Jeremias 4
4
O Del phenel te irinpe katar po bilachipe
1Te sai iria tut ioi Israel, phenel o Del,
irisao mande.
Ta te lea cho gadope kai si angla mande,
ta te na llelan incha ta karinga,
2ta te jaia sovel ando anav e Devleko,
pala o chachipe pala e kris ta pala so si orta,
ondaka e phuvia ka aven blagosime
ande leko anav ta ande le ka veselinpe.
3Soke gia phenel o Del suakone muruseke katar o Juda ta katar o Jerusalem:
Putaren e phuv tumenge
ta na thoven e simiche maskar e karrne.
4Manusalen katar o Juda ta katar o Jerusalem,
cheren tumenge e sirkunsision pala o Del
ta phenen kai me sem tumaro Gazda,
thoven ande tumaro lio te achardol
o alav kai diem tumen,
te na avelpe kai mi joli ka likel sargo iag
ta ka phabol ta ni ka avel ko te mundarel la
pala e ezgode bilache kai tumen cheren.#Dt 10.16; 30.6; Ro 2.25-29.
Mangen te den ta te marenpe ando Juda
5Den orba ando Juda,
cheren te asundol ando Jerusalem ta phenen:
Basalen e tuturuga pe phuv,
den orba ande iek than ta phenen:
Chidiniaiva ta da ande forura zidome.
6Vazden o bariako ando Sion,
nasen ta na achen,
soke me cherav te avel o bilachipe
katar o norte ta bari zatrania.
7O liono likel kai saia gurudino,
ta gua kai zatril e phuvien llal
ta likisto katar po than te mukel pusti chi phuv,
che phuvia ka achen puste
ta niko ni ka zivil andre.
8Goleke thoven patave zalosne,
roven ta kukin zalbatar
soke e joli e Devleki ni llelitar amendar.
9O Del phenel kai ande gua llive,
o charo ka jasarel e zor ta i leke sudura,
ta e popura nasti ka pachan so llalpe
ta e poraukura ka chudinpe.
10Ta phendem:
¡Ioi, ioi Devla Gazda!
chachimaia kojadan zurale gale foro
ta i o Jerusaleme kana phendan:
Pas ka avel tumen,
soke o jarni reslo llik kai o lio.
11Ande gua vreme ka phenen gale foroke
ta i e Jerusalemeke:
Iek balav suki avili upral
katar o pusto kai e chei me foroki,
inai e balav kai chistolpe o lliu
kana chuden le upre.
12E balav kai me ka anav ka avel mai bari,
ta akana me ka chinav kris pe lende.
E dusmanura thovenpe truial katar o Israel
13Ka likel sargo oblako,
ta leko bordon sargo bari balav,
leke gra si mai lokhe neko e agile.
¡Tesko amenge soke chinade san
te zatrin amen!
14Jalav cho lio katar o bilachipe Jerusalem,
te sai ave braduime.
¿Gachin ios ka muke te aven maskar tute
e mislura bilache?
15Soke iek avazi anel e lachi viasta
katar o Dan
ta cherel te asundol e zatrania
katar o burdo katar o Efrain.
16Phenen gia e phuvienge:
Cheren te asundol ando Jerusalem gia:
Duratar aven boñikura katar aver phuvia,
ta ka urkin pe forura katar o Juda.
17Thode pe truial katar o Juda
sargo llene kai arakhen e umalia
soke ni kandie man, gia phenel le o Del.
18Cho drom ta e ezgode kai chere
cherde chuke gaia ezgoda, gava si cho bilachipe,
goleke e duk ka del andre ande cho lio.
Duk katar o Jerusalem pala po foro
19¡Chinel man e duk ande mo lli!
Dukhan man e zile katar mo lio,
mo lio izdral andre ande mande, ni ka achav,
soke mo duo asundem sar basel e tuturuga
ta asunda e avazura katar o maripe.
20Phenen ka avel phagipe pala o phagipe,
soke sa e phuv si zatrime,
oma si zatrime me chare
ta si zatrime me chitura.
21¿Gachin ios si te dikhav o bariako,
ka asunav sar basel e tuturuga?
22Soke mo foro si dilo, ni pinllarde man,
von si chave dile ta ni acharen,
von si bizai te cheren o bilachipe,
a ni llangle te cheren o lachipe.
O Jeremias dikhel e zatrania kai avel
23Dikhlem pe phuv, ta saia pusti ta chuchi,
dikhlem po miloso, ta ni saia le villelo.
24Dikhlem pe burdura ta izdrana,
ta sa e burdura avile zatrime.
25Dikhlem ta ni saia ni iek manus
ta sa e chiriklia lleleatar.
26Dikhlem pe umal zeleni kai cherdili
sargo o pusto ta sa leke forura sea zatrime
angla o Del, angla leki joli kai phabola.
27Soke phenda le Del gia:
Sa e phuv ka avel zatrime, a ni ka zatriv la sa.
28Goleke ka avel zalosno sa e phuv
ta ando miloso upre ka avel truniariko,
soke diem orba, mislisailem
ta ni boldiem mo mislo
ta ni ka dav man palpale katar gaia ezgoda.
29Kana asundilo sar aven e llene pe gra
ta e llene kai chuden e llide, sa o foro naslo,
die andre ando vos maskar e kasta,
ta likiste pe barra,
sa e llene lleletar katar e forura
ta ni achilo ni iek lleno te zivil andre.
30A tu, kai sai zatrime, ¿So ka chere?
I te furiadoa ando lolipe,
i te lacharea tut ando sunakai,
i te makhea che akha, samo gia lachare tut,
ni ka mol tut niso e llenenge kai volina tut
ta ka roden te mundaren tut.
31Soke asundem iek avazi
sargo katar iek diskinia kai maladol lake,
urkipe sargo katar iek kai bianel e purvo drom,
avazi katar e chei katar o Sion
kai rovel ta inzarel pe va ta phenel:
¡Tesko mange akana! kai inai man vlaga
pala e llene kai aven te mundaren.
Currently Selected:
Jeremias 4: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
