu mu mebe di a petsou.
63Uko ba tsu rei tsiu sietha rei mehoshücie;
ukoe a mecha di thepfhe chü.
64He-i Jihova,
uko dzie mhatho tuoi uko zhakhra chüshü uko tsücie!
65Thenou kesuo pie uko tsücie;
n rüsepie uko gei shücie!
66Jihova teiko khronu n noupfhü se di uko whuo vo uko pekawacie.
Currently Selected:
Thekrü 3: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More