Ester 8
8
O lil kai pomozil e judionen
1Isto gua llive, o charo dia e Estere o cher kai saia e Amaneko, o dusmano e judionengo, ta o Mardokeo llelo kai o charo, soke e Ester phendaia e charoke kai o Mardokeo saia lako kako. 2Ondaka o charo ikanda katar po nai e angrusti kai diaia e Amane, ta dia la e Mardokeoke. A e Ester thoda tala leko va sa e ezgode kai sea e Amaneke. 3Mapalal e Ester pale dia orba e charoia, ta chudiape pe leke porrne ta molisaili leke rovindo, te na cherel o bilachipe kai phendaia o Aman, ta te na cheren niso e judionenge. 4O charo inzarda pi rovli sunakuni karing e Ester. Voi ustili pe porrne angla le. 5Ta phenda leke:
Te mangea tu charo, ta te phenea kai si orta so mangav tutar, ta te volia man chachimaia, phen te pisilpe iek lil kai phagel e lila kai bichalda o Aman, chavo katar o Amedata, katar e vicha katar o Agag, kai phenen te mundaren sa e judionen kai zivin ande phuvia e charoke. 6Soke me nasti ka terpiu e zatrania kai si te nakhel mo foro, ta o mundaripe katar mi familia.
7Ondaka o charo Asuero phenda e Estereke ta e Mardokeoke:
Me diem e Estere o cher kai saia e Amaneko, a e Amane umblade le pe iek solo soke mangela te mundarel e judionen. 8Akana me mukav tumen te pisin ande mo anav o lachipe kai mangena tumen tumare foroke. ¡Ta thoven pe gola lila o sello katar e angrusti e charoki! Soke iek lil kai si ando anav katar iek charo, ta si pe lete leko sello, nasti phagen leke alava.
9Ondaka Ikharde oma e llenen kai pisina e charoke. Gua llive saia o bis ta trin katar o trito chon kai si Sivan. Ta sa so pisisarda o Mardokeo pisisailo e judionenge, e llenenge kai gazdarina e charoke ande stotina ta bis ta efta phuvia kai si katar e India llik kai e Etiopia, ta prema sar den orba, ta sar pisin ande suako phuv. Ta i e judionenge pisisarde ande lengi chib ta prema sar pisin von. 10E lila sea pisime ando anav katar o charo Asuero. Thode pe lende o sello e charoko, ta e llene inllarde len pe gra kai sea e charoke. 11Ande gola lila o charo phenela kai ande savo foro avena e judiura, sai chidiniaon te marenpe pala po zivoto, ta von te mundaren, ta te zatrin e llenen katar e phuvia ta forura kai ka marenpe lenchar, ta te na chitilpe lenge te avena diskinie o minone, ta te len peke lenge ezgode. 12Ta sa gala ezgode saia te cherdon ande iek llive ta ande sa e phuvia katar o charo Asuero. Gua llive saia o desutrin katar o chon desudui, kai saia o chon Adar. 13Ta aver lil isto sargo gua saia te sikadol sargo zakono kaigo zivina llene ta ande sa e phuvia, ta gia e judiura te aven lacharde ande gua llive te sai zatrin pe dusmanonen. 14Ta o charo phenda te inllaren e lila oma, ta inllarde len pe gra charoke. Ta o lil sikadilo i ando foro Susa.
15O Mardokeo likisto katar o cher e charoko furiado ande patave vunete ta parrne ta pe leko soro saia iek bari korona sunakuni ta iek gertachi cherdo katar o lino lolo. Ta sa e llene katar o foro urkina veselimatar, 16ta e judionenge saia but dragostia ta veselia soke sea llunde. 17Ande sa e phuvia ta forura kai sikadola o lil e charoko, e judiura pherdona veselia ta dragostia, ta cherena jape ta slave. Ta i but llene cherdile judiura, soke darana katar e judiura.
Currently Selected:
Ester 8: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
