Mateo 28
28
O Jesus ustel katar e meripe
Mk 16.1-8; Lk 24.1-12; Jn 20.1-10
1Kana nakhlo o sabado kana llivosaola o purvo llive, e Maria Magdalena ta o goia Maria llele te dikhen o limori. 2Ta ondaka dermosaili e phuv but zurale soke iek suecho e Devleko fulisto katar o miloso ta ikanda o barr kai saia po udar katar o limori, ta beslo upral po barr. 3O suecho saia sargo iek esterlicha ta leke patave parrne sargo o iv. 4E boñikura izdraie daratar ta achile sargo mule. 5A o suecho phenda e diskinienge:
Tumen na daran soke me llanav kai tumen roden e Jesuse kai krustosarde. 6Vou inai kate soke ustilo katar o meripe gia sar phendaia, aven dikhen kote kai thode e Gazda. 7Akana llan oma ta phenen leke disipulonenge kai ustilo katar o meripe ta llal angla tumende ande Galilea, kote ka dikhen le, gala alava me saia te phenav tumenge.
O Jesus sikadol e diskinienge
8Ondaka von lleletar daraia katar o limori ta i bare veselimaia lleletar prastindo te phenen e disipulonenge. 9A kana von llana te phenen e disipulonenge, o Jesus llelo te maladol lenchar ta phenda lenge: Salami, a von avile pase pasa leke porrne ta dodisardelen ta blagosisarde le. 10Ondaka o Jesus phenda lenge:
Na daran llan phenen e viasta me phlalorrenge te sai llan ande Galilea ta kote ka dikhen man.
E boñikura bichindon pala e love
11Kana von llana, nesave katar e boñikura llele ando foro ta phende e mai preche poponenge sa e ezgode kai nakhlea. 12Von chidinaile e phurenchar ta achile pe orba ta die but love e boñikonen. 13Ta phende lenge:
Tumen ka phenen gia kai leke disipulura avile orachaia ta vazdiele kana amen sovaia. 14A te asunda gava Pilato amen ka phena leke te na cherel tumenge niso.
15Von lie e love ta cherde isto gia sar phendea lenge, ta gaia si e viasta kai lleli maskar e judiura llik allive. 16A e desuiek disipulura lleletar ande Galilea, po burdo kote kai o Jesus phendaia lenge.#Mt 26.32; Mk 14.28. 17Kana dikhle e Jesuse blagosisarde le, a nesave ni pachana.
Llan te cheren disipulura
Mk 16.14-18; Lk 24.36-49; Jn 20.19-23
18O Jesus avilo mai pase ta dia lenchar orba ta phenda lenge: Sa e zor si dini mange ando miloso ta i pe phuv. 19Goleke llan ta cheren disipulura pe sa e phuvia ta kristin len ando anav e Dadeko e Chaveko ta ando Santone Duoko.#Ech 1.8. 20Ta sikaven len te arakhen sa ezgode kai phendem te cheren, ta me sem tumenchar suako llive llik o son e suetoko. Gia te avelpe.
Currently Selected:
Mateo 28: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
