Salmos 9
9
Blagosipe pala o chachipe e Devleko
Katar o lleno kai sikavel te llilaben. Basaldi ande firura ta ande arpe. Llili e Davideki.
1¡Ioi Devla!
mangav te blagosiv tut sa me liea,
ta mangav te phenav katar cho baripe.
2Ioi Devla kai san baro,
mangav te urkiu veselimaia,
¡mangav te llilabav chuke!
3Me dusmanura nasen angla tu,
peren ta meren.
4Tu san iek krisari chacho,
bese pe cho trono te chine mange kris.
5Dian pe llene kai ni pachan ande tute,
zatrisardan e bilache llenen,
¡nikada ni ka denpe golli lendar!
6O dusmano mulo,
ta lea mule leke forura.
Tu zatrisardan len,
ta ni achila lendar ni o mislo.
7A o Del si charo ostade,
vou besel pe po trono te chinel e kris.
8Ka krisil e sueto chachimaia,
ka chinel iek kris orta e phuvienge.
9O Del arakhel e llenen kai nakhen patnia,
vou arakhel len ando vreme katar e nuzda.#Sal 37.39.
10Devla,
gola kai pinllaren tut si len vera ande tute,
tu nikada ni muke e llenen kai roden tut.
11Llilaben e Devleke kai charoil ando Sion,
phenen e phuvienge so cherda vou.
12O Del dikhel pe llene kai nakhen patnia,
ta ni bristarelpe katar lengo roipe.
Dukhavel golen kai si lenchar silne.
13Devla, te avel chuke zalba mandar,
dik sar dukhaven man gola kai murzin pe mande,
¡ikan man katar e udara e merimake!
14Ta gia angla e udara katar o Jerusalem,
ka phenav sa e suetoke kai tut si te blagosi,
ta kai sem veselo soke braduisardan man.
15E llene kai ni pachan ando Del,
peren isto ande po kojaipe,
lenge porrne achen istarde
ande mreza kai isto von gurude.
16O Del cherda te pinllaren le.
¡Cherda o chachipe!
O bilacho achel phanglo
ando kojaipe kai isto vou thoda.
17E bilache llene ta gola kai ni pachan ando Del,
gola kai bristarenpe katar o Del,
ka achen ando meripe,
18soke e chorre ni ka aven bristarde ostade,
ta nikada ni ka jasaren so aduricharen.
19Uste Devla,
cher te na dobin e manusa,
¡krisisar e llenen kai ni pachan ande tute!
20Cher te avel lenge dar Devla,
¡cher len te llanen kai von si samo manusa!
Currently Selected:
Salmos 9: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
