Habakuk 2
2
Ukepenuopfü Siedzekesiu Die Kelakeshü
1A rükhoubau nu thatuo,
siro a dahou gei batuo;
sidi puo a ki kedipuo pushütuo shicü,
mu a panyakeshüu puo kedipuo se a die kelatuo shi pfhe batuo.
2Sitse Jihova a pfhekhoshü sidi a ki:
Ziemho-u thuliecie;
mu süu thu kemecümecieshülie,
süu kephrümia bu se ta volieketuo la.
3Kekreilamonyü pethopie keba teiu la ziemho puo baluo,
süu thela dze pu, mu medaya mo.
Süu chü menuoketa mhie zorei, pfhe baliecie;
süu vor tou zotuo, süu chü menuotalie lho.
4Kemiako kebako mehoshücie!
Uko ruopfüu u gei puotou tuo mo,
derei kemiathomia we u kepele la rheilietuo.
5Sizomoü, kinyi#2:5 Ibri leshü huo nu Zu si. ha mha kese vie puo;
mia rünyü kemomia thalie lho.
Ukoe u mezha gapie Sheol tuoi thaya;
kesia puo kelhuo chülie kemo tuoi.
Uko la seyie pete kengulietaya,
sidi themia pete pie u vie mhieitaya.
Kerüzhüko gei Kemichie
6Kehoupuorei themia sikecümia petsou, tsiu u krenyükecü dieko se di uko ki,
“U vie kemo pie u vie chü pekralieyakezhako we ce, chülietie!” isi lho me?
Mia pie pfüshütuo üdi mhanyako pie puo thuo puo pie dalieyakezhamia kichiepuo si batuo ga?
7No u pupfü kebako mhai sier lho üme?
Tsiu n bie kemideshüketuoko colie lhoü ba me?
Sitse noe uko la teseketa vienya puo chütatuo.
8Noe seyie kekra pekawa,
süla themia lhiepie keba pete n pekatuo,
themia zie pekru, mu kijüu,
nadiko mu sünu lhou keba pete bie pesuokecü la.
9“Nie kiko la mha kesuo nunu kinyi pfhülieyakezhako,
kemezhiekecü nunu talietuo üdi nie kru chüpie kerükrie gei shülieyakezhamia we ce, chülietie!”
10Noe themia kekra dathewa di n kiu bu thenga kraliete;
noe n thuo n kelhou pejüwate.
11Ketsieko thuo sozha geinu melie partatuo,
siro no mela donunu mhanyhüpie kebako thuo süu die kelashütuo.
12“Nie thezie kepekru pie rüna chükelieko,
tsiu kephouma nunu rüna chükelieko we ce, chülietie!”
13Themia mhathomhachü sü mi ca chüketuo zo,
tsiu seyieko kemethuo puo la mhachü u nyie keba zo; haha krodiko Jihova kinu vor mo me?
14Derei dzüe dzükezha zepfü keba tuoi,
Jihova mhasi vithedze kechüu thuo kijüu tshupfülietuo.
15“U zanuomia bu krie mezelie di,
u kemenga ngu kemochie n noupfhüu#2:15 Moro Therei. rushüyakezhamia we ce, chülietie!”
16Noe zapuzayieu monyü mia bu ngumecükecüu n tshupfhü batatuo.
No n thuo kriecie,
sidi meze thuvüvü tuocie,
Jihova dzie puo zatsa hieu n ki vortuo,
sidi n zayieu gei thenga vortuo!
17Kekreilamonyü Lebanon gei mha kesuo chükeshü n vupfülietuo;
khunuo pekakeshüko n kechütatuo,
kekreilamonyü themia zie kepekru siro kijüu,
nadiko tsiu sünu lhou keba pete pekawacü la.
18Mharhiyakezhau la terhuorhi-e kedipuo mu!
mha lhopie rhikelie, kemeda kepetha.
Kekreilamonyü süu rhikeshüue puo thuo chükelieu peleya,
puo rhikelieue die pulieya kemo miarhi puo zoü rei!
19Sei üse, “Colie!”
tsiu die pulieya kemo ketsie ki,
“N thuo sielie!” iyakezhako we ce, chülietie!
Süu mia pethalie vi me?
Harie, süue suna mu rakachü pie kenhekecü rübei zo,
mu uko gei kerhei thesü tuo moto zo.
20Derei Jihovae puo kemesa rüsuoki nu ba;
kijü pete bu puo mhodzünu kemekrie bataliecie!
Currently Selected:
Habakuk 2: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More