Rut 1
1
E familia katar o Elimelek ando Moab
1Kana ando Israel gazdarina e krisaria, avile llivesa kai ni saia so te jan ande sa goia phuv. Ondaka iek lleno katar o Belen katar e Judea, llelo te zivil nesavo vreme ando Moab, ta llele lea leki rromi, ta leke dui chaurre. 2Gua lleno ikhardola Elimelek, a leki rromi ikhardola Noemi, ta leke chaurre ikhardona Malon ta Kilion. Saurre sea efrateura#1.2 Efrateura: Aver anav katar o Belen saia Efrata. katar o Belen, ta achile te zivin kote.
3Nakhla nesavo vreme, ta o Elimelek o rrom katar e Noemi mulo, ta voi achili korkorre pe duie chaurrenchar. 4Mapalal lake chaurre zinisaile duie diskinienchar moabite, iek ikhardola Orfa a ogoia ikhardola Rut. Ta kote zivisarde des burs 5ta mulo o Malon ta i o Kilion, ta e Noemi achili korkorre, bi chaurrenchar ta bi rromeko.
E Noemi ta e Rut llan ando Belen
6Iek llive e Noemi asunda ando Moab kai e Devleke avila zalba katar po foro, ta kai cherda te na avel ios bok. 7Ondaka mangla te irilpe pe duie borienchar ando Juda, ta lleletar katar o Moab. 8A e dromea e Noemi phenda lenge gia:
Llan, ta irin tumen suako iek kai pe deako cher. O Del te avel tumenchar lacho, gia sar tumen avilen lache manchar, ta me chaurrenchar.
9Ta te cherel o Del te zinin tumen, ta te zivin vesele suako iek ande pe rromeko cher. Mapalal chumidia len, a von thode te roven, 10ta phende lake:
¡Iok! ¡Amen ka iri amen tuia ande chi phuv!
11A e Noemi pale phenda:
Llantar chorralen, ¿soke mangen te achen manchar? Man ni ka aven ios chaurre te zininpe tumenchar.#1.11 Omanglal kana iek diskinia achela phivli, o phlal lake rromeko saia te zinilpe laia.
12Llan kai tumare chera. Me sen but phuri te ziniu man pale. A i te sai ziniva man pale isto gaia riat, ta i te avena man minone, 13¿Tumen adurichardena te barion ta te zinin tumen lenchar? Iok, chorralen, na cheren goia ezgoda. O Del bichalda mange iek bari patnia, ta mai but zalba avela mange te dikhav kai tumen nakhen patnia.
14Von pale thode te roven. Ta e Orfa mai anglal te llaltar chumidia e Noemia, a e Rut achili laia. 15Ondaka e Noemi phenda e Rutake:
Asun, chi baia llaltar kai pi phuv ta kai pe dela, llatar laia.
16A e Rut phenda lake:
¡Na mang mandar te mukav tut, ta te fuladivav tutar! Soke me ka llav kote kai tu ka lla, ta ka ziviu kote kai tu ka zivi. Cho foro ka avel mo foro, ta cho Del ka avel mo Del.
17Kote kai ka mere tu, ka merav i me, ta kote mangav te prajon man. ¡O Del te dukhavel man zurale me te mukava tut, samo te merava sai mukava tut!
18Kana e Noemi dikhla kai e Rut ni kamela te mukel la, ni phenda lake niso ios, 19ta e dui llele e dromea, ta avile ando Belen. Ta kana die ando Belen, avilape iek bari burkania ande sa o foro, ta e diskinie phenena:
¿Voi si e Noemi?
20A voi phenda lenge:
Na ikharen man ios Noemi,#1.20 Ande chib katar e ebreura Noemi si gugli, a Mara si cherki. akana ikharen man Mara, soke o Del kai si le sa e zor, cherda te cherkiol mo zivoto. 21Likistem katar pherde vastenchar, a akana inai man niso, soke gia manglale o Del. ¿Soke ikharen man Noemi, kana o Del kai si le sa e zor dia man gaia duk?
22Gia si sar irisaile ando Moab e Noemi, ta laki bori e Rut e moabita. Ta avile ando Belen ande llivesa kana lena te chiden e sebada.
Currently Selected:
Rut 1: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.