Galatas 2
2
1Nakhle desustar burs ta llelem pale ando Jerusalem e Bernabea, ta inllardem manchar e Tito.#Ech 11.30; 15.2. 2Llelem soke o Del sikada mange kai saia te llau. Ta kote sikadem e llenen e lachi viasta kai phenav e judionenge, ta sikadem e viasta i po chorial nesave llenenge kai gazdarina maskar lende te sai achardol kai so cherava o so cherdem, ni saia iek rado jasardo. 3A ni o Tito, kai saia manchar ta kai saia griego, ni thode le te cherel prema o zakono katar e sirkunsision. 4Ta nesave llene kai cherenape phlal, thodepe po chorial maskar amende te dikhen o mukliardipe kai saia amen ando Kristo Jesus, ta te cheren amen pale esluge katar o zakono. 5A nikada ni muklam te cheren pe piro, soke mangaia te achel tumenchar o chachipe katar e lachi viasta.
6A e llene kai gazdarina mai but maskar lende ni phende mange nisavi orba nevi a mange ni chitilpe so sea von omanglal.#Dt 10.17. 7A von acharde kai o Del dia man o rado te phenav e lachi viasta e llenenge kai inai judiura, isto sar dia e Pedro o rado te phenel e lachi viasta e judionenge. 8Soke isto o Del kai bichalda e Pedro te avel apostol maskar e judiura, bichalda i man te avav apostol maskar e llene kai inai judiura. 9O Santiago o Pedro ta o Juan kai sea e mai bare ande khanlliri, acharde kai o Del dia man gava rado gia sukar, ta die po va mande ta i kai o Bernabe te llangliolpe kai mangena te radi lenchar, ta avila lenge drago te radi amen maskar e llene kai inai judiura a von te radin maskar e judiura. 10Samo mangle amendar te pomozi e chorren, a me ollikana thovav sama gole ezgodake.
11A kana o Pedro llelo ande Antiokia diem pe lete, soke so cherela saia but bilacho. 12Soke mai anglal jala e llenenchar kai inai sea judiura a kana avile nesave llene kai bichalda len o Santiago, ondaka fuladilo lendar ta ni jala ios lenchar, soke darala katar e llene kai pachan but zurale ande sirkunsision.#Ech 11.2-17. 13Ta i ogola llene judiura kai pachana ando Jesus cherde pe leko ande leko kojaipe, pe gachin kai i o Bernabe cherda pe lengo. 14Goleke kana dikhlem kai ni cherena prema o chachipe katar e lachi viasta, phendem e Pedroke angla sa e llene: Tu, kai san judio, ta zivi sargo kana inai san judio; ¿soke chere e llenen kai inai judiura te zivin pe zor sargo kana sea judiura?
Braduime cheres o Jesukristo
15Amen biandilam judiura, ta inai sam bilache sargo gola kai inai judiura. 16A llana kai niko inai llindo chacho soke cherel so phenel o zakono, o manus si llindo chacho soke pachal ando Jesukristo. Goleke i amen pachaiam ando Jesukristo ta gia o Del llinel amen chache cheres gua pachape a na soke chera so phenel o zakono. Soke niko ni ka avel llindo chacho soke cherel so phenel o zakono.#Sal 143.2; Ro 3.20,22.
17Goleke i amen sam bilache soke roda te ava llinde chache cheres o Jesukristo sargo e llene kai inai judiura ¿a te si gia o Kristo cherel amen bilache? ¡Iok! 18Te phagau vareso ta mapalal te vazdaule pale, isto me sem o dosalo. 19Soke cheres o zakono sem mulo e zakonoke te sai ziviu e Devleke a i me sem krustome e Kristoia. 20Ta akana ni ziviu me, o Kristo zivil ande mande. Ta o zivoto kai akana ziviu ande esnaga ziviule cheres o pachape kai si man ande Devleko Chavo kai volisarda man ta dia po zivoto pala ma.#Flp 1.21. 21Ni kamam te mukau pe iek rig o volipe e Devleko soke te avilema llindo cheres o zakono, samo gia muloa o Jesukristo.
Currently Selected:
Galatas 2: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
