Jeremias 36
36
O Baruk chitil o lil ando cher e Devleko
1Ando burs starto kai charoila o Joasim chavo katar o Josias, charo katar o Juda, avilo gava alav katar o Del kai o Jeremias ta phenda leke:#2 R 24.1; 2 Kr 36.5-7; Dn 1.1-2. 2Le iek lil ta pisisar pe lete sa so phendem chuke katar o Israel ta katar o Juda, ta katar sa e phuvia sar kana liem te dav tuia orba, sar kana sea e llivesa katar o Josias llik allive. 3Sai te asunen e llene katar o Juda sa e duk kai mangav te cherav lenge ta sai avel kai ka keilpe suako iek katar po bilachipe ta katar po dos.
4Ta ikharda o Jeremias e Baruke chavo katar o Nerias ta o Baruk pisisarda pe iek lil sa e alava kai o Del cherela te del orba i Jeremias. 5Mapalal o Jeremias bichalda e Baruke ta phenda leke:
Man ni muken te dav ando cher e Devleko. 6Goleke, de tu ta chitisar gala alava kai phendem chuke te pisi ande gava lil, ando cher e Devleko ando llive katar o alluno, ta ka chiti te asunen sa e llene katar o Juda kai aven katar pe forura. 7Sai avel kai lengo molipe ka resel angla o Del, ta ka irilpe suako iek katar po bilachipe, soke bari si e joli ta o silnope kai sikada o Del pe gava foro. 8Ta o Baruk chavo katar o Nerias cherda sa prema so phenda leke o profeta o Jeremias ta chitisarda e alava e Devleke kai si ando lil ando cher e Devleko.
9Ta ando burs panchto kai charoila o Joasim chavo katar o Josias charo katar o Juda, ta ando chon iniato kai phende te cheren o alluno angla o Del sa o foro katar o Jerusalem ta sa e llene kai avena katar e forura katar o Juda kai o Jerusalem. 10Ta o Baruk chitisarda ando lil e alava karat o Jeremias ando cher e Devleko, katar e soba e Gemariaseki chavo katar o Safan kai saia pismiri, kai saia ande bar kai si upre kai delpe andre katar o nevo udar katar o cher e Devleko.#Jer 26.24.
O Baruk chitil o lil angla e bare sudura
11Ta o Mikaias chavo katar o Gemarias ta unuko katar o Safan, kana asunda sa e alava e Devleke kai sea pisime ando lil, 12llelo kai o cher e charoko, kai e soba katar leko pismiri, ta e mai preche llene besena kote, von sea:
O Elisama pismiri, o Delaia chavo katar o Semaias, o Elnatan chavo katar o Akbor, o Gemarias chavo katar o Safan, o Sedekias chavo katar o Jananias, ta sa e sudura. 13Ta o Mikaias phenda lenge sa e alava kai asunda kana o Baruk chitisarda o lil e foroke. 14Ondaka bichalde sa e sudonen kai o Iejudi chavo katar o Netanias, unuko katar o Selemias, ta para unuko katar o Kusi, te phenel e Barukeke:
Le o lil kai chitisardan e foroke ta aide. Ta o Baruk chavo katar o Nerias lia o lil ande pe va ta avilo lende. 15Ta phende leke:
Bes akana ta chitisar o lil amenge. Ta o Baruk chitisardale lenge.
16Kana asunde sa gola alava, daratar dikhle iek pe aver ta phende e Barukeke:
Chachimaia ka phena e charoke sa gala alava.
17Ta puchle e Baruke:
Phen amenge akana sar pisisardan sa e alava kai phenda chuke o Jeremias.
18Ta o Baruk phenda lenge:
Vou dela orba sa gala alava, ta me pisiva po lil.
19Ondaka e sudura phende e Barukeke:
Lla ta gurudo tu ta o Jeremias, ta te na llanel niko kai sen.
O charo o Joakim phabarel o lil
20Mapalal mukle o lil ande soba katar o pismiri o Elisama ta die andre kote kai saia o Charo, ande bar ta phende e charoke sa gala alava. 21Ta o charo bichalda e Iejudie te lel o lil ta lia le katar e soba katar o pismiri o Elisama ta chitisarda e charoke o lil ta sa e sudonenge kai sea e charoia. 22Ta o charo saia ando cher katar o viend, soke saia ando chon iniato ta angla le saia e iag. 23Kana o Iejudi chitisarda trin o star alava katar o lil, o charo chinda o lil iekhe churiaia e pismirengi ta chudia le ande iag, lligo ni phabilo sa o lil upral pe iag. 24Ta ni daralie ta ni pharrade pe patave ni o charo ni leke sluge kai asunde sa gola alava. 25A o Elnatan ta o Delaias molinape e charoke te na phabarel gua lil, ni kamla te asunel len. 26Ta o charo bichalda e Ierajmeele chavo katar o Amelek, e Seraiase chavo katar o Izriel ta e Selemiase chavo katar o Abdel te phanden e Baruke o pismiri ta e profeta e Jeremiase, a o Del guruda len.
O Jeremias pisil aver lil
27Ta mapalal kana o charo phabarda o lil, kai sea e alava kai phendaia o Jeremias ta kai o Baruk pisisardaia, avilo o alav e Devleko kai o Jeremias ta phenda: 28Le aver lil ta pisisar sa e purve alava kai sea ande o gua lil kai phabarda o Joasim charo katar o Juda. 29Ta phen e Joakineke gia:
Gia phenda o Del:
Tu phabardan gava lil, ta phendan:
¿Soke pisisardan pe gava lil kai chachimaia ka avel o charo katar e Babilonia ta ka zatril gale phuvia ta ni ka achen ni manusa ni zivirinie? 30Goleke, gia phenda o Del cheres o Joakin charo katar o Juda:
Ni ka avel le ko te besel po trono e Davideko. Ta leki esnaga ka avel chudini po tatipe e lliveseko ta po iv e rachako. 31Ta ka dukhavav le pala leko bilachipe ta i leke porodo ta leke slugen ta ka anav pe murusa katar o Juda sa o bilachipe kai phendem lenge ta ni asunde.#2 R 23.36—24.6; Jer 22.18-19.
32Ta o Jeremias lia aver lil ta dia le kai o Baruk chavo katar o Nerias pismiri. Ta pisisarda po lil e alava kai phenela leke o Jeremias katar o lil kai phabardaia o Joakin charo katar e Judea. Ta thoda ios mai but alava sargo gola.
Currently Selected:
Jeremias 36: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
