Nugana 37
37
‘UPWA 37.
1Ta Iakobo ‘asa nina ‘ena tamana ‘i miamiana ‘ena ‘i miami, ‘asa Kanania. 2Getedi Iakobo natunao ‘adi tetera. Iosepa, ‘ana iakwara ‘e sebenitini, sipi iau ‘i e‘enidi tasinao ma‘edi; ta tauna tubuau Bila natunao ma‘edi, ta Silipa natunao ma‘ediao, tamana mwanenao: ta Iosepa tetera to‘umalina manudi ‘i me‘ena tamadi ‘enaia. 3Ta Iseraela Iosepa ‘i obobomena wawasae natunao iauiaudi ‘edia, tauna natuna tuta enega ‘i tai sinabwana ta ‘enega: ta ‘ana ‘oama iomwaiomwarina ‘i sailina. 4Ta tasinao si ‘itena ‘aene tamadi ‘i obobomena wawasae tasinao iauiaudi ‘edia; ta nuadi ‘i to‘umali ‘enaia, ta nigea kapekapeana ‘ena si da ona guguia. 5Ta Iosepa ‘i madawara, ta tasinao ‘edia ‘i simana: ta nuadi ‘i to‘umalina wawasae ‘enaia. 6Ta ‘i eonedi, Ia sidemi, madawara gete ni‘atu ia madawarena wa da nonona: 7Wa ‘ita, ta ‘enega, witi ta ebwagilina bagura ‘enaia, ta, wa ‘ita, ‘igu bwagila ‘i tooro, ta wate ‘i tooro paruparuna; ta, wa ‘ita, ‘imi bwagilao si sakowasiena, ta ‘igu bwagila ‘ena si bwagobwago. 8Ta tasinao si eonena, ‘O io nai ‘u da loinema? ‘O io nai ‘u da e‘inapwana ‘emaia? Ta ‘ina madawara manudi, ta ‘ina ona manudi nuadi ‘i to‘umali wawasae ‘enaia. 9Ta wate ‘e bweu madawara ‘i madawarena, ta tasinao ‘edia ‘i simanena, ta ‘i gwae, Wa ‘ita, wate ‘e bweu madawara ia madawarena; ta, wa ‘ita, sinara ta nawarae ta kwadima ‘e elebeni ‘eguia si bwagobwago. 10Ta tamana ‘ena, ta tasinao ‘edia ‘i simanena; ta tamana ‘i ba‘ena, ta ‘ena ‘i ona, To madawara gete ‘u madawarena? ‘Abo‘agu be, sinaio be, tasimuao be, ‘aene ‘a da bwagobwago ‘emuia bare‘uia? 11Ta tasinao si e‘ipi‘ipi manuna; ta tamana ona nina ‘i nua‘i‘isina. 12Ta tasinao si tauia be tamadi ‘ina sipi iau si da e‘enidi Sekema ‘enaia. 13Ta Iseraela ‘i ona Iosepa ‘enaia, Tasimuao nigea nai sipi iau si e‘enina Sekema ‘enaia? U da mai, ta ia da ‘etuneio ‘edia. Ta ‘i ona ‘enaia, ‘Abo‘agu. 14Ta ‘i eonena, Gete tuga ‘u da tauia, ‘u da ‘itadi nai tasimuao si bobo‘anaia, ta nai sipi iau bobo‘ana; ta ona ‘u da ‘ilenama. Ta ‘enega Eberona ‘abataunega ‘i etunena, ta ‘i mai Sekema ‘enaia. 15Ta ‘e bweu tai ‘i lobena, ta, wa ‘ita, mitawaia ‘i lopilidadana: ta tai ‘i eonena, ‘i gwae, To‘ase u ‘ebe‘ebese? 16Ta ‘i ona, Tasiguao ia ‘ebe‘ebesedi: ia sideio, ‘eguia ‘u da simana, mwa‘o sipi iau si e‘enidi. 17Ta tai ‘i ona, Gete ‘enega si tauia: ia nonodi si gwaegwaelia ta ‘enega, Ta da tauia Dotana ‘enaia. Ta Iosepa tasinao ‘i muriedi, ta Dotana ‘ena ‘i lobedi. 18Ta si ‘itena ‘edasoraia, ta nigea ‘i mema serabedia, ga si wasegigiena ‘aene si da ununa. 