Isaias 65
65
E llene kai ni kande si dorsarde
1Rodie man gola kai ni puchena mandar,
malade man gola kai ni rodena man.
E llenenge kai ni ikharena man phendem gia:
Kate sem, kate sem.#Ro 10.20.
2Inzardem me va sorro llive
karing iek foro kai ni kandel,
kai llal katar iek drom kai inai lacho,
ta llan pala pire mislura,#Ro 10.21.
3iek foro kai suako sa o vreme dela man joli,
kai cherena kurbano ando vostano
ta phabarena o taimano upral pe chikle,
4kai achen ande limoria,
ta pe thana gurudine nakhen a riat,
kai jan mas balikano, ta ande lenge kavie
si o pai katar o chiradipe
katar e ezgode kai si melale te jampe,#Lv 11.7; Dt 14.8; Is 66.3.
5ta phenen:
Achi pe cho than,
te na ave pasa mande,
soke sem mai blagosime neko tu,
von si thuv ande mi joli,
iag kai phabol sorro llive.
6Pisime si angla mande, me ni ka achav,
lligo ni ka pochinav lenge pe lengo brek,
7pala tumaro bilachipe, gia phenel o Del,
ta pala o bilachipe kai cherde tumare papura,
kai phabarde o taimano pe burdura,
ta pe burdura kusle man, goleke me
ka llinav lenge so cherde pe lengo brek.
O Del del po alav kai ka blagosil
8Gia phenda o Del:
Sargo kana vareko
malavel iek krango drakhengo ta phenel:
Na chude le, soke blagosipe si ande lete,
isto gia ka cherav pala me sluge, ni ka zatriv sa.
9Ka ikanav porodo katar o Jakob,
ta katar o Juda kai ka achen leke me burdura
ta e llene kai esvirisardem ka gazdarin
pe phuv kai ka achel lenge
ta me sluge ka zivin kote.
10Ta o Saron ka pherdol bakre,
ta ande umal katar o Akor
ka avel e stoka guruvengi
me foroke kai rodel man.#Jos 7.24-26.
11A tumen kai muken e Devle,
kai bristaren tumen katar mo santo burdo,
kai thoven sinia e Gadeke
ta den pipe e Menieke,
12i me ka dav tumen kai o jarni
ta sa tumen ka den changenchar
te chinen tumaro soro, soke ikhardem
ta ni asunden, diem orba ta ni asunden,
cherden o bilachipe angla mande
ta esvirisarden so inai mange drago.#Is 66.4; Jer 7.13.
13Goleke, gia phenda o Del o Gazda:
Me sluge ka jan, a tumen ka nakhen bok,
me sluge ka pien, a tumenge ka avel trus,
me sluge ka veselinpe,
a tumenge ka avel lallao,
14me sluge ka llilaben e liea veselimatar,
a tumen ka roven dukhatar katar tumaro lio,
ta ka kukin pala o phagipe katar tumaro duo.
15Tumen ka muken te proketin tumaro
anav me sluge ta o Del ka mundarel tut
ta pe slugenge ka thovel aver anav.
16Ko mangela te avel blagosime pe phuv,
o Del katar o chachipe ka blagosil le,
a ko jala sovel pe phuv,
po del katar o chachipe ka jal sovel,
soke e purvo zalbe ka aven bristarde,
ta ka aven ucharde katar me akha.
17Soke me ka cherav nevo miloso
ta nevi phuv, ta katar so saia omanglal
ka avel bristardo,
ta ni ka avel a ios ande mislura.#Is 66.22; 2 P 3.13; Apo 21.1.
18Ka veselintumen ta ka avel dragostia ostade
e ezgode kai me cherdem,
soke me anav ando Jerusalem e veselia,
ta e dragostia leke foroke.
19Ta ka veseliu man pala o Jerusalem
ta ka avel mange dragostia pala mo foro,
ta nikada ios ni ka asundol andre roipe
ni avazi kai rovel.#Apo 21.4.
20Ni ka avel kote minono
kai ka merel llivesengo,
ni phuro te na resel kai pe bursa,
soke o minono ka merel stotina bursengo,
ta o lleno bilacho
stotina bursengo ka avel proketo.
21Ka vazden chera, ta ka zivin andre,
ta thoven te bariol e drak ta ka jan latar.#Jer 31.5; Am 9.14.
22Ni ka vazden chera te zivin aver,
ta ni ka thoven e simiche te barion te jan aver,
soke mo foro ka zivil so zivin e kasta,
ta me llene e esvirime ka avel lenge dragostia
e ezgode kai cherde pe vastenchar.
23Ni ka radin pala niso,
ta ni ka avel len minone ta aven proketime,
soke si porodo katar e blagosime e Devletar,
ta lengo porodo lenchar.
24Ta mai anglal te mangen,
me ka dav lenge anglal,
mai anglal te geton pi orba me asundem len.
25O ruv ta o bakro ka arakhen len ande iek than
o liono ka jal char sargo o guruv,
ta o sap ka jal e chik.
Ni ka dukhaven ta ni ka cheren o bilachipe
ande mo santo burdo, gia phenda o Del.#Jen 3.14; Is 11.6-9.
Currently Selected:
Isaias 65: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
