Josue 9
9
E gabaonitura
1Kana asunde kai o Israel dobisarda, e charura ititura, amorreura, kananeura, ferezeura, jeveura ta jebuseura kai sea pe rig kai perel o kham katar o Jordan, pe burdura ande bare umalia, ta pasa e mora llik kai o Libano, 2achile pe orba te marenpe e Josuea ta e Israelea. 3A e llene katar o Gabaon kana asunde so cherda o Josue e foroke katar o Jeriko ta o Ai, 4phende te kojaven le. Llele po drom ta cherdepe kai avena katar aver phuv. Thode pe magarchura vreche ta morcha purane kai inllardol e mol pharrade ta suvde, 5ta thode pe pete patave ta minie purane kai suvdea len pale, ta anena samo marrno suko. 6Kana avile ando pero katar o Gilgal phende e Josueke ta e israelenge:
Amen ava duratar katar aver phuvia. Achen pe orba amenchar.
7Ta e israelitura phende e jeveonenge:#Ek 23.32; 34.12; Dt 7.2; 20.15-16.
Sai te avel kai tumen sen katar. ¿Sar ka acha pe orba tumenchar?
8A von phende e Josueke:
Amen ka ava tumare sluge.
Ta o Josue puchla len:
¿Ko sen tumen? ¿Katar aven?
9A von phende lenge:
Amen ava duratar soke tumaro Del si but pinllardo. Amen llanglam so cherda ando Ejipto, 10ta so cherda e duie charonenchar amorreura pe ogoia rig katar o Jordan, e Sijoneke o charo katar o Jesbon ta e Ogeke o charo katar o Basan kai zivila ando Astarot.#Nm 21.21-35. 11Goleke amare gazda ta amaro foro vacharde amenge:
Len tumenge so trubul te jan po drom ta llan lende, te vacharen lenge kai amen manga te achen pe orba lenchar ta te ava lenge sluge. 12Kana likistam te ava tumende, amaro marrno saia tato ta akana si zuralo ta suko. 13Ta amare morcha sea neve pherde mol, ta akana si sa pharrade. Ta i amare patave ta e minie, soke o drom sai but baro.
14Ta e israelitura lie katar o jape kai anena e gabaonitura, ta ni puchle e Devle. 15Ta o Josue achilo pe orba lenchar ta jala lenge sovel kai ni ka mundarel len, ta i e gazda katar e israelitura cherde isto gia.
16Kana nakhle trin llive sar kai achile pe orba, e israelitura llangle kai e gabaonitura sea llene kai zivina pase. 17Ta likiste e israelitura te roden len, ta ando trito llive avile ande lenge forura kai sea o Gabaon, o Kefira, o Beerot ta o Kiriat Jearim. 18Ta ni mundarde len soke e gazda katar e israelitura jalea sovel ando anav e Gazdako ta Del e Israeleko kai ni ka mundaren len.
Goleke o foro ni dela orba sukar katar lenge gazda, 19a e gazda phende lenge:
Amen jalam lenge sovel ando anav e Gazdako ta Del e Israeleko kai ni ka mundara len. Goleke akana nasti chera niso. 20Morabi te muka len te zivin soke te na, ka phaga e sovel ta o Del ka joliaol pe amende.
21Gia e gazda katar e israelitura phende te na mundaren e gabaonen. Ta cherde len pe sluge, te anen e kasta ta o pai sa e foroke. Gia e gazda cherde so jale sovel.
22O Josue ikharda e gabaonen ta puchla len:
¿Soke kojaden amen ta phenden kai avena duratar, kana o chachipe si kai tumen zivin kate? 23Goleke tumen ka achen prokete ta ostade ka aven sluge. Ka chinen kasta ta ka ikanen o pai kai trubulpe ando cher me Devleko.
24Ta von phende e Josueeke:
Amen cherdam le soke but darailam tumendar pala so asundam kai o Del phenda e Moiseseke leko sluga, kai ka del tumende sa gaia phuv ta kai ka zatril sa e llenen kai zivin kate. 25Akana amen sam ande che va. Cher amenge sogo kamea.
26Ta o Josue ni mukla e foro te mundarel e gabaonen, 27ta thoda len te anen kasta ta pai e foroke ta kai o altar esvirime e Devletar. Llik akana von si e sluge e foroke.
Currently Selected:
Josue 9: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
