Deuteronomio 22
22
1Vareko tumendar te dikhela jasardo o guruv o o bakro katar iek lleno kai si katar tumari phuv, morabi te thoven sama, ta te pomozil le ta te iril le kai gua lleno. 2A te na llanena kaki si e zivirinia ka inllarel la kai tumaro cher lligo gua lleno kai jasarda la rodela la ondaka morabi te iril la leke. 3Isto gua ka morabi cheren leke magarchoia leke patavenchar o sogo avela jasardo gole lleneko ta kai tumen malavena.
4A vaeko tumendar te dikhela peradino po drom o magarcho o o guruv katar o lleno kai si katar chi phuv, morabi te thove sama ta te pomosile te vazdel le.
5E diskinia morabi te na thovel pe pete patave muruseke, ta ni o murus morabi te na thovel pe pete patave diskiniake, soke e Devleke tumaro gazda inai drago ko cherela gala ezgode.
6Vareko te malavela po drom iek kuibo chirikliengo pe vareso kas o pe phuv, kai ande lete si chirikliorra o arrne ta lengi dei upral pe lende, nasti ka achel peke lenge diaia ta lake chilikiorrenchar, 7samo sai ka achel e chilikliorrenchar ta te mukel lengi dei te llaltar. Gia ka ave blagosime ta ka zivi but bursa.
8Kana vareko tumendar vazdela iek cher nevo, morabi te thovel iek zido trual katar o cher upre, gia ni ka avel dosali chi familia te perela vareko upral katar cher.
9Na thov katar but simiche ande cho vostano te na jasaol sa, pe gachin e simicha kai thodan ta i e septelia e drakhengi.
10Na putar e phuv e iekhe guruvea ta iekhe magarchoia.
11Na thoven pe tumende patave lanane ta i linoke.
12Ka chere banbuline pe estar riga katar cho gertachi kai uchare tut.#Nm 15.37-41.
E zakunura katar e chea
13Kana iek lleno lela iekhe diskinia ta mapalal kana sov to laia ni volila la 14ta phenela ezgode bilache latar ta phenala:
Liem gale diskinia, ta sovtem laia ta voi ni saia chei, 15ondaka o dad katar e chorri ta laki dei ka len ta ka ikanen te dikhol kai voi saia chei kai o udar katar o foro, 16ta o dad katar e chorri ka phenel e phurenge: Me dien me chorra pala gava lleno te avel leki rromi, a vou akana ni ka mel la 17ta vou phenel bilache ezgode latar ta ikanel bune pe late, ta phenel: Che chorra ni maladem la chei, a dikhen akana sar dikhol e pachiu me chorraki. Ta ka inzaren e patave angla e phure katar o foro. 18Ondaka e phure katar o foro ka istaren gole llene ta ka dukhaven le 19ta ka cheren le te del stotina kotora rupune, kai o dad e chorrako soke inllarda bune bilache pe iek chei katar o Israel ta voi ka avel leki rromi ta nasti ka mukel pe latar nikada.
20A te avela de istina kai ni saia chei 21ondaka ka ikanen la kai o udar lake dadeko, ta ka mundaren la e barrenchar e murusa katar o foro, soke cherda o bilachipe ando Israel soke kurvisaili ando cher pe dadeko, gia ka ikanen o bilachipe maskar tumende.#1 Kor 5.13.
22Te arakhena iekhe llene kai sovela iekhe diskiniaia zinime, e duienge ka chinen te aven mundarde. Gia tumen ka ikanen o bilachipe katar o Israel.
23Te avela iek chei dini te zinilpe iekhe llenea ta aver lleno malavela la ando foro ta sovela laia, 24ondaka ka ikanen e duien kai e kris e foroki kai o udar e foroko, ta ka avel lenge chindo te mundaren len e barrenchar:
E chorra soke ni urkisarda te pomozil la ando foro, ta e llene soke dia ando lallao avereke dinkinia. Gia ka ikanen o bilachi maskar tumende.
25A iek lleno te malavela ande umal iekhe chea dine te zinilpe iekhe llenea a vou pe zor sovela laia, ondaka samo ka mundardol e lllene kai sovto laia. 26A e chorrake ni ka cheren niso, soke ni cherda ni iek bilachi te chindol pe lake te merel, gava si sargo kana iek lleno mundarel avere, 27soke vou malada e chorra korkorre ande umal ta voi i te urkisardaia niko nasti pomozisardaia la.
28A kana iek lleno malavela iekhe chorra kai si chei ta pezor sovela laia ta gua llangliolape, 29Ondaka gua lleno morabi te del kai o dad gole chorrako pinda tolaria rupune, ta sar dia la ando lallao morabi te zinilpe laia ta nasti ka mukelpe latar nikada.
30Niko nasti kurvilpe e diskiniaia katar po dad soke te cherela le ka del ando lallao pe dade.
Currently Selected:
Deuteronomio 22: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
