Josue 10
10
E amorreura si peradine
1Kana o Adonisedek charo katar o Jerusalem, asunda kai o Josue zatrisardaia e foro katar o Ai sar cherdaiale e foroke ta e charoke katar o Jeriko, ta kai achilea pe orba te na marenpe e llenenchar katar o Gabaon, ta kai e gabaonitura zivina maskar lende, 2darailo but soke o Gabaon saia iek baro foro, mai baro neko o Ai. Saia iek foro sargo charoinako, ta e llene kai zivina ande le sea zurale. 3Goleke o Adonisedek bichalda llenen kai o Oam katar o Jebron, kai o Piream katar o Jarmut, kai o Jafia katar o Lakis ta kai o Debir katar o Eglon, te phenen lenge gia: 4Aven karinga te pomozin man te marav man e Gabaonea, soke achile pe orba te na marenpe e Josueea ta e llenenchar katar o Israel. 5Ondaka e panch charura amorreura, o charo katar o Jerusalem, o Jebron, o Jarmut, o Lakis ta o Eglon chidinaile ta llele pe boñikonenchar te marenpe e llenenchar katar o Gabaon.
6Ondaka e llene kai zivina ando Gabaon bichalde llenen te phenen e Josueke kai saia ando pero katar o Gilgal:
Na phen kai ni ka pomozi che slugen. Aide oma te arakhe amen soke sa e charura amorreura katar e burdura chidinaile te den pe amende. 7Ondaka o Josue likisto katar o Gilgal sa pe boñikonenchar tromane, 8ta o Del phenda leke:
Na dara soke me ka dav len tute, ni iek lendar ka dobil tut.
9O Josue likisto katar o Gilgal ta orachaia dia pe amorreura kana von ni uzdinape. 10Ta o Del cherda te daran e amorreura katar e israelitura, gia o Josue mundarda bute lendar ando Gabaon. Mapalal rodia len po drom katar o Bet Joron ta dia pe lende llik kai o Azeka ta o Makeda. 11Ta kana nasena katar e israelitura po drom katar o Bet Joron, o Del cherda te peren e milosotar bare krupe llik ando Azeka. Ta mule mai but cheres e krupe neko cheres e israelitura.
12Kana o Del dia e amorreonen ande va katar e israelitura, o Josue dia orba e Devlea angla o foro ta phenda:
Kham, achi ando Gabaon.
A tu chon, achi ande bari umal katar o Aialon.
13Ta o kham ta o chon achile
lligo o foro ni dobisarda pe dusmanonen.
Gia si pisime ando Lil katar o Jaser. O kham ni sigarela te perel.#2 S 1.18. 14Nikada ni saia sargo gua llive kana o Del asunda o avazi katar iek lleno, soke o Del marelape pala o Israel.
15O Josue ta sa o Israel irisaile ando pero katar o Gilgal, 16ta e panch charura nasle ta gurudile ande pechina kai si ando Makeda. 17Mapalal malade len ta phendele e Josueke. 18Ondaka o Josue phenda gia:
Thoven barra po udar katar e pechina te phande la ta thoven boñikonen te arakhen, 19na achen tumen kate. Llan pala tumare dusmanura ta den pe lende pala lende. Na muken te irinpe pe forura, soke o Gazda tumaro Del dialen ande tumare va.
20Mapalal o Josue ta e israelitura dobisarde e amorreonen ta mundarde bute llenen lendar. E amorreura kai achile llunde gurudile ande forura zidome. 21A e israelitura irisaile saste ando pero katar o Makeda kote kai saia o Josue. Ta niko ni tromala te del bilachi orba katar e israelitura.
22Ondaka o Josue phenda:
Putaren e pechina te ikanen andral e panch charura. 23Ta e israelitura ikande e charonen katar o Jerusalem, katar o Jebron, katar o Jarmut, katar o Lakis ta katar o Eglon. 24Kana ande len angla o Josue, o Josue ikharda e murusen katar o Israel ta phenda e gazdenge kai sea lea:
Thoven tumare porrne pe lengi korr katar gala charura. Ta von cherde le gia. 25Mapalal phenda lenge:
Na daran, len tumenge zor soke o Del gia ka cherel tumare dusmanonenchar.
26Ondaka o Josue mundarda e charonen ta phenda te umblaven len katar iek kas lligo ni ka perel o kham. 27Ta kana perela o kham, o Josue phenda te ikanen len katar e kasta te sai chuden len isto ande pechina kai gurudile. Mapalal phangle o udar katar e pechina bare barrenchar kai si kote llik akana.
E israelitura len peke aver forura
28Isto gua llive o Josue lia peke o foro Makeda ta zatrisarda le sa. Mundarda sa e llenen kai zivina andre. Niko ni achilo llundo, ta cherda e charoke katar o Makeda so cherdaia e charoke katar o Jeriko.
29Kotar o Josue ta e israelitura lleletar ando Libna te marenpe gole foroia. 30Ta o Del dia e israelen gava foro ta leke charo. Niko ni achilo llundo, ta cherda e foroke katar o Libna so cherdaia e charoke katar o Jeriko.
31Mapalal katar o Libna e israelitura lleletar ando Lakis ta mardepe lenchar. 32Ando duito llive o Del dia e israelen o Lakis, ta mundarde sa e llenen ta e zivirinien kai zivina kote, sar cherde le ando Libna. 33O Joram charo katar o Gezer likisto te pomozil e Lakise, a o Josue dobisarda le ta ni mukla ni iekhe llene llundo.
34Katar o Lakis o Josue ta e israelitura llele ando Eglon ta mardepe lenchar. 35Isto gua llive die ando foro ta mundarde e jarnienchar sa e llenen kai zivina kote, ta zatrisarde e foro sar zatrisarde ando Lakis.
36Katar o Eglon llele ando Jebron ta die pe lete.#Jos 15.13; Jue 1.10. 37Ta mundarde e jarnienchar e charo, e llenen ta e zivirinien kai zivina kote, ta i e foronen kai sea pase sar cherde le ando Eglon.
38Mapalal llele ando Debir ta die te marenpe lenchar,#Jos 15.15; Jue 1.11. 39ta mundarde e jarnienchar e charo, e llenen ta e zivirinien kai zivina kote ta i e llenen katar e forura kai sea pase. Ni iek lleno katar o Debir ni achilo llundo. Mundarde saurren sar mundarde e llenen katar o Jebron, katar o Libna ta lenge charonen.
40Gia o Josue dia ande sa e phuv. Dobisarda e charonen katar e burdura, katar o Negeb, katar e bare umalia, ta katar e thana kai si pasa e burdura. Sa zatrisarde ta mundarde saurren. Niso ni achilo ta ni mukle llundo nika, sar phendaia le o Gazda, o Del e Israeleko.#Jos 11.21; Jue 1.9. 41Dobisarda sa e charonen ta dia ande sa lenge phuvia, katar o Kades Barnea llik kai e Gaza, ta sa e phuv katar o Gosen llik kai o Gabaon. 42O Josue dobisarda sa e charonen ta lia lenge phuvia, soke o Del marelape pala o Israel. 43Ondaka o Josue irisailo kai o pero katar o Gilgal ta lea sa o Israel.
Currently Selected:
Josue 10: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
