Deuteronomio 13
13
1Kana ka vazdiniaol iek profeta maskar tumende o iek lleno kai dikhel sune ta phenela kai iek bari ezgoda ka nakhel, 2ta te nakhela goia ezgoda kai phenda tumenge ta te phenela: ¡Aven lla pala aver dela kai tumen ni pinllaren aven te blagosi len!, 3Tumen te na thoven leke sama. Soke o Del tumaro Gazda mangel te zumavel tumen te sai dikhel o tumen volin le sa tumare liea ta sa tumare zivotoia. 4Llan ta den liubao samo e Devle tumaro gazda, kanden leke alava ta asunen leko avazi ta blagosin le, ta samo pala le te llan. 5Ta gua profeta o gua kai dikhel sune morabi te avel mundardo soke phenda tumenge te vazdiniaol po Del tumaro Gazda kai ikanda tumen katar o Ejipto kote kai sena sluge, ta soke mangena ikanen tumen katar o drom kai o Del tumaro Gazda phendaia tumenge te llan. Gia ka ikane o bilachipe kai si maskar tumende.#1 Kor 5.13.
6I te avela isto cho phlal, o cho chaurro o chi chorri, o chi rromi, o cho mai lacho amal, te phenela chuke po churial:
Aide te blagosi avere delen kai ni pinllara kai ni che dada ni pinllarde, 7e dela katar e forura kai si truial tumendar, kai si pase o tur tutar, katar iek rig katar e phuv llik kai ogoia rig katar e phuv, 8gole lleneke na thov leke sama ta asun le ta te na avel chuke zalba letar ta ni ka arakhe le, 9ka mundare le. Ta tu ka ave o purvo te vazde cho va pe lete ta mapalal tutar sa o foro ka cherel isto gua. 10Chude barra ande lete lligo ni ka merel, soke mangela te duriavel tut katar o Del cho gazda, kai i kanda tut katar o Ejipto kote kai sana sluga. 11Gia sa o Israel ka llanel le ta ka avel le dar te cherel pale iek ezgoda bilachi sargo gaia.
12A ande varesavo foro kai o Del tumaro Gazda dia tumen te zivin asundola 13kai vazdinaile llene kai ni kanden e Devle ta kai phende:
Aven te blagosi e delen kai ni pinllara. 14Ondaka tumen morabi te puchen ta te llanen sukar gala ezgode. Ta te avela de istina gala orbe kai asundile ta kai cherdila gava baro bilachipe maskar tumende, 15ondaka ka mundaren e jarniea e llenen kai zivin ande gua foro ta i lenge zivirinien ta ka zatrin sa e ezgode kai si ande gua foro. 16Ka chiden sa o barvalipe gole foroko po maskaral katar o foro ta ka phabaren o foro ta i sa e ezgode kai lien katar tumare dusmanura, sargo ofrenda phabardi ando liubao e Devleke tumaro gazda. Gua foro ka achel ostade zatrime ta nikada ni ka vazden le pale.#Dt 20.16-18; Jos 6.17.
17Tumen te na achen nisoia katar so saia chinado te avel zatrime ta o Del nikada ni ka joliaol tumenchar, ta ka avel leke zao tumendar ta ka cherel tumen te barion gia sar phenda le tumare puranenge kai ka cherel, 18te kandena e Devle tumaro gazda ta te kandena sa e alava kai me diem tumen allive ta te cherena so si orta angla e akha e Devleke tumaro gazda.
Currently Selected:
Deuteronomio 13: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
