Salmos 71
71
O molipe katar iek phuro
1Devla, tute gurudivav,
¡na muk man ando lallao nikada!
2¡Braduisar man pala cho chachipe, soke tu san chacho!
Thou mange sama, ta braduisar man.
3Tu san mange o barr kai arakhel man,
¡tu san e charoina kai gurudivav ta mo braduipe!
¡Tu san mo barr ta mi charoina!#Sal 31.1-3.
4Murno Del,
na muk te perav ande va
katar o bilacho manus,
ande va katar o lleno kai mundarel
ta katar o silno,
5soke tu Devla, sar kana sema ternorro
san so aduricharav ta ande tu uzdiu man.
6Kana sema ando lli me dako
sar kotar istardivav pe tute.
¡Tu cherdan te biandivav!
¡Me ka blagosiv tut suako llive!#Sal 22.9-10.
7But llene chudisaile mandar,
a tu arakhe man.
8Sa o vreme mo mui si pherdo blagosipe
pala cho baripe.
9Na muk man pe iek rig kana ka avav phuro,
na muk man chudino kana ni ka avel man zor.
10Me dusmanura kai mangen te mundaren man
chidinaile ta denpe orba te vazdiniaon pe mande.
11Von phenen gia:
¡Llan pala le ta istaren le,
soke o Del mukla le chudino
ta niko nasti braduil le!
12¡Ioi devla! na duriu mandar
¡aide oma te pomozi man!
13¡Te aven thode ando lallao ta te aven zatrime
e dusmanura kai murzin pe mo zivoto!
¡Te meren lallaimatar gola kai roden mi zatrania!
14A me ka aduricharav suako llive,
ta ka blagosiv tut suako drom mai but,
15sorro llive ka dav orba katar cho chachipe
ta katar cho braduipe.
¡Ta gachin kai nasi llinav len!
16Ka phenav e bare ezgode kai cherdan tu Devla.
¡Ka phenav kai samo tu san chacho!
17¡Ioi Devla!
tu sikadan man sar kana sema terno,
ta llik allive me ka dav orba katar che bare ezgode.
18A akana Devla kai avel o phuripe
ta e bal parrne, na muk man,
soke trubul te dav orba katar chi zor
gale llenenge ta i golenge kai si te aven mai angle.
19¡Ioi Devla! cho chachipe resel llik kai o miloso,
tu cherdan bare ezgode,
¡Inai niko sargo tu, Devla!
20Tu kai cherdan te dikhav
bare zatranie ta duk,
ka chere te ziviu pale,
ka ikane man katar e bari jar e suetoki,
21ka de man mai but baripe
ta pale ka de man zor.
22A me, ka llilabav ta ka blagosiv cho chachipe
ande arpa,
murno Del, Santo katar o Israel.
23Me us ka veselinpe kana ka llilaben chuke
ta i mo zivoto kai tu braduisardan.
24Mi chib ka phenel sa o vreme
kai tu san chacho,
soke e llene kai rodena mange o bilachipe
achile ando lallao.
Currently Selected:
Salmos 71: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
