Jueses 9
9
O Abimelek
1O Abimelek chavo katar o Jerubaal llelo ando Sikem te del orba e familiaia katar leki dei ta phenda lenge:
2Me moliv man tumenge te phenen e llenenge katar o Sikem kai si mai lache te gazdaril pe tumende samo iek lleno a na sa e eftavardes chave katar o Jerubaal.
3Ta sa leke phlal katar leki dei phende e llenenge katar o Sikem so phenela o Abimelek te pomozin le. 4Ta lie eftavardes tolaria rupune katar o cher e deleke Baal Berit ta dielen e Abimeleke. Gale lovenchar o Abimelek pochinda murusenge kai ni radina ta lleletar lea. 5Ta avile ando Ofra, o foro kai zivisardaia pe dadea o Jerubaal. Ta mundarde e eftavardesen phlalen katar o Abimelek. Samo o Jotam, o phlal mai terno gurudilo te na merel. 6Ondaka chidinaile sa e llene katar o Sikem ta katar o Bet Milo. Chidinaile pasa e ensina ta e pechina kai sea ando Sikem ta kote thode e Abimeleke te charoil pe lende.
7Kana llanglale o Jotam llelo po burdo o Gerizim ta kotar urkisarda zurale te sai asunen le sa:
¡Asunen man llene katar o Sikem! ¡Ta gia te asunel tumen o Del!
8Iek drom e kasta mangena iek charo ta mangle katar o kas maslinkengo te charoil pe lende. 9A o kas maslinkengo phenda lenge iok soke te sai charoil morabi te mukel te del zeitino kai si te den liubao e llenenge ta e Devleke.
10Ondaka e kasta mangle katar e simochina te charoil pe lende. 11A e simochina phenda lenge iok, soke te sai charoil morabi te mukel te del lake septelie sukar ta gugle.
12Ondaka e kasta mangle katar o kas drakhako te charoil pe lende. 13A o kas drakhako phenda lenge iok, soke te sai charoil morabi te mukel te del o pipe kai del veselia e llenenge ta e Devleke.
14Ondaka e kasta mangle katar o kas karrnengo te charoil pe lende. 15Ta o kas karrnengo phenda lenge kai de istina mangena te charoil vou pe lende, sea lenge te thovenpe telal tala leke senka. A te na, ka likel letar iag te phabarel e sedrura katar o Libano.
16Akana me puchav: ¿Tumen cherden so si orta kana thoden e Abimeleke te avel o charo? ¿Tumen sena pachivale e familiaia katar o Jerubaal isto gia sar von sea tumenchar? 17Soke mo dad thoda po zivoto ande bari dar pala tumen kana mardape e madianitonenchar te braduil tumen lendar, 18a tumen vazdinailen pe me dadeki familia ta mundarden leke eftavardesen chaven pe iek pechina. Ta i thoden te charoil pe tumen e Abimeleke, o chavo katar e konkubina katar o Jerubaal samo soke vou si tumaro phlal. 19A me phenav tumenge allive: Te si kai sena chache ta pachivale e Jerubaalea ta leki familiaia, te llal tumenge sukar e Abimelekea ta i leke, 20a te na, ¡te likel katar o Abimelek iag te phabarel saurren ando Sikem ta Bet Milo, ta katar o Sikem ta o Bet Milo te likel iag te phabarel le!
21Mapalal o Jotam naslo ando Beer ta kote gurudilo soke darala katar leko phlal o Abimelek.
22O Abimelek gazdarisarda e israelen trin burs. 23A o Del bichalda iek duo bilacho maskar Abimelek ta e llene katar o Sikem te vazden pe lete 24ta gia te pochinel o mundaripe kai cherdaia e eftavardese chavenge katar o Jerubaal ta te pochinen e llene katar o Sikem soke pomozisardea e Abimeleke. 25Ta ando Sikem sea kochkaria kai guruduna ta perena pe llenen kai nakhena po drom. Ta llanglale o Abimelek.
26Iek llive o Gaal chavo katar o Ebed nakhlo pe phlalenchar ando Sikem, ta e llene katar o foro thode ande le lengi vera. 27Ta likiste ando vos, ustade e drakha, cherde mol ta cherde iek slava. Die ando cher katar lenge dela, jale, pile ta die armaia e Abimeleke. 28Ta o Gaal phenela: ¿So mislilpe gava Abimelek? Vou si samo iek chavo katar o Jerubaal ta o Zebul si leko sluga. A amen e llene katar o Sikem, ¿so sam amen te ava lenge sluge? Aide te radi e Jamoreke o dad katar o Sikem. 29¡Te avava me tumaro gazda, oma tradiava e Abimeleke! Ta i phenda:
¡Aide Abimelek, chide che boñikonen ta ave po maripe!