19Ta si eonaona ‘e bweuna ‘e bweuna. Wa ‘ita, to madawara gete ‘i memai. 20‘Enega wa da mai be ta da ununa, ta gaula ‘e bweuna ‘ena ta da ulena, be ta da ona, Bomitawa to‘umalina ‘e bweu i ‘enina: be ta da ‘ita to‘ase ‘i da apwesa ‘ina madawarega. 21Ta Rubena ‘i nonona, ta nimadiega i ‘etoseena; ta ‘i gwae, Gea‘abo ta loemwawasi. 22Ta Rubena ‘edia ‘i gwae, Gea‘abo rarana ta giedau; gaula gete mitawaia ‘ena ta da ulena, ta gea‘abo ta unuunu: ‘aene nimadiega ‘i da ‘etoseena, be tamana ‘ena ‘i da ‘ebwaea limane. 23Ta gete ‘i apwesa, ni‘atu Iosepa ‘i mai tasinao ‘edia, ga Iosepa ‘ana ‘oama si alolona, ‘oama iomwaiomwarina nina i ‘ote‘otena; 24Ta si giiaina, ta gaulaia si ulena; ta gaula nina kakaena, nigea boasinamo. 25Ta si miatoa sabi ‘e‘ai palaua: ta si ‘ita tu‘e ta si dune, ta, wa ‘ita, me Isimaela boda to lopilidadana Gileadega si mema, ‘idi kameliao gweda mamaina be, gweda ‘epuio be, gweda muro be, si lo‘a‘aridi, ‘i abe si lo‘a‘ara mwa‘uta Aigupito ‘enaia. 26Ta Iuda ‘i ona tasinao ‘edia, To‘ase ‘ana bobo‘ana ‘abo tasida ta ununa ta rarana ta sa‘u kwaiena? 27Wa da mai, ta da gimwaniena me Isimaela ‘edia, ta gea‘abo ta da unuunu; tauna tasida ta ‘enega, esioda. Ta tasinao si nonona. 28Ta me Midiana si tautauia, to gimwani; ta Iosepa gaulega si lisi tu‘eienama ta si ‘ewatu‘eiena, ta Iosepa si gimwaniena me Isimaela ‘edia sileba ‘e tweniti manudi. Ta Iosepa si ‘au‘ewena Aigupito ‘enaia. 29Ta Rubena i ‘ila gaula ‘enaia; ta, wa ‘ita, Iosepa nigea gaulaia; ta ‘ana ‘oama ‘i gisabudi. 30Ta tasinao ‘edia i ‘ila, ta ‘i gwae, Goama nigea ‘i miami; ta ‘abo‘agu, mwa‘onai ia da tauia? 31Ta Iosepa ‘ana ‘oama si ‘ewena, ta gota‐me‘olotona si ununa, ta ‘oama si sa‘u mwa‘utena rara ‘enaia; 32Ta ‘oama iomwaiomwarina si ‘etunena, ta tamadi ‘ena si me‘ena; ta si gwae, Gete ‘a lobena: ‘u da ‘ita nai natuio ‘ana ‘oama nai nigea. 33Ta ‘i mwaratonina, ta ‘i gwae, Gete natugu ‘ana ‘oama; bomitawa to‘umalina ni‘atu i ‘enina; ona‘ai‘aila Iosepa ‘i sabulelewanena. 34Ta Iakobo ‘ana ‘oama i gisabuna, ta tolobwana ‘ena ‘oama ‘oausa i ‘otena, ta ‘asiata iauna ‘i dedoi natuna manuna. 35Ta natunao me‘olotodi iauiaudi ta natunao mewainedi iauiaudi si tooro sabi gienuabobo‘anena; ta nuabobo‘ana geanuana; ta ‘i gwae, ‘Ari‘ari ‘ena ia da tauia ta ‘enega natugu ‘enaia ma‘igu dedoi. Ta tamana ‘i dedoi manuna. 36Ta me Midiana si gimwaniena Aigupito ‘enaia Potipara ‘ena, Parao ‘ina to‘ita‘i‘isi ‘e bweu, to losaia ‘idi ‘inapwana.
Currently Selected:
Nugana 37: DOBOT
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society in 1919
