Ester 9
9
E judiura dobin
1Ando llive desutrin katar o chon desudui kai ikhardol Adar, e judiura saia te cheren so phenda o charo, ta ande gua llive lenge dusmanure saia te zatrin len, a avilape aver ezgoda, soke e judiura zatrisarde len. 2Ande sa e phuvia katar o charo Asuero kaigo zivina e judiura, chidiniaona te marenpe e llenenchar kai mangena te cheren lenge o bilachipe. Ta niko ni marelape lenchar soke sa e forura darana lendar. 3Sa e sudura ta e llene kai gazdarina ande phuvia ta ande forura, pomozina e judionen soke darana katar o Mardokeo, 4soke vou saia iek manus glamno ando cher e charoko, ta cherdola sa mai asundo ande suako phuv, ta suako llive saia le mai but gazdaripe. 5E judiura mundarde e jarnienchar sa pe dusmanonen, zatrisarde saurren, ta cherde lenchar sogo mangle. 6Samo ando foro Susa mundarde panch stotine llenen, 7ta i avile mundarde o Parsandata, o Dalfon, o Aspata, 8o Porata, o Adalia, o Aridata, 9o Parmasta, o Arisai, o Aridai ta o Vaizata, 10kai sea e des chave e Amaneke, o dusmano e judionengo, a lenge ezgode ni lie len peke.
11Isto gua llive, kana o charo llangla gachine llenen mundarde e judiura ando foro Susa, 12o charo phenda e Estereke e charoina:
E judiura mundarde panch stotine llenen ta i e dese chaven e Amaneke ando foro Susa. ¡So ni cherde ande ogola phuvia! ¡Phen so ios mange, ta me ka cherav le!
13Ta e Ester phenda leke:
Te mangea tu, muk e judionen katar o foro Susa, te cheren thiara isto so cherde allive prema o lil, ta te umblaven pe sole e esnage katar e des chave e Amaneke.
14Ta o charo phenda te cheren le gia. O lil sikadilo ande Susa, ta umblade e esnage katar e des chave e Amaneke.
15E judiura kai zivin ande Susa pale chidinaile ando llive desustar katar o chon Adar, ta kote mundarde trin stotine llenen, a ni lie peke lenge ezgode. 16Ta e judiura kai zivina ande ogola phuvia chidinaile te marenpe pala po zivoto ta te kurtulinpe katar pe dusmanura, mundarde eftavardes ta panch milie llenen, a ni lie peke lenge ezgode. 17Gala ezgode nakhle ando llive desutrin isto katar o chon Adar. Ta ando llive desustar achile ta cherde iek baro jape, ta saia but veselia.
18A e judiura kai chidinailea ande Susa e llivesa desutrin ta desustar, ta ando llive desupanch achile, ta i von cherde iek baro jape ta saia but veselia. 19A e judiura kai zivina ande forura ta forichura kai ni saia len zidura truial, cherde le ando llive desustar katar o chon Adar, ta ande veselia ta dragostia dena ezgode iek avere.
E slava katar o Purim
20O Mardokeo pisisarda sa gala ezgode kai nakhle, ta bichalda lila kai sa e judiura kai zivina ande phuvia kai charoila o charo Asuero, golenge kai sea pase, ta i golenge kai sea dur, 21ta phenda te avel veselia suako burs ande llivesa desustar ta desupanch katar o chon Adar, 22sargo ande llivesa kana e judiura kurtulisaile katar pe dusmanura, ta gia sar isto ande iek chon e zalba cherdili veselia. Gala llivesa trubul te cherdol baro jape, te avel veselia, te den ezgode iek avere, ta te pomozin e chorren. 23E judiura sikadile te cheren gala ezgode gia sar pisisarda lenge o Mardokeo. 24Soke o Aman, chavo katar o Amedata katar e vicha katar o Agag, o dusmano sa e judiunengo, mangela te zatril len kana cheldape te dikhel kana ka mundarel len ta te zatril len, 25a kana e Ester lleli kai o charo, vou phenda ta pisisarda te perel pe Amaneko soro sa o bilachipe kai mangela te cherel e judionenge, goleke umblade e Amane ta leke chaurren. 26Goleke gala llivesa ikhardon Purim, kai avel katar o alav Pur.#Est 3.7.
Ta gia prema so phenela o lil kai cherda o Mardokeo, ta prema so dikhle, ta so sikile, 27e judiura mukle peke gala llivesa ta pe porodoke, ta sa e llenenge kai cherdona judiura:
Ka cheren le suako burs, ta ni ka jasaren ni iek katar gala dui llive gia sar pisisarda tumenge o Mardokeo, 28ta te denpe golli ta te veselinpe ande gala llivesa e chaurrenge chaurre, ande suako familia, phuv ta foro, ta gia te na jasaon e llivesa katar o Purim ta te achel ando mislo katar e judiura ta katar lengo porodo. 29E charoina Ester, chei katar o Abiail, ta o judio Mardokeo, pisisarde gazdarimaia iek duito lil kai dela orba katar e slava katar o Purim, te sai del zor ogole lile kai pisisardaia o Mardokeo. 30Ta bichalde le ande alava pachivale kai sa e judiura katar stotina ta bis ta efta phuvia e Asueroke. 31Ando lil phenela kai morabi te cheren e slava katar o Purim ande llivesa kai phendaia o Mardokeo ta e charoina Ester, te cheren le von ta lengo porodo. Ta i thode aver sakonura katar o alluno ta katar o roipe, 32ta so phenda e Ester chacharda ezgode kai saia te cheren pe slava katar o Purim. Ta sa gala ezgode pisisaile ande iek lil.
Currently Selected:
Ester 9: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
