Esdras 6
6
1Ondaka o charo Dario phenda te roden ande lila kai arakhena len ande Babilonia, 2ta ande charoina katar e Akmeta, kai si ande phuv katar e Media, malade iek lil kai phenela gia:
3Ando purvo burs kai charoila o charo Siro, phenda te cheren gaia ezgoda:
Cheres o cher e Devleko ando Jerusalem:
Te thodon e barra telal katar e zidura ta te vazden pale o cher, te sai cheren kote e kurbanura. Trubul te avel le bis ta efta pole llik upre ta bis ta efta pole ando bulipe, 4ka chere trin zidura cherde katar e barra bare, ta iek cherdo ande kasta neve. O barvalipe e charoko ka pochinel sa. 5A cheres e ezgode sunakune ta rupune katar o cher e Devleko, gola kai o charo Nabukodonosor ikanda katar o cher e Devleko katar o Jerusalem ta inllarda len ande Babilonia, trubul te irin len ta te inllaren len ando Jerusalem, ta te thoven len ando cher e Devleko kote kai si lengo than.
6Ta o charo Dario phenda e Tatnaieke kai gazdaril ande phuv kai achel pe ogoia rig katar e len Eufrates, ta e Setar Boznaieke ta e llene kai radin lea isto ande goia phuv:
Llantar katar o Jerusalem 7ta muken kai e gazda katar e judiura ta kai e phure te vazden pale o cher e Devleko isto po than kai saia omanglal.#Jag 2.21. 8Ta tumen trubul te pomozin e llenen kai vazden pale o cher e Devleko, ta te pochinen sa so von ka den. Tumen ka cheren le e lovenchar kai chidiniaon katar o foro ta gia te na achel o rado. 9Ta morabi te den suako llive kai e popura katar o Jerusalem, sa so ka phenen von kai trubul len, avena guruvorra, busne o bakre te cheren e kurbanura phabarde e Devleke katar o miloso, o lliu o lon, mol ta o zeitino, 10te sai den e Devle katar o miloso lacho kurbano, ta te molinpe i pala o zivoto e charoko ta i pala leke chaurre.
11Ta vareko te na kandia so me phenav, ka ikanen katar leko cher iek kas baro ta ka mundaren le pusado pe gua kas, ta leko cher ka avel zatrime. 12¡Ta o Del kai esvirisarda te avel thodo leko anav ando Jerusalem, ta te zatril fisave charo o phuvia kai tromala te cherel varesavo bilachipe e chereke katar o Del kai si ando Jerusalem! Me, o Dario, phendem gala orbe. Te cherdol oma sa so phendem.
Pale radin ta geton o rado
13Ondaka o Tatnai, gazda katar e phuv kai achel pe ogoia rig katar e len Eufrates, ta o Setar Boznai ta e llene kai radina lea, cherde oma sa so phenda lenge o charo Dario. 14Ta gia e judiura sai thodepe te radin pale, gia sar phende le e poraukura Jageo ta o Zakarias, chavo katar o Ido. Ta vazdie o cher e Devleko gia sar phenda le o Del katar o Israel, ta gia sar phenda le o Siro, o Dario ta o Artajerjes, charura katar e Persia. 15O cher e Devleko getosailo ando trito llive katar o chon Adar, ando sovto burs kai gazdarila o Dario, charo katar e Persia.
16E israelitura, e popura, e levitura ta sa ellene kai irisailea katar e Babilonia, veselisaile but ta cherde slava e Devle kana die le gua cher. 17Ondaka die stotina guruvorra, dui stotine bakre purane ta star stotine bakre, ta i desudui busne, suako iek pala suako vicha katar o Israel, die len kurbano pala sa o bilachipe katar o Israel. 18Mapalal phende e poponenge savo vreme saia te radin, ta thode e levitonen pe po than te blagosin e Devle ando Israel, prema sar si pisime ando lil katar o Moises.
19Gola kai inllarde len phangle ta irisaile, cherde i e paskua o llive desustar katar o purvo chon. 20E popura ta e levitura jaladepe prema o zakono katar o jaladipe, ta sa sea chiste prema o zakono. Ondaka cherde o kurbano katar e paskua pala sa e llene kai inllardea len phangle ta pala e popura kai radina lenchar ta isto pala pete. 21Sa e israelitura kai irisailea katar o phandipe besle pe sinia katar e paskua, ta lenchar besle sa e llene kai fuladile katar o bilachipe kai cherena e phuvia kai ni pachana ando Del e Israeleko.#Nej 9.2; 10.28; 13.3. 22Sou llive cherde veselimaia e slava katar e marrne kai inai len levadura, soke o Del dia len but veselia kana cherda te pomozil len o charo katar e Asiria, te vazden o cher e Devleko, o Del katar o Israel.#Ek 12.1-20; Dt 16.1-8.
Currently Selected:
Esdras 6: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
