Eksodo 30
30
O altar e taimanoko
Ek 37.25-28
1Ta i cher iek altar cherdo katar o kas kai ikhardol akasia, te sai phabare o taimano. 2Morabi te aven le star riga, te avel le saranda ta panch sentrimetrura lungimatar, ta saranda ta panch sentrimetrura bulimatar, ta iniarvardes sentrimetrura vazdino upre, e singa ta o altar morabi te cherdon katar iek kotor. 3Ta ka ucharele ando sunakai lacho so si upral, ta so si truial ta leke singa, ta thov iek fisia sunakuni truial letar. 4Ta thov leke nesave alkave sunakune telal katar e fisia, dui pe iek rig ta dui pe ogoia rig, te sai nakhaven lendar e pulsura te sai avel inllardo. 5Cher e pulsura katar o kas kai ikhardo akasia, ta uchar len ando sunakai. 6Mapalal thov o altar angla e kortina kai si pasa e arka katar e alava, angla o propiasiotorio kai ucharel le. Kote kai me ka maladivav tuia. 7Suako drom thiarinako rano, kana lachardon e lampare, o Aaron ka phabarel taimano upral katar gava altar, 8ta i ka phabarel le kana ka perel e riat ando saiato kai phabardon e lampare. Gava ka cherdol angla o Del ostade sa e bursenchar. 9Na de upral katar gava altar ni iek aver taimano, ni kurbano ni so si dino katar e simiche, ni so si dino katar e mol kai chordol. 10Gava altar ka avel santifikado e Devleke, ta iek drom ando burs o Aaron ka del upral katar e singa katar o altar o rat katar o kurbano te sai aven prostime katar o bilachipe. Gava ka cherdol suako burs.
E love kai denpe pala o zivoto
11O Del dia orba e Moisesea ta phenda leke:
12Kana ka lline e israelen, suako lleno lendar morabi te del vareso e Devle te sai braduil po zivoto, gia te na avelpe ni iek muka te mundarel len kana ka aven llinde. 13Sa e llene kai ka llindon morabi te den e Devle panch gramura rup, gia sar pharivena ande chara e Devleki.#Ek 38.25-26; Mt 17.24. 14Sa e llene kai ka llindon bise bursenge upre ka den gaia ofrenda e Devle, 15ta kana ka del suako lleno e Devle te braduil po zivoto, ni o barvalo ni ka del mai but neko panch gramura rup, ni o chorro ni ka del mai cherricha neko panch. 16Gia ka chide o rup katar e israelitura kai ka den te sai braduin po zivoto, ta ka de so chidian e charake kai chidiniaon. Gava ka cherel o Del te delpe golli katar e israelitura ta kai die te braduin po zivoto.
O lelleno tuchno
Ek 38.8
17O Del dia orba e Moisesea ta phenda leke:
18Cher iek lelleno katar o tuch, ta o than kote kai ka thodol te avel cherdo i katar o tuch, te sai jalavenpe, thov le maskar e chara kai chidiniaon ta o altar, ta pherle pai.#Ek 38.8. 19O Aaron ta leke chaurre ka ikanen pai kotar te jalaven pe va ta pe porrne. 20Ta ka jalavenpe kana ka den ande chara kai chidiniaon, ta kana ka aven kai o altar te radin ta kana ka anen so si dino phabardo e Devleke, gia von ni ka meren. 21Ta te na meren morabi te jalaven pe va ta pe porrne. Gava ka avel iek zakono ostade sa e bursenchar e Aaronoke ta leke porodoke.
O zeitino kai thodol pe so si dino
Ek 37.29
22O Del dia orba e Moisesea ta phenda leke:
23Esvirisar isto tu e mai sukar patra kai khanden sukar:
Iek sov kile katar e mai sukar mirra, ta iek trin kile katar o karanfili, ta iek trin kile katar ek kastorro kai khandel sukar. 24Ta iek sov kile katar e akasia phariarde prema sai phariadol ande chara e Devleki, ta iek trin litrura ta dopas zeitino maslinkako. 25Cher sa gale ezgodenchar o zeitinoia santo katar so si dino, isto gia sar o lleno lacharel o meriso. Gava ka avel o zeitino santo katar so si dino, 26ta morabi te churdol upral pe chara kai chidiniaon, po altar katar e alava, 27po stali sa pe ezgodenchar, po kandelabro sa pe ezgodenchar, po altar katar o taimano, 28po altar katar e kurbanura sa pe ezgodenchar, po lelleno ta i po than kai thodol. 29Gia ka aven dine ta gia ka aven but sante, vareso te dodila len ka achel santo.
30Chor i katar gava zeitino po Aaron ta pe leke chaurre, te sai aven dine mange popura. 31Ta phen gala alava e israe: Sa e bursenchar gava ka avel mo zeitino santo katar so si dino. 32Na chorle pe varesavo lleno, ta na lacharen aver zeitino sargo gava. Vou si iek zeitino santo, ta gia morabi te dikhen le. 33A vareko te lacharela iek zeitino sargo gava ta te chorelale pe varesavo lleno kai inai pinllardo, gole llene ka traden le tumendar.
O taimano
Ek 37.29
34O Del phenda e Moiseseke:
Le katar gala ezgode kai ka phenav chuke resina, uña kai khandel, taimano lacho ta galbano kai khandel sukar.
35Ta lachar lenchar iek taimano lacho ta santo, amime sukar, sargo eik lleno kai cherel o meriso. 36Ta ka drobole lligo ni ka cherele prajo, ta thov le angla e arka katar e alava, ande chara kai chidiniaon, kote kai me ka maladivav tuia. Gava taimano ka avel santo tumenge, 37ta ni ka cheren aver taimano sargo gava tumenge, soke si e Devleko, ta chuke ka avel iek ezgoda santa. 38Ko cherela iek taimano sargo gava peke te khanden le, ka avel tradino tumendar.#Ek 37.29.
Currently Selected:
Eksodo 30: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
