Thekrü 2
2
Ukepenuopfü Pukeshüu Chü Tseikeshü
1Kimhie di Niepuue puo nouyieu
pie Zion nuopfü chü kemengashü shi!
Puoe teigei nu Israel ziviu chü kelhoupie kijü shüwate;
puoe puo nou meyiekelie nhie puo phikhrau rükra mote.
2Niepuue pete ngumezhie moto zo di Jakob kelhou chüko pete pekawate;
puoe puo noukemeyie geinu Juda nuopfü dahou kemeteiu biemewate;
kedirüvie mu süko kezhako bie kezhasewate.
3Puoe puo nei mo seketa geinu Israel kekuo pete dathewate;
puoe ngumvümia mhodzü nunu puo dzie puo zatsa teshüliete;
sidi puoe miü tuoikecü pie Jakob thewate,
süue puo khie keba lutsahatsa thewate.
4Puoe ngumvümia puo tuoi puo theü gase bate,
ngumvümia puo tuoi puo dzie puo zatsa dojüse thate;
puoe Zionnuopfü pfhekiu nu keba,
hie u la kemiakoyakezha kheko dukhriwate;
puoe puo nouyie mi kemhie rushüte.
5Niepuue ngumvümia puo tuoite;
sidi Israel pekawate.
Puoe uko kedikiko pete pekawate,
tsiu uko badiko bu ruo zhüte,
sidi Juda nuopfü nousuo mu thekrü kechü chü pekrashüte.
6Puoe puo rüsuokiu tezie puo tuoi bierhuowate,
puoe puo pfhekiu bie pesuowate;
Jihovae Zion nu thenyi tsiu sabat khawate,
tsiu puo nou meyiethorkecü nunu kediu mu zievo-u rei meliewate.
7Niepuue puo ruosuobau thite,
puoe puo kemesachüu meliewate;
puoe puo kediki dahouko pie ngumvümia dzie nu shüwate;
thenyi puo nhie tuoi Jihova kiu bouübite.
8Jihovae Zion nuopfü dahou bie pesuoketuo rhüliete;
puoe kemejüro-u teshülie;
puo mha kepeka nunu puo dzie ketheshü mote;
puoe kuda tsiu dahou bu kra khouite;
uko kemezhie zhüte.
9Puo kharuko te kijü tsute;
puoe puo seiphiko peka tsiu bietshebietshawate;
puo kediu tsiu kedi nuonuokoe seyieko donu ba;
chatha ba sa mote,
tsiu puo siedzekesiko Jihova kinu ziemho ngu sa mote.
10Zion nuopfü phichüko kemekrie di kijü bate;
ukoe nyophe kelhoupie uko tsü gei shü mu gakhropfhe dzie bate;
Jerusalem rüüko u tsü pesupie kijü tsu tuote.
11A krakecü la a mhi meziete;
a va chü bate;
a se a rie kerülapie kijü shüwate,
a themiako pekawaketa la,
nhicuko tsiu kenunuoko nadiu chaüko nu phisia zhüketa la.
12Ukoe sie uko zuonuoko ki,
“Niekhrüda mu khubezu kirapuo ba ga?” si.
Ukoe nadiu chaüko nunu rüzakeliemia mhie phisia zhü,
ukoe u zuonuo merü geinu u kelhou voketa nhie.
13A n la mha kikecüpuo putuomu,
N pupie kedipuo mejütuo ga,
He-i Jerusalem nuopfü?
N khapie kedipuo mhie ütuo ga?
N nou thupeluoketuo la,
he-i, Zion nuo phousepfü!
Kekreilamonyü n pekakewae zhapie dzükezha mhiete;
supuonie n chü keshürho lalie ta?
14N siedzekesikoe n la kemeda mu mia sekedokecü ziemhoko ngushüte;
Ukoe miadie chü ketuo nu kela lalieketuo la,
n kephoumau hielashü mote,
derei n la kemeda mu cha tha kekrükecü die pukeshü ngu.
15N pfüthe kevoko pete u dzie dziedapie n kiete;
ukoe Jerusalem nuopfü pese tsiu tsüge di sie:
“Nadi hau üse,
zivi tsei zokecüu,
kijü pete keneiu üdi kieyakecüu me?” si.
16N ngumvümia pete u tie tiehiepie n petsou;
uko n pese, tsiu u hu thegeipie tuo,
ukoe sie: “Hieko puo mezuliete!
He-i, hieko merüketuo teisozhau sü haha tou zo;
tsie we hie süu ngushüte!”
17Jihovae chüketuou chüwate,
puo kepechüu se vorshüte;
puoe thiedzütho pupie ketuou,
ngumezhie moto di pekawate;
puo ngumvümia bu n gei u neikecüu chüshüte,
tsiu n ngumvümia kekuo chü pezhashüte.
18Niepuu ki shie petoshülie!#2:18 Cn: Ibri Uko meloue kra.
He-i Zion nuopfü dahouu!
Teisoteizei n mhidzü bu kerü puo tuoi kru tsuliecie!
Rüleita hie,
mu n mhi bu mhitshü hie!
19Sielie, theva gei krashülie,
rükhou therie nunu sede di!
Dzü kemhie di n nou rupie
Niepuu mhodzünu shülie!
N nuonuoko chaü pete nu merü di phisia zhüketako kerheiro la n dzie yhapie puo ki shülie.
20He-i, Jihova, mehoshüyi, sidi leshücie!
No supuo gei hau chüshü ga?
Thenupfümia bu u geinu kepar,
u penuokeshü nuonuoko cütieya me?
Niepuu kemesachüu nunu zievomia mu siedzekesimia dukhriwatuo me?
21Nhicumia mu phichümia chaüko nu tetsu zhüte;
a rüüko mu a khriesako zhiecha geinu tetsu;
no n nou meyieketa nhie uko dukhri,
ngumezhie moto di dukhriwate.
22Noe thenyi teinhie tuoi lutsahatsa nu a ngumvümiako kieshüte;
tsiu Jihova puo nou meyiekelie nhie miapuorei talie lho, morei rhei balie lho;
ae meho mu theke se sierkecüko a ngumvümia thuo pekawate.
Currently Selected:
Thekrü 2: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More