Jueses 11
11
O Jefte
1O Jefte saia but zuralo ta tromano. Leki dei sai iek kurvichka ta leko dad saia o Galaad.#Ebr 11.32. 2A e rromi katar o Galaad dia le mai but chaurre, ta kana barile tradie e Jefte katar o cher ta phende leke kai ni ka perel le niso katar lengo dad soke leki dei si aver diskinia. 3Ondaka o Jefte naslo katar leke phlal ta llelo te zivil ande phuv katar o Tob. Ta phirena lea llene bilache ta kochkaria.
4Nesave vreme mapalal e amonitura die po Israel, 5ta e gazda katar o Galaad bichalde llenen te anen e Jefte katar Tob, 6ta phende leke:
Aide, soke amen manga te ave amaro gazda ando maripe e amonitonenchar.
7Ta o Jefte phenda lenge:
¿A tumen ni murzin pe ma ta tradien man katar me dadeko cher? ¿Soke aven mande akana kai sen ande bari dar?
8A von phende leke:
Goleke amen avilam te ikhara, tut soke amen sam ande bari dar. Manga te ave amenchar te mareto e amonitonenchar ta te ave o gazda katar o Galaad.
9A o Jefte phenda lenge:
Te mangen te iriv man te sai marauman e amonitonenchar ta o Del cherel te dobiv, me ka avav tumaro gazda.
10Ta e gazda vacharde leke:
O Del dikhel kai ka chera sa so phendam.
11Ta o Jefte llelotar lenchar ta o foro thoda le lengo gazda. Ta ando Mispa o Jefte phenda angla o Del sa leke alava. 12Mapalal o Jefte bichalda llenen e charoke katar e amonitura te puchen le: ¿So si chuke manchar te de pe murni phuv? 13Ta o charo katar e amonitura phenda e llenenge kai bichaldaia o Jefte:
Kana tumen e israelitura likisten katar o Ejipto lien amari phuv, katar o len o Arnon llik o Jabok ta o Jordan. Akana irin mange murne phuvia bi te mara amen.
14Ta o Jefte bichalda avere llenen kai o charo katar e amonitura, 15te phenen leke, gia phenel o Jefte:
Amen e israelitura ni liam phuvia katar e moabitura ta katar e amonitura. 16Kana likistam katar o Ejipto nakhla o pusto llik e Mora e Loli ta avilam ando Kades. 17Ondaka bichaldam llenen kai o charo katar o Edom te phenen leke ta mukel amen te nakha ande leki phuv, a vou ni kamla. Ta i manglam katar o charo katar o Moab ta i vou ni kamla. Goleke achilam ando Kades.#Nm 20.14-21. 18Mapalal kana nakhlam po pusto pasa e phuv katar o Edom ta o Moab, avilam pe rig kai likel o kham katar o Moab ta loglam pasa o Arnon. Ta amen ni nakhlam o pai soke pe ogoia rig saia e phuv katar o Moab.#Nm 21.4. 19Ta bichaldam llenen te phenen e charoke amorreo o Sijon katar o Jesbon te mukel amen te nakha ande leki phuv.#Nm 21.21-24. 20A o Sijon darailo ta ni kamla te nakha ande leki phuv ta i chidia leke boñikura ta dia pe amende. 21A o Gazda, Del e Israeleko cherda te dobi e Sijone ta leke boñikonen ta liam sa e phuv katar e amorreura kotar, 22liam sa e phuv katar e amorreura, katar o len Arnon llik o Jabok ta katar o pusto llik o Jordan. 23¿Ta akana mange te le amendar so lia o Del katar e amorreura ta dia le pe foro o Israel? 24Te si kai cho del o Kemos del tut iek phuv, tu phenea kai gaia phuv si chiri ¿inai gia? Isto gia amen phena kai si amari e phuv kai o Del dia amen. 25¿So misli tut mai zuralo neko o Balak chavo katar o Sipor, o charo katar o Moab? Vou ni avilo te marelpe amenchar.#Nm 22.1-6. 26Cheren trin stotine burs kai amen zivi ando Jesbon, ando Aroer ande forichura kai si truial ta ande sa e forura kai si pasa o Arnon, ¿soke ande sa gava vreme ni avilam te mareto pala che phuvia? 27Me ni cherdem chuke ni iek bilachipe. Tu san o gua kai inai orta, soke ave te mareto amenchar. A o Del kai si o krisari vou ka chinel e kris maskar e israelitura ta e amonitura.
28Ta o charo katar e amonitura ni kamla te asunel so phenela o Jefte.
O Jefte jal sovel
29Ondaka o duo e Devleko avilo po Jefte, ta o Jefte llelo pe sa o Galaad ta o Manases ta kotar llelo ando Mispa, ta katar o Mispa llelo kai e amonitura. 30Ta o Jefte jala sovel, ta phenda:
Te cherea te dobiv e amonitonen, 31me ka dav tut kurbano e purve llene kai ka likel katar mo cher te lel man.
32O Jefte dia ande phuv katar e amonitura, mardape lenchar ta o Del cherda te dobil. 33O Jefte mundarda bute dusmanonen ta lia bis forura maskar Aroer, Minit ta Abel Kerarim. Gia e israelitura cherdile gazda pe amonitura.
34Ta kana o Jefte irisailo kai po cher ando Mispa, leki chorri likisti te lel le chelimaia ta basalela e panderura. Voi saia leki edini chorri ta ni sea le ios chave, samo voi. 35Ta kana o Jefte dikhla la, pharrada pe patave ta phenda lake:#Nm 30.2-3.
¡Tesko mange chorri murni! ¡Dukhave man but, soke me jalem sovel e Devleke ta morabi cherav le!
36Ta voi phenda leke:
Dade, cher mange sogo jalan sovel e Devleke, soke o Del cherda te dobi che dusmanonen e amonitura. 37Samo mangav tutar te de man dui chon te llav pe burdura me amalenchar diskinie, te rova kai sem chei ta ni ka ziniv man nikada.
38Ta o Jefte dia la dui chon, ta ande gua vreme voi lleli pe amalenchar diskinie pe burdura ta rovela soke saia chei ta ni saia te zinilpe nikada. 39Ta kana nakhle e dui chon voi irisaili kai po dad, ta o Jefte cherda so jalaia sovel. Ta voi nikada ni zinisaili. 40Sar kotar ando Israel suako burs llana e chorra te rovel pala e chorri e Jefteeki star llivesa.
Currently Selected:
Jueses 11: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
