Nejemias 12
12
E popura ta e levitura
1Gala si e popura ta e levitura kai irisaile katar e Babilonia e Zorobabelea, chavo katar o Salatiel, ta e Jesueea:
O Seraias, o Jeremias, o Esdras, 2o Amarias, o Maluk, o Jatus, 3o Sekanias, o Rejum, o Meremot, 4o Iddo, o Gineto, o Abias, 5o Mijamin, o Maadias, o Bilga, 6o Semaias, o Joiarib, o Jedaias, 7o Salu, o Amok, o Jilkias ta o Jedaias. Gala sea e gazda katar e popura ta lengi familia, kana zivila o Josue.
8Ta e levitura:
O Jesua, o Binui, o Kadmiel, o Serebias, o Juda ta o Matanias, kai blagosina e Devle ando llilabipe. 9Ta i o Bakbukias ta o Uni, llilabena lenchar ta cherena pi buchi.
10O Jesua saia o dad katar o Joiakim, ta o Joiakim saia o dad katar o Eliasib, ta o Eliasib saia o dad katar o Joiada, 11o Joiada saia o dad katar o Jonatan, ta o Jonatan saia o dad katar o Jadua.
12Ande llivesa katar o Joakim, e popura gazda katar e familia sea:
Katar e familia e Seraiaseki, o Merias, katar o Jeremias, o Jananias, 13katar o Esdras, o Mesulam, katar o Amarias, o Jojanan, 14katar o Meliku, o Jonatan, katar o Sebanias, o Jose, 15katar o Jarim, o Adna, katar o Meraiot, o Jelkai, 16katar o Iddo, o Zakarias, katar o Gineto, o Mesulam, 17katar o Abias, o Zikri, katar o Miniamin, katar o Moadias, o Piltai, 18katar o Bilga, o Samua, katar o Semaias, o Jonatan, 19katar o Joiarib, o Matenai, katar o Jedaias, o Uzi, 20katar o Salai, o Kalai, katar o Amok, o Eber, 21katar o Jilkias, o Jasabias, ta katar e familia e Jedaiaseki, o Natanael.
22Ande llivesa katar o Eliasib, o Joiada, o Jojanan ta o Jadua, ta llik kana charoisarda o Dario o persa, pisisarde ando lil e foroko e anava katar e levitura sargo gazda katar e familia, ta i e poponengo anav. 23A e anava katar levitura gazda katar e familia, achile pisime ando lil e foroko llik ande llivesa katar o Jojanan, unuko katar o Eliasib. 24E gazda katar e levitura sea:
O Jasabias, o Serebias, o Jesua chavo katar o Kadmiel, o Binui, ta leke amal sea angla lende te blagosin ta te den fala e Devle kana avela lengo vreme te cheren le, gia sar phenda o David, manus e Devleko. 25Ta e llene kai arakhena e udara anglune sea:
O Matanias, o Bakbukias, o Abdias, o Mesulam, o Talmon ta o Akub. 26Von zivisarde ande llivesa katar o Joiakim, chavo katar o Josue ta unuko katar o Josadak, ta ande llivesa kana gazdarila o Nejemias, ta saia o Esdras kai saia popo ta kovachi.
Blagosin o zido
27Kana avilo o llive te avel blagosime o zido katar o Jerusalem, llele te roden sa e levitonen kaigo zivina, ta inllarde len ando Jerusalem te sai cheren o blagosipe katar o zido veselimaia, blagosina, llilabena, ta basalena o platillo, e arpa ta e lira. 28Ta e levitura kai llilaben avilea katar e forura kai sea truial katar o Jerusalem, ta katar e forichura katar o Netofa, 29katar e chera kai si ando Gilgal ta katar e vosa katar o Geba ta katar o Azmavet, soke e llene kai llilabena cherdea pe chera truial katar o Jerusalem. 30Ondaka e popura ta e levitura, cherde prema o zakono katar o jaladipe, ta cherde le i e llenenchar katar o foro, ta e udarenchar kai si ando foro ta e zidoia.
