Josue 18
18
E phuvia katar aver viche
1Mapalal kana lie sa e phuv, e israelitura chidinaile ando Silo ta vazdie kote iek chara te sai chidiniaon ande la, 2makar achena ios efta viche kai ni diea len phuv.
3Ondaka o Josue phenda e israelitonenge: ¿So aduricharen te len e phuv kai dia tumen o Gazda, o Del tumare puranengo? 4Ikharen trin llenen katar suako vicha te sai bichalav len te dikhen e phuv ta te llana sar ka fulada lengi phuv. 5Gala llene morabi te fulaven e phuv ande efta kotora. E phuv e Judaeki morabi te achel ando sur ta e phuv katar e chave e Joseeke ando norte. 6Mapalal kana ka fulaven e phuv ka aven mande ta ka phenen mange sar si e phuv te sai fulavav la tumenge angla o Gazda amaro Del. 7E vichake katar o Levi ni ka da len phuv, soke lengo si o rado e poponengo katar o Del. E vichake katar o Gad o Ruben ta o dopas vicha katar o Manases si len phuv pe ogoia rig katar o Jordan, kai dia len o Moises, sluga e Devleko.#Jos 13.14,33.
8O Josue phenda e llenenge kai lachardepe te dikhen e phuv:
Llan pe sa e phuv te fulaven la pe kotora ta kana ka gotovin, irin tumen mande te chelav man e phuv tumenge.
9Ondaka e llene llele pe sa e phuv ta fulade e forura ande efta kotora ta pisisarde sa so cherde. Mapalal irisaile ando pero katar o Silo kote kai saia o Josue. 10Ondaka o Josue cheldape angla o Del ando Silo te sai fulavel e phuv maskar e israelitura.
E phuv katar e vicha e Benjamineki
11Kana cheldepe te sai fulaven e phuv, e familie katar e vicha e Benjamineki lie phuvia ande phuv katar o Juda ta katar e chave e Joseeke. 12Ando norte lengi phuv saia katar o Jordan pasa o Jordan, nakhela pasa o burdo pe rig kai perel o kham ta likel po pusto katar o Bet Aven. 13Kotar e phuv si katar o Luz kai si o Bet El, ando sur llik o Atarot Adar po burdo kai si ando sur katar o Bet Joron telal. 14Mapalal bangarel kai e mora pe rig o sur katar o burdo kai si angla o Bet Joron llik o Kiriat Baal kai ikharen le Kiriat Jearim kai si katar e vicha e Judaeki. Gaia si e phuv pe rig kai perel o kham.
15Ando sur e phuv saia pasa o Kiriat Jearim pe rig oeste kai o paiorro katar o Neftoaj, 16ta llal tele pe rig mai dur katar o burdo kai si angla e bari umal katar o Ben Inom, ando norte katar e bari umal katar o Refaim. Mapalal llala tele ande bari umal katar o Inom ta nakhela ando sur katar o drom kai llal pasa o Jebus ta kotar llik o Rogel. 17Mapalal bangarel po norte ta likel ando En Semes. Kotar llik o Gelilot kai si angla o drom kai llal upre katar o Adumin ta fuliel kai e pechina katar o Boan chavo katar o Ruben, 18ta nakhel pasa e rig kai si angla o Araba ta fuliel ando Araba. 19Ando norte nakhel pasa o Bet Jogla llik e Mora e Londi kote kai aven e paia katar o Jordan. Llik kote resela e phuv ando sur.
20Pe rig kai likel o kham e phuv resela llik o Jordan. Gala si e phuvia kai die e familiake katar e vicha e Benjamineki.
21E forura kai die e familiake katar e vicha e Benjamineki sea o Jeriko, o Bet Jogla, o Emek Kesis, 22o Bet Araba, o Semaraim, o Betel, 23o Avim, o Para, o Ofra, 24o Kefar Aamoni, o Ofni ta o Geba. Sa sea desudui forura ta lenge forichura. 25O Gabaon, o Rama, o Beerot, 26o Mizpa, o Kafira, o Moza, 27o Rekem, o Irpeel, o Tarala, 28o Zela, o Elef, o Jebus, kai si o Jerusalem, o Gabaa ta o Kiriat. Sa sea desustar forura ta lenge forichura. Gaia si e phuv katar e chave e Benjamineke prema lenge familie.
Currently Selected:
Josue 18: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
