Levitiko 27
27
Sar pochindon e llene kai si e Devleke
1O Del dia orba e Moisesea ta phenda leke:
2Phen e israelenge gala alava: Kana vareko mangel pochinel iekhe llene kai si e Devleko, morabi te pochinel prema e llenen kai si te pochindon. 3E llene kai si lenge bis burs llikai e sovardes ka pochindon pinda tolaria rupune, prema so pochindol ando santuario. 4A te avela diskinia, ka pochinela tranda tolaria. 5A e murusa kai si lenge panch burs llik kai e bis ka pochindon bis tolaria rupune, ta de des tolaria te si diskinie. 6A e minone kai si lenge iek chon llik kai e panch burs, ka pochindon panch tolaria rupune ta trin tolaria te si diskinie. 7A e llene kai si lenge sovardes burs, o mai but, ka pochindon desupanch tolaria e murusenge te des e diskinienge. 8A o lleno te si but chorro te pochinel gola love, ka inllardol kai o popo te sai vou thovel aver love te pochinel prema so sai pochinel.
9A te avena zivirinie kai denpe e Devleke, gola zivirinie ka aven sante e Devleke. 10Nasti ka parrudol pe aver zivirinia i te avela mai lachi o mai bilachi.
11A te avela goia zivirinia iek zivirinia kai si pokalime kai nasti delpe e Devleke, ondaka goia zivirinia ka inllardol kai o popo, 12ta o popo ka phenel pegachin mol le avela lacho o bilacho. Ta so phenela o popo kai mol le gia si sar ka avelpe, 13a o lleno kai anda goia zivirinia te mangela pochinel la morabi te pochinel o isi panllengo mai but prema so mol le.
14A vareko te dela po cher e Devleke, o popo si kai ka phenel so mol le prema sar si o cher. Ta so phenela o popo morabi te kanden le. 15A o lleno kai dia o cher te mange la pale po cher, morabi te pochinel o panchto isi mai but prema so mol o cher, ondaka o cher ka avel pale leko.
16A vareko te dela iek kotor katar pi phuv, goia phuv ka mol la prema so dela septelie. Pe dui stotine litrura simiche sebada ka pochindol pinda tolaria rupune. 17A te dela goia phuv katar o burs kai ni radilpe e phuv, ka pochindol prema so molale. 18A goia phuv te dela pe mapalal katar o burs kai ni radilpe e phuv, o popo ka phenel pe gachin mol le prema e bursa kai trubul te nakhen te avel pale o burs kai ni radilpe e phuv.#Lv 25.
19A o lleno kai dia e phuv te mangela pale te lel pi phuv, morabi te del o panchto mai but prema so mol e phuv, ta e phuv ka avel pale leki, 20A o lleno kai dia e phuv ni pochinela la, ta e phuv bichindola avere lleneke, vou nasti ka chinel le. 21Kana ka avel o vreme kana ande gua burs ni radilpe e phuv ta e phuv ka avel mukliardi, ka avel dino e Devleke sargo phuv santa, ta goia phuv ka avel e poponengi.
22A vareko te chinela phuv kai ni liala katar pe purane katar pi familia. 23O popo ka del orba gole llenea so mol goia phuv lligo ni ka avel o burs katar o mukliardipe kai ni radilpe e phuv, ta gua lleno ka pochinel isto gua llive so mol goia phuv, ta ka del la e Devleke. 24Ando burs katar o mukliardipe, e phuv ka avel pale ande va katar o lleno kai bichinda le, kai o chachuno gasda katar e phuv.
25Sa so pochindol ka pochindo prema o tolari kai si katar o santuario kai phariavel desuiek gramura rupune.
26E purve zivirinie kai biandon, te avela ie telcho o iek bakro, e Devleko si. 27A te avela katar e zivirinie pokalime, sai ka lel len pale te pochinena so mol le, ta ka thoven upral o panchto isi prema so mol le, a te na pochinena le, sai ka bichindol prema so mol le. 28Nasti ka bichindol niso katar so diape e Devleke sogo avela i te avena manusa, zivirinie o phuvia kai si ande lenge va, sa so diape ka avel santisimo e Devleke. 29Ni iek lleno kai si pe iek rig soke si anatema nasti ka pochindol morabi te merel.
30O diesmo katar so del e phuv, simiche o kasta kai den septelie, si e Devleke ta si dino e leke. 31A vareko te mangela te lel pale vareso katar o diesmo, morabi te del opanchto upral katar so mol le.
32Ta suako diesmo katar e guruva bakre, sogo nakhela telal katar o kas, o diesmo ka avel dino Devleke. 33Ni ka dikhol o e zivirinia si lachi o bilachi, ta ni ka pharruvel le iek pala aver soke o purvi zivirinia ta ogoia kai diape pala ogoia zivirinia ka aven e dui dine e Devleke, ta nasti ka len len pale.
34Gala si e zakonura kai o Del dia e Moisese e israelenge, po burdo katar o Sinai.
Currently Selected:
Levitiko 27: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