30Kana o Zebul o gazda katar o foro, asunda so phenela o Gaal, jolailo but, 31ta bichalda te phenen e Abimeleke kai saia ando Aruma: O Gaal chavo katar o Ebed avilo pe phlalenchar ando Sikem ta cherel te joliaon pe tu e llene katar o foro. 32Goleke like gaia riat che boñikonenchar ta gurudo ando umal. 33Thiara kana ka likel o kham de pe foro, ta kana ka likel o Gaal ta leke boñikura te marenpe tuia, cher lea sogo kamea.
34Ondaka o Abimelek ta leke llene likiste orachaia ta gurudile truial katar o Sikem fulade ande star kotora. 35Ta kana o Gaal likisto ta thodape po udar e forotar, o Abimelek ta leke boñikura likiste katar e riga kai guruduna. 36Kana dikhla len o Gaal phenda e Zebuleke:
¡Dik, katar e burdura aven boñikura!
O Zebul phenda:
Iok, gala si e senka katar e burdura kai tu dikhe len sargo llenen.
37A o Gaal phenela:
¡Katar o burdo kai ikharen le bureko e phuviako aven boñikura! ¡Aver boñikura aven po drom katar Ensina katar e llene kai apogodin!
38Ta o Zebul phenda leke:
¡De orba akana, tu kai phenea kai o Abimelek ni saia niko te ava leke sluge! ¡Lla akana te mareto lenchar!
39Ondaka o Gaal likisto angla e llene katar o Sikem te marelpe e Abimelekea. 40A o Abimelek rodia le ta o Gaal naslo letar. Ta ando udar e foroko mule but llene. 41O Abimelek achilo ando Aruma ta o Zebul chudia katar o Sikem e Gaale ta leke phlalen.
42Thiarinako e llene katar o Sikem llele pe umal, ta kana llanglale o Abimelek, 43fulada e boñikonen ande trin kotora ta gurudilo ando vos. Ta kana dikhla kai e llene katar o Sikem likena katar o foro, likisto katar o vos kai gurudilo ta dia pe lende. 44Vou ta leke boñikura die te len o udar e foroko, ta ogola boñikura dena pe llenen ta mundarena len, 45sorro llive o Abimelek dia po Sikem lligo ni lia le. Ondaka zatrisarda e foro ta mundarda saurren ande le, ta pe foro thoda lon.
46Kana e llene katar o Migdal Sikem llangle so cherdaia o Abimelek, llele te gurudon ando cher katar o del El Berit. 47Ta kana o Abimelek llangla kai sa sea chidine kote, 48llele pe boñikonenchar po burdo o Salmon ta iekhe toverea chinda iek krango thoda le pe po dumo ta phenda pe boñikonenge te cheren sargo vou. 49Ta sa chinde krangura ta llele e Abimelekea llik kai o cher katar o del El Berit. Thode sa e krangura pasa o cher ta phabarde le. Gia mule sa e llene katar o Migdal Sikem kai sea milia murusa ta diskinie.
50Mapalal o Abimelek llelo ando Tebes te del pe foro ta lia le. 51Po maskaral katar o foro saia iek cher ta andre guruduna sa e llene katar o foro. Phangle zurale o udar ta likiste upral katar o cher, 52a o Abimelek avilo po udar katar o cher ta dia pe le. Ta kana thodape te phabarel o cher, 53iek diskinia chudia iek baro barr kai pelo pe leko soro ta phagla leki kokala. 54Ondaka o Abimelek ikharda leke sluga ta phenda leke:
Ikan cho jarni ta mundar man, te na phenen kai iek diskinia mundarda man. Ta o sluga ranisarda le ta o Abimelek mulo. 55Kana e israelitura dikhle kai o Abimelek muloa lleletar chere.
56Gia o Del cherda te pochinel o Abimelek o mundaripe kai cherdaia pe dadeke kana mundarda leke eftavardese phlalen. 57Gia o Del cherda te pochinen e llene katar o Sikem o mundaripe kai cherde. Ta gia cherdili e armaia kai diaia o Jotam chavo katar o Jerubaal.
Currently Selected:
Jueses 9: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
