Efesios 4
4
Na muken o volipe maskar tumende
1Goleke me kai sem phanglo cheres o Gazda, mangav tumendar te zivin sar morabi te zivin e llene kai si ikharde e Devletar, gia sar sen tumen ikharde. 2Te aven proste ta lache ta te terpin iek avere volimaia,#Kol 3.12-13. 3trudin tumen te aven ande iek than cheres e pas kai chidel saurren tumen o Santo Duo, 4samo iek esnaga ta samo iek Duo gia sar o Del ikharda tumen ande iek pachape. 5Samo iek Gazda, iek pachape, ta samo iek kristope, 6samo iek Del kai si o Dad saurrengo kai si upral pe sa ta radil saurrenchar ta si ande sa.
7A suakone llene amendar o Kristo dia amen so vou mangla te del amen. 8Goleke o Pisipe phenel gia:#Sal 68.18.
Kana likisto ando miloso inllarda pea e phanglen,
ta dia e manusen o bizaipe te llanen so te cheren.
9¿A so mangen te phenen gola alava kai likisto? Gola alava phenen kai mai anglal fulisto pe gaia phuv. 10Ta gua kai fulisto si isto gua kai likisto mai upre katar o miloso, te sai pherel sa. 11Ta isto vou si kai dia nesave llenen te aven apostolura, averen te aven poraukura, averen te phenen e lachi viasta, ta averen te aven chobanura, averen te aven gola kai sikaven. 12Gia lacharda e llenen katar o foro santo te cheren iek buchi te sai bariaren e khanlliri e Kristoki 13lligo ni ka resa saurre te ava ande iek than ando pachape ta te llana katar o Chavo e Devleko, te ava llene gotove gia sar si o Kristo. 14Ta ni ka ava sargo minone kai but oma pharruven po mislo ta kai pala varesavi orba muken te kojaven len e llene llangle kai si pherde kojaipe. 15Goleke morabi ando volipe te phena o chachipe, ta te bariva karing o Kristo kai si o soro e esnagako. 16Ta pala o Kristo sa esnaga thodol pe po than; ta kana sa e esnaga radil pe po than, bariol ta lachardol ando volipe, ta kana suako kotor lako radil sukar, sa voi bariol ta vazdiniaol ando volipe.#Kol 2.19.
O nevo zivoto ando Kristo
17Gava si so phenav tumenge te cheren ando anav e Gazdako: te na zivin sargo e llene kai ni pinllaren e Devle ta zivin prema pe dile mislura 18ta ni acharen niso. Von ni veselinpe ando zivoto kai del o Del, ta ni acharen soke lengo lio kai si zuralo ni mukel len te acharen. 19Goleke lengo lio zurailo ta diepe ando kurvaluko ta cheren suako ezgode bilache ta pogani.#Ro 1.21-25. 20A tumen ni pinllarden e Kristo te zivin gia, 21soke chachimaia tumen asunden e orba cheres lete ta sikilen te zivin sar vou mangel prema o chachipe kai si ando Jesus. 22A cheres sar zivina omanglal, chuden tumendar gua purano manus kai murisailo pala pe bilache mislura.#Kol 3.9. 23Morabi te aven neve ando duo tumare mislura 24ta te furiadon katar o nevo manus cherdo prema o Del te achardol kai tumaro zivoto si Devlikano ta kai llan pala o chachipe.#Jen 1.26; Kol 3.10.
Sar morabi te zivi akana
25Goleke na kojaven ios, mai sukar si te phenel suako lleno o chachipe iek avereke, soke saurre sam katar iek esnaga.#Zak 8.16; Ro 12.5.
26Te joliaona, na cheren o bilachipe. Tumari joli te na avel pe tumende sorro llive.#Sal 4.4; Stg 1.19-20. 27Na den than e llavolo.
28Gua kai vazdela te na vazdel ios ta te thovelpe te radil ta te cherel iek lacho rado pe vastenchar, te sai avel le vareso te del e llenen kai trubul len. 29Na phenen brusne alava, mai sukar phenen ezgode lache te sai bariaren o pachape averengo. 30Na cheren te tristolpe o Santo Duo e Devleko, soke cherda te achardol kai sen leke ando llive kana vou ka braduil tumen. 31Muken o tristope, na joliaon na urkin ta na kusen averen, ta muken o bilachipe. 32Morabi te aven lache ta postene iek averea, ta maskar tumende prostin tumen gia sar o Del prostisarda tumen ando Kristo.#Kol 3.13.
Currently Selected:
Efesios 4: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
