Mateo 27
27
O Jesus angla o Pilato
Mk 15.1; Lk 23.1-2; Jn 18.28-32
1Thiarinako rano avile sa e mai preche popura ta i e phure e foroke, ta chidinaile te denpe orba te sai mundaren e Jesuse. 2Ta inllarde le phanglo ta diele kai o Ponsio Pilato, gua kai gazdarila goia phuv.
Sar mulo o Judas
3Ondaka o Judas, gua kai bichinda e Jesuse, kana dikhla kai mangena te mundaren le, irisarda keime e tranda tolaria rupune kai e mai preche popura ta i kai e phure.#Ech 1.18-19. 4Ta phenela:
Me cherdem bilachipe soke dien o rat kai ni saia dos pe lete.
A von phende leke:
¿A so chitilpe amenge? ¡Dik tu so ka chere!
5Ondaka o Judas chudia e tolaria rupune ando cher e Devleko, likisto kotar ta umbladape.
6E mai preche popura lie e tolaria rupune ta phende:
Inai sukar te thova gala love ande ogola love kai chidiniaon ando cher e Devleko soke si love kai lenchar pochinde rat.
7Kana diepe orba chinde gole lovenchar e umal katar o manus kai cherel piria chikake te sai cheren limoria gole llenenge kai aven avere phuviatar. 8Goleke goia umal ikhardol llik allive:
Umal rateki. 9Gia cherdile e alava kai phendaia katar o profeta Jeremias kana phenda:
Ta lie e tranda kotora rupune, gua saia so chinadea e israelitura te pochinen gole kai mol le but, 10Ta die e tolaria pe umal katar o manus kai cherel piria chikake gia sar phendaia mange o Gazda.#Zak 11.12-13.
O Pilato puchel e Jesuse
Mk 15.2-5; Lk 23.3-5; Jn 18.33-38
11O Jesus saia pe porrne angla o Pilato ta o Pilato puchla le:
¿San tu o charo e judionengo?
O Jesus phenda leke:
Tu phendanle.
12Sa e mai preche popura ta i e phure dosarena le a o Jesus ni phenela niso lenge. 13Ondaka o Pilato phenda leke:
¿Ni asune pe gachin ezgode phenen te dosaren tut?
14A o Jesus ni phenda niso leke pe sa e orbe kai puchenale. Pala gua o Pilato chudilape but.
Chinaven o meripe e Jesuseko
Mk 15.6-20; Lk 23.13-25; Jn 18.38—19.16
15A po llive katar e Paskua, o Pilato saia sikado te mukel e foroke iekhe phangle save von mangena. 16Ondaka sar saia iek phanglo but asundo kai ikhardola Barrabas, 17sar o sueto saia chidino, o Pilato puchla len:
¿Ka mangen te mukau tumenge:
E Barrabase o e Jesuse kai ikharen le o Mesias?
18Soke o Pilato llanela kai von inllardea lete e Jesuse te phanden le soke von murzina po Jesus.
19Ta kana o Pilato besela pe kris leki lluvli bichalda te phenen leke: Te na ami tut niso gale chache manusea soke allive but dukhadi sema ande sune pala gava manus.
20A e mai preche popura ta e phure cherde sa e sueto te mangen a Barrabase a e Jesuse te mundaren. 21O Pilato phenda lenge:
¿Savo katar e dui mangen te mukliarav tumenge?
A von phende:
¡E Barrabase! 22O Pilato phenda lenge:
¿A so ka cherav e Jesusea kai ikharen le o Mesias?
A saurre phende:
¡Te avel krustome!
23O Pilato phenda lenge:
¿A savo bilachipe cherda?
A von ios urkina ta phenena:
¡Te avel krustome!
24Sar o Pilato dikhela kai ni blazila leke e orba kai dela ta kai o sueto mai but urkila, lia pai ta jalada pe va angla o foro ta phenda:#Dt 21.6-9.
Me ni sem dosalo katar o rat katar gava manus chacho, dikhen tumen so ka cheren.
25Sa o sueto phenda:
¡Leko rat te perel pe amende ta pe amare chaurre!
26Ondaka mukla lenge e Barrabase, mapalal phenda te chalaven e Jesuse e bichoia ta diale te kruston le.
27Ondaka e boñikura katar o Pilato inllarde e Jesuse kai e krisako cher ta chidie truial lete sa e boñikonen, 28ta sar nangarde le, chudie upral pe lete iek gertachi lolo. 29Ta cherde iek korona katar e karrne ta thodela pe leko soro, ta thode ande leko va o chacho iek kas, ta die changa angla le, ta espurnaia phenena:
¡Salve, charo e judionengo!
30Ta chungardena le ta isto e kastea chalavena le po soro. 31Ta kana marde espurnia, lie letar o gertachi, thode leke patave, ta inllarde le te kruston le.
O krustope ta o meripe e Jesuseko
Mk 15.21-32; Lk 23.26-43; Jn 19.17-27
32Kana likena, malade iekhe manuse katar o Sirene kai ikhardola Simono, gale llene pe zor cherde le te inllarel o krusto.
