Ezekiel 27
27
Llili zalosno katar o Tiro
1O Del dia manchar orba ta phenda mange: 2Tu, chavo e manuseko, rov po Tiro. 3Phen e Tiroke, kai besel pasa e mora, kai cherel arli bute foronenchar kai si pe more:
Gia phenda o Del o Gazda:
Tiro, tu phendan kai san but sukar.
4Kai chiri si e phuv chak endre ande mora,
gola kai cherde tut gotovisarde cho sukaripe.
5E kastenchar kai ande katar o burdo Senir
cherde sa kotora kastune,
e kastenchar katar o sedro cherde chuke o berand.
6Katar e ensina katar o Basan cherde
che kasta kai cheren tut te lla ando pai,
che stoliche cherde len katar o pino
kai si ando Kitim pasa e mora,
ta si marde ando rup.
7Sukar suvdipe katar o Ejipto
sea cherde che chitura cherde katar o lino
te thove len te inllarel tut e balav.
Che toldura sea vunete ta lole
katar o foro Elisa kai si pasa e mora.
8Katar o Sidon ta katar o Arvad
sea e llene kai cherena e kastaenchar te lla angle,
ioi Tiro, che llene e bizai sea ande tute
von tradena chuke ande mora.
9E phure katar o Gebal
ta e mai lache llene kai radin
thovena o turkali kote kai saia putardipe,
sa e llimia katar e mora
ta e llene kai cherena len te llan angle
llele tute te chinen ta te bichinen tuia
te cheren tuia arli.
10E llene katar e Persia ta katar o Fut
sea che boñikura,
von sea che llene kai llana te marenpe,
eskudura ta challa sastrune umblade pe tute,
ta cherena tut te klichi ando sukaripe.
11Ta e chave katar o Arvad sea che boñikonenchar sea upral pe che zidura kai si truial, ta e gamadeura sea upral pe che bare chera, pe eskudura umblade pe che zidura kai si truial, von gotovisarde cho sukaripe. 12O Tarsis arlila tuia soke sana but barvalo, ando rup, o estaño ta o molivi cherela arli ando basari. 13O Jaban, o Tubal ta o Mesek i von arlina tuia ande cho basari. 14E llene katar o Togarma, e grastenchar kai llan po maripe ta e magarchenchar, cherena arli ande cho basari. 15E chave katar o Dedan cherena tuia arli, but forura kai si pe mora chinena tutar ezgode, ta pochinena chuke ande danda e zivirinienge ta kasta katar o ebano. 16O Edom cherela tuia arli soke sea tut but ezgode, anena klea lole, patave cherde ando sukar suvdipe, o mai lacho lino, barra e morake, barra lole, te cheren tuia arli. 17O Juda ta o Israel cherena tuia arli, ando lliu katar o Minit ta o Panag, aullin, zeitino ta meriso cherena arli ande che basaria. 18O Damasko cherela tuia arli soke sea tut but ezgode, soke saia tut but barvalipe, cherena tuia arli e moliaia katar o Jelbon ta e bakrenge bal e parrne. 19Ta i o Dan ta o Javan avena kai che basaria ta anena sastri mardo te cheren arli, mirra ta kas kai khandel sukar. 20O Deban arlila tuia ande sukar piskiria te thove pe che bordona. 21E Arabia ta sa e sudura katar o Sedar arlina tuia ande bakre ta busne, gia pochinena chuke. 22E llene katar o Saba ta o Raama arlisarde tuia, tute ande e ezgode kai khandel mai sukar, ta suako barra kuch, ta sunakai ande kai che basaria. 23O Jaran, o Kane, o Eden ta e llene katar o Saba, katar e Asiria ta katar o Kilmad, arlina tuia. 24Gala llene arlin arlina tuia ande but ezgode, gertacha vunete ta chitura ando sukar suvdipe, baulia patavenge but sukar ta ulime pe lende sole kuvde ta kasta katar o Sedro. 25E llimie katar o Tarsis sea sargo gola kai avena iek pala aver te anen che ezgode kai bichindon.
Gia cherdilan barvalo,
gia barilan po maskaral katar e more.
26Ande but more inllarde tut che llene
kai cherena te llal angle e llimia.
E tati balav lia tutar e vlaga pe more.
27Cho barvalipe, che ezgode kai bichine,
che llene kai cherena te llan e llimie,
che llene kai tradena e llimie,
che llene kai lacharena e llimie, gola kai arlina,
che boñikura kai sea tut ta sa
che llene kai sea tut, ka peren ande mora
o llive kai tu ka pere.
28Kana ka urkin che llene kai radin ande mora,
ka dermolpe e phuv kai si pasa e mora.
29Ka fulien katar e llimie sa gola
kai cherenla te llal angle
ta e llenenchar kai traden e llimie
ka achen pe phuv,
30ta ka asundol lengo avazi upral pe tute,
ta ka roven zalbaia ta ka chuden o prajo
pe po soro ta ka taulinpe po prajo.
31Pala tute ka jaliaren po soro,
ka thoven pe pete patave zalosno,
ta ka roven pala tute iek baro roipe
sa pe liea ka roven bare zalbaia.
32Ande po roipe ka phenen tutar gia:
¿Ko saia sargo o Tiro, ko saia sargo
o zatrime ande mora?
33Kana likena katar che llimie che ezgode,
but forura achena pherde,
barvaona e charura katar e phuvia
e bare barvalimaia kai tu anea te cheren arli.
34Ando vreme kai ka ave peradino ande mora
chak andre ando pai, sa che llene ta cho arli
ka peren tuia telal katar e mora.
35Sa e llenenge kai zivin pasa e mora
ka avel but chudo cheres tu
la lenge charura ka izdran daratar,
lengo mui ka cherdol aver pala e dar.
36E llene kai chinen ta bichinen
ka den sol ta ka maren tutar espurnia
cherdilan dar maskar e llene,
nikada ni ka ave ios.#Apo 18.11-19.
Currently Selected:
Ezekiel 27: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
