Ezekiel 39
39
O Gog jasarel
1A tu, chavo e manuseko, phen e poroka po Gog, ta phen:
Gia phenda o Del o Gazda:
Me sem joliariko pe tute, Gog, gazda ta charo katar o Mesek ta katar o Tubal. 2Ta ka phagav tut, ka cherav te phire ta ka anav tut pe thana katar o norte, ta ka anav tut pe burdura katar o Israel, 3ta ka ikanav o arko katar cho va o stingo, ta ka peravav che llide katar cho va o chacho. 4Pe burdura katar o Israel ka pere tu ta sa che boñikura, ta e forura kai llele tuia, ta sa e chiriklia kai jan o mas, ta e zivirinie katar e umalia, ka ave lengo jape. 5Upral pe umal ka pere, soke me diem orba, gia phenel o Del o Gazda. 6Ta ka bichalav iag po Magog, te pe gola kai zivin bi darako pasa e mora, ta ka llanen kai me sem o Del. 7Ta ka cherav te achardol mo anav maskar mo foro o Israel, ta nikada ios ni ka mukav te muken ando lallao mo santo anav, ta e phuvia ka llanen kai me sem o Del, o Santo katar o Israel. 8Avel, ta ka cherdol, gia phenel o Del o Gazda, gava so i llive kai dava letar orba.
9Ta e llene kai zivin ando Israel ka liken, ta ka phabaren e ezgode marimake, e eskudura, e arkura ta e llide, e llide kai chudenpe e vastenchar, ta e lanse, ta ka phabaren len ande iag efta burs. 10Ni ka anen kasta katar e umal, ta ni ka chinen e kasta o vosa, soke ka phabaren e ezgode marimake ande iag, ta ka len golendar kai lie lenge ezgode, ta ka choren golen kai chorde len, gia phenel o Del o Gazda.
Prajon e Goge
11Ande gua vreme me ka dav iek than te avel prajome o Gog ando Israel, e umal katar gola kai nakhen karing e rig kai perel o kham katar e mora, ta ka achavel e llenen kai nakhen, soke kote ka avel prajome o Gog ta sa leke llene, ta ka ikharen le e Umal katar o Amon Gog. 12Ta e llene katar o Israel ka prajol len efta chon, te chiston e phuv. 13Sa o foro katar e phuv ka prajol len, ta lenge ka avel glamno o llive kai me ka avav blagosime, gia phenel o Del o Gazda. 14Ta ka len llenen ta ka pochinen lenge te llan e llenenchar kai ka phiren e phuv, te prajon golen achile mule pe phuv, te sai chiston la, ta ka cheren le ande efta chon. 15Ta ka nakhen gola kai phiren e phuv, ta kogo dikhela e kokala katar varesavo manus ka thovel vareso pasa lende te dikhon, lligo ni ka prajon len gala llene ande umal katar o Gamon Gog, 16Ta i o anav katar o foro ka avel Gamona, ta ka chiston e phuv.
17A tu, chavo e manuseko, gia phenda o Del o Gazda:
Phen sa e chiriklienge, ta sa e zivirinienge katar e umal:
Chidiniaon ta aven katar suako rig kai o kurbano kai cherav tumenge, iek baro kurbano pe burdura katar o Israel, ta ka jan o mas ta ka pien o rat. 18Ka jan e zuralengo mas, ta ka pien o rat katar e charura e phuviake, katar e busne, katar e bakre, katar e busne e burdoke, katar e guruva radimake ta e gurova, saurre thuliarde len ando Basan. 19Ka jan o mas lligo ni ka chalion, ta ka pien lligo ni ka maton e ratea katar o kurbano kai cherdem tumenge. 20Ta ka chalion pe mo stali, katar e gra, ta katar e llene zurale kai llan pe gra, ta katar sa e llene kai llan po maripe, gia phenel o Del o Gazda.#Apo 19.17-18.
Pale thovelpe pe po than Israel
21Ta ka thovav mi zor maskar e phuvia, ta sa e phuvia ka dikhen sar chindem mi kris, ta sar thodem mo va pe lende. 22Ta katar gua llive angle, ka llanen e llene katar o Israel kai me sem o gazda lengo Del. 23Ta e phuvia ka llanen kai inllarde phangle e llenen katar o Israel pala lengo bilachipe, soke ni kamle te kanden man ta me gurudem lendar mo mui, ta diem len ande va katar lenge dusmanura, ta saurren mundarde e jarnienchar. 24Prema lengo gadope kai cherde ta prema lengo bilachipe gia cherdem lenchar, ta ni gurudem lendar mo mui.
25Goleke, gia phenda o Del o Gazda:
Akana ka cherav te irinpe e phangle katar o Jakob, ta ka avel mange zao katar e llene katar o Israel, ta ka sikava lenge kai sem joliariko pala mo santo anav. 26Ta kana von ka zivin esmiro ta ni ka avel ko te daravel len, ka avel lenge lallao soke ni kamle te kanden man, ta pala o bilachipe kai cherde mange. 27Kana ka ikanav len katar e forura, ta ka chidav len katar e phuv katar lenge dusmanura, ta kana ka avav blagosime ande lende angla but phuvia. 28Ta ka llanen kai me sem o Del o Gazda, kana ka ikanav len katar o phandipe kai von sea ande phuvia ta ka chidav len ande lengi phuv ta ni ka achel incha niko. 29Ta ni ka guruvav ios lendar mo mui, soke ka mukav te perel katar mo duo po foro katar o Israel, gia phenel o Del o Gazda.
Currently Selected:
Ezekiel 39: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