33Ta kana avile pe iek rig kai ikhardola Golgota, gua alav si:
E rig katar e kokala, 34die le te piel vinagre amime patrenchar cherke, a kana o Jesus zumada ni kamla te piel. 35Kana kafrosarde le, e boñikura fulade maskar pete leke patave, ta chelenape te dikhen ko ka achel leke patavenchar, te sai cherdol so phendaia o profeta: Fulade maskar pete me patave ta cheldepe ko ka achel me patavenchar.#Sal 22.18. 36Ondaka besle kote te arakhen le. 37Ta upral katar saia leko soro thode gala alava pisime: Gava si o Jesus, o charo e judionengo.
38Ondaka krustosarde lea duie choren, iek pe rig e chachi ta aver po stingo. 39A e llene kai nakhena angla le marena mui letar,#Sal 22.7; 109.25. 40ta phenena:#Mt 26.61; Jn 2.19.
¡Tu kai perave o cher e Devleko ta ande trin llive vazdele! ¡Braduisar isto tut te san o Chavo e Devleko ta fulie katar o krusto!
41Ta isto gia e mai preche popura, marena mui letar ta i e kovacha e zakonoke ta e fariseura ta i e phure phenena:
42Averen braduisarda, a vou pe nasti braduil, te si o charo katar o Israel, te fuliel akana katar o krusto, ta ka pacha ande le. 43Pachaia ando Del, ¡o Del te braduil le, soke phenda:#Sal 22.8.
Me sem o chavo e Devleko!
44Ta i e chor kai sea krustome pasa le kusena le.
Sar mulo o Jesus
Mk 15.33-41; Lk 23.44-49; Jn 19.28-30
45Ta katar e desudui e lliveseke llik kai e trin sa phuv achili ando truniariko. 46Ande gua saiato, o Jesus bare avazea phenda:#Sal 22.1.
Eli, Eli, ¿lama sabaktani? gava si: Murno Del, Murno Del, ¿soke muklan man?
47Nesave llene kai sea kote, asunde le, ta phende:
Gava ikharel e profeta e Eliase.
48Ta isto kote prastia iek lendar, lia iek pamuko, ta chingardale e vinagrea kai saia amime e patrenchar cherke ta thoda le pe iek kas ta diale te piel.#Sal 69.21. 49A ogola llene phenena:
Muk, dikha o ka avel o Elias te braduil le.
50A o Jesus pale urkisarda ando baro avazi, ta mulo. 51Ta e kortina katar o cher e Devleko chindilo pe dui kotora upral llik tele, ta e phuv dermosaili ta e barra phagona,#Ek 26.31-33; 2 Kr 3.14. 52ta e limoria putaile, ta e esnage bute santonenge kai mulea, ustile, 53ondaka kana o Jesus ustilo katar o meripe, von llele ando foro santo katar o Jerusalem, ta sikadile bute llenenge.
54O boñiko ta i gola kai arakhena e Jesuse, kana dikhle kai e phuv dermosaili, ta e ezgode kai nakhlea, avila lenge bari dar ta phende:
¡Chachimaia gava saia o Chavo e Devleko!
55Kote sea but diskinie kai dikhena duratar, gola diskinie llelea pala o Jesus ta pomozisardea le chak katar e Galilea, 56Maskar gola diskinie saia e Maria Magdalena, e Maria e dei katar o Santiago ta i katar o Jose, ta e dei katar e chaurre katar o Zebedeo.#Lk 8.2-3.
Thode e Jesuse ando limori
Mk 15.42-47; Lk 23.50-56; Jn 19.38-42
57Kana peli e riat, avilo iek lleno barvalo katar e Arimatea kai ikhardola Jose, i vou saia iek katar e llene kai llana pala o Jesus. 58Llelo kai o Pilato ta mangla letar e esnaga e Jesuseki. Ondaka o Pilato phenda te denla leke. 59Kana o Jose lia e esnaga e Jesuseki ulisarda le ande iek chiti jalado, 60ta thoda le ande piro limori nevo kai diaia te cherdol andre ando barr. Kana o Jose phangla iekhe bare barrea o limori, llelotar. 61Ta sea kote e Maria Magdalena, ta o goia Maria, besindo angla o limori.
E boñikura angla o limori
62Thiarinako katar gua llive ando sabado chidinaile e mai preche popura ta i e fariseura angla o Pilato, 63ta phende leke:#Mt 16.21; 17.23; 20.19; Mk 8.31; 9.31; 10.33-34; Lk 9.22; 18.31-33.
Gazda, diam amen golli kai gua kojamno phendaia kana saia llundo: Kai pala e trin llive ka ustel katar o meripe. 64Bichal akana te arakhen o limori llik kai e trin llive, soke sai aven leke disipulura orachaia ta sai vazden leki esnaga ta mapalal sai phenen e foroke kai vou ustilo katar o meripe ta gava kojaipe sai avel mai baro neko o purvo.
65O Pilato phenda lenge:
Kote si tumen iek boñikura, llan ta arakhen o limori.
66Ondaka von llele kai o limori, ta phangle o limori iekhe barrea ta thode e boñikonen te arakhen le.
Currently Selected:
Mateo 27: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
