Romanos 15
15
1Gola kai sam zurale ando pachape morabi te pomozi golen kai inai zurale ta te roda lenge o lachipe, a na te roda amaro lachipe. 2Suako lleno morabi te rodel avereko lachipe ta te pomozi le te bariol ando lachipe. 3Soke ni o Kristo ni lia sama petar, soke ando Pisipe phenel gia:#Sal 69.9.
O kusipe katar e llene kai kusena tut avilo pe mande. 4Sa so pisisarde omanglal si te sikiva. Ta gala alava den amen zor te cheren amen te terpi ta den amen pachape ande so adurichara. 5A chachimaia, o Del si kai cherel amen te terpi ta del amen e zor. Letar mangav te pomozil tumen te aven ando volipe saurrenchar, ta te zivi prema sar zivisarda o Jesus. 6Ta gia saurre ande iek than, ta ande iek avazi te blagosin e Devle ta Dad katar amaro Gazda o Jesukristo.
7Goleke len iek avere, gia sar o Kristo lia tumen, gia ka avel blagosime o Del. 8Sai phenav tumenge kai o Kristo avilo te avel esluga e judionengo te sikavel kai o Del phenda o chachipe kana dia po alav amare puranenge ta kai o Del si chacho kana del po alav. 9Ta avilo i kai gola kai inai judiura te sai blagosin e Devle pala leko volipe, soke gia phenel o Pisipe:#2 S 22.50; Sal 18.49.
Goleke ka blagosiv tut maskar e phuvia
ta ka llilabau chuke llilia.
10Pe aver rig phenel gia o Pisipe:#Dt 32.43.
¡Veselin tumen phuvialen, e Devleke foroia!
11A pe aver rig phenel gia:#Sal 117.1.
Phuvialen ta sa e forura,
¡Blagosin e Gazda!
12I o Isaias pisisarda:#Is 11.10.
Ka likel katar e viche e Isaieki iek chavo,
kai ka vazdiniaol te gazdaril e phuvien,
ta von ka pachan ande lete.
13O Del kai del o pachape, te del tumen bari veselia ta pas tumen kai pachan ande lete, ta te del tumen but pachape ande zor katar o Santo Duo.
E buchi katar o Pablo
14Phlalalen pachau kai tumen sen pherde volipe ta kai llanen but, ta llanen te sikaven iek avere, 15A ande gava lil avila mange te pisiv tumenge chachimaia katar nesave ezgode, te na bristaren tumen. Cherau le soke o Del avilo lacho manchar, 16te avav esluga katar o Kristo Jesus ta te pomoziu e llenen kai inai judiura. Goleke pala o lachipe katar gola kai inai judiura morabi te avav lenge sargo iek popo, te dav len e lachi viasta e Devleki ta te inllarav len angla lete sargo iek ezgoda dini sukar, dini samo leke ta blagosime katar o Santo Duo.
17Sai cherav baripe ando Kristo Jesus katar o rado kai cherdem e Devleke, 18chachimaia ni ka dav ni iek orba te na avela katar so cherda o Kristo manchar te sai inllarel e llenen kai inai judiura te kanden e Devle. Ta cherda le me alavenchar, ta pala e ezgode kai cherdem, 19pala e bari zor katar o Santo Duo cherdem e bare ezgode Devlikane. Ta gia inllardem ta phendem e lachi viasta e Jesukristoki, pe suako rig katar o Jerusalem llik kai e phuv katar o lliria. 20Me suako drom thodem man te phenav e lachi viasta, kote kai nikada ni asunde katar o Kristo, gia te na lau o rado kai aver llene cherde. 21Goleke manglem te cherav so phenel o Pisipe:#Is 52.15.
Ka dikhen le ta ka acharen le gola kai nikada ni asunde ni iek orba leki.
O Pablo mangel te llal ande Roma
22Goleke nasti llelem te dikhav tumen, a ande mo mislo saia te llau.#Ro 1.13. 23A akana, kai cherdem mo rado ande gaia phuv, ta sar cherel but burs kai mangav te dikhav tumen, 24misliu man kai sai ka cherav le kana ka llau ande España. Ni ka avel man but vreme te achav tumenchar, a llanav kai ka veseliu man but tumenchar ta misliu man, tumen te pomozin man te resav e dromea incha kai llau. 25A akana llau ando Jerusalem te inllarav love te pomozi e llenen kai zivin ando Jerusalem ta kai pachan ando Jesukristo. 26Soke e llene katar e Masedonia ta katar e Akaia mangle te chiden love te bichalen e phlalenge kai si chorre ando Jerusalem.#1 Kor 16.1-4. 27Von petar mangle te cheren le, a chachimaia von trubula te cheren le, soke gia sar e judiura kai pachan fulade so saia len ando duo e llenenchar kai inai judiura, i von morabi te pomozin e judionen kai pachan e ezgodenchar kai si len pe gaia phuv.#1 Kor 9.11. 28Goleke kana me ka lacharav gaia ezgoda ta kana ka dav lende so si chidino, ka llau ande España, ta kotar ka llau te dikhav tumen. 29Ta me llanav kai kana ka llau tumende ka fulavav tumenchar sa o blagosipe katar e lachi viasta e Kristoki. 30Me moliv man tumenge phlalalen, pala amaro Gazda o Jesukristo, ta pala o volipe kai del amen o Santo Duo, te molintumen but e Devleke pala ma. 31Mangen e Devletar te arakhel man ande phuv katar e Judea katar e llene kai ni pachan ande lete, ta e love kai inllarav e phlalenge katar o Jerusalem, te lenlen lachimaia. 32Ondaka te mangela o Del sai ka llau tumende veselimaia, ta te avel man e dragostia ta avav tumenchar. 33O Del kai del amen e pas, te avel suakone llenea. Gia te avelpe.
Currently Selected:
Romanos 15: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
