Eklesiastes 7
7
Thou sama pe ezgode kai si mai preche
1Mai mol e orbe lache kai den tutar
neko o mai lacho meriso.
Mai mol o llive kai o manus merel
neko o llive kana biandol.#Pr 22.1.
2Mai mol te lla kai o cher zalosno
neko kai o cher kai si iek bari sinia,
soke o meripe si o son katar suako manus,
ta gua kai zivil si te mislilpe ande goia ezgoda.
3Mai mol te rove neko te asa,
soke o roipe sai tristol o mui
a lacharel o lio.
4O lleno bizai mislilpe ando meripe,
a o dilo samo mislilpe te asal.
5Mai mol te asune sar del pe tute iek bizai,
neko te asune sar falil tut iek dilo.
6Soke o asape e dileko si
sargo kana phabon e karrne telal katar e kavi.
Ta i gaia ezgoda ni mol la niso.
7O silnope diliarel e bizaie,
ta o sebapi kai si pochindo muril o lio.
8Mai mol o son katar iek buchi
neko kana iakom llal angle.
Mai mol o lleno dukhado
neko o lleno barikano.
9Na joliao oma ande cho lio, soke e joli si ande dilengo lio.
10Nikada na puch:
¿Soke omanglal e ezgode sea mai lache neko akana? Soke inai bizaipe te puche goia ezgoda.
11Sukar si o bizaipe e lovenchar kai achen katar e familia e llenenge kai zivin pe gaia phuv. 12Soke e love ta o bizaipe arakhen, a mai mol o bizaipe soke del zivoto e bizaie.
13Dik so cherda o Del, ¿ko sai ortol so o Del bangarda? 14Kana ka llal chuke sukar veselisao pala gua lachipe. A kana ka llal chuke gado, mislisao kai o Del cherda e dui ezgode te na llanel o manus so ka avelpe mai angle letar.
15Sa gala ezgode dikhlem ande mo zivoto kai ni mol le niso. O chacho merel pala po chachipe, ta si llene bilache kai pala po bilachipe zivin mai but burs.
16Te na ave but chacho,
ta te na ave but bizai.
¿Soke ka zatri tu tut?
17Na cher but bilachipe,
ta na cher tut dilo.
¿Soke te mere mai oma?
18Sukar si te istare iek ezgoda
bi te muke ogoia,
soke o lleno kai del liubao e Devle
ka llal leke sukar pe suako ezgoda.
19Mai but zor del o bizaipe e bizaie
neko des kraliura iekhe foro.
20Chachimaia inai ni iek lleno chacho pe phuv te cherel o lachipe suako llive, ta te na cherel nikada o bilachipe.#1 Jn 1.8-10.
21Ta na thov sama pe sa e orbe, ta gia ni ka asune kana cho sluga del orbe bilache tutar, 22soke tu llane kai but droma i tu dian orbe bilache katar aver llene.
Roda o bizaipe
23Sa gala ezgode zumadem len bizaimaia, ta phenava me mange:
Ka avav bizai, a o bizaipe naslo mandar. 24So saia si dur mandar, ta so si chak andre ¿ko ka malavel le?
25Pale dikhlem ta thodem man sa me liea te sikivav ta te lav o bizaipe ta so si orta, te sai llanav kai te ave bilacho si iek dilipe ta te ave besno si iek dilipe.
26Ta maladem kai si mai cherki neko o meripe e diskinia kai ande lako lio si o kojaipe, ta kai lake va si sole kai phanden. O lleno kai si drago e Devleke ka nasel latar, a o bilacho ka achel phanglo ande lake va.#Pr 5.7.
27Me o lleno kai sikavel phenav gia:
Rodiem o chachipe katar sa e ezgode, ta reslem pe gaia orba: 28Kai llik kate ni malavav so rodav chachimaia. Maladem iek murus maskar e milia, a ni maladem ni iek diskinia maskar sa e diskinie. 29Ta samo iek ezgoda maladem:
Kai o Del cherda e manusen orta, ta von rodie te murin po zivoto.#Jen 1.26-31.
Currently Selected:
Eklesiastes 7: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