31Mapalal cherdem te liken po zido sa e llene kai gazdarin ando Juda, ta fuladem pe dui sa e llenen kai llilabena. E purvo llene kai llilabena phirena pe rig e chachi, karing o udar kai likel kai o llubri. 32Ta pala e llene kai llilabena llala o Osaias ta dopas katar e llene kai gazdarina ando Juda: 33o Azarias, o Esdras, o Mesulam, 34o Juda, o Benjamin, o Semaias ta o Jeremias. 35Katar e popura, basalena lenchar ande tuturuge:
O Zakarias, chavo katar o Jonatan, kai leke purane sea o Semaias, o Matanias, o Mikaias, o Zakur ta o Asaf, 36ta i katar leki familia o Semaia, o Azareel, o Milalai, o Gilalai, o Maai, o Natanael, o Juda ta o Janani. Von basalena prema e basalde kai sea e Davideke, manus e Devleko. Angla lende llala o pismiri Esdras. 37Ta upral po udar e paieko kai likel katar e phuv, llana angle chak upral po zido, likiste katar e escalere katar o cher e Davideko ta llik kai o udar e paieko kai si pe rig katar likel o kham.
38E duito llene kai llilabena phirena pe rig stingo. Me llava pala lende upral po zido ta manchar llala o gua dopas katar o foro, katar e torre katar e furnave llik kai o zido bulo, 39kana nakhle o udar katar o Efrain, o udar katar o Jesana, o udar katar e mache, e torre katar o Jananel ta e torre katar e Stotina, llik kai o udar katar e bakre, ta achilam kai si e llene kai arakhen o udar katar rubie. 40Mapalal e dui dopasina katar e llene kai llilabena thodepe pe po than ando cher e Devleko, ta thodem man i me, ta i o dopas katar e llene kai gazdarina ta kai llana manchar.
41E popura kai basalena e tuturuge sea:
O Eliakim, o Maaseias, o Miniamin, o Mikaias, o Elioenai, o Zakarias, o Jananias, 42o Maaseias, o Semaias, o Eleazar, o Uzi, o Jojanan, o Malkias, o Elam ta o Ezer. Ta e llene kai llilabena kai sikavela len o Izrajias, llilabie saurre ande iek than zurale.
43Gua llive cherdile but kurbanura, ta e llene veselisaile but soke o Del pherda len dragostia. E diskinie ta e minone i von veselisaile but, ta e veselia kai saia ando Jerusalem asundola but duratar.#Esd 6.17.
So jana e popura ta e levitura
44Ande gola llivesa thode llenen te arakhen e sobe kai andre guruven e ezgode katar o cher e Devleko, kote guruvena:
E ezgode dine, e purve septelie ta e des katar e stotina. Gua saia so avela katar e umalia katar suako foro, ta prema o zakono saia te den len kai e popura ta kai e levitura, soke o foro saia veselo katar o rado kai cherena e popura ta e levitura. 45Von, e llene kai llilabena ta e llene kai arakhena e udara, sea kai cherena gua blagosipe e Devleke ta i o zakono katar o jaladipe, gia sar phenda o David ta leko chavo o Salomon.#1 Kr 25.1-8; 1 Kr 26.12. 46Soke omanglal, ande llivesa katar o David ta katar o Asaf, sea gazda katar e llene kai llilabena, sea llilia blagosimake ta chidiniaona te den fala e Devle.
47Goleke, ande llivesa katar o Zorobabel ta katar o Nejemias, sa e llene katar o Israel dena suako llive o jape e llenenge kai llilabena ta e llenenge kai arakhena e udara, ta dena i kai e levitura so perela len, ta von cherena isto gua e llenenchar kai sea porodo katar o Aaron.
Currently Selected:
Nejemias 12: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
