2 Samuel 23
23
E alava e Davideke mai anglal te merel
1Gala si e alava kai phenda o David mai anglal te merel:
O David chaurro katar o Isai,
kai o Del cherda le te avel baro,
o charo kai o Del e Jakobeko esvirisarda,
o lleno katar o Israel kai llilabel sukar,
phenel gia:
2O duo e Devleko cherda te dav orba,
leke alava si ande mi chib.
3O Del e Israeleko phenda mange,
o Del kai arakhel e Israele dia mange orba,
ka avel iek lleno chacho kai ka gazdaril maskar e llene,
ka gazdaril ande dar katar o Del,
4vou ka avel sargo o villelo kana pharron e zore,
sargo o villelo thiarinako kana inai oblakura,
sargo o bursin kai cherel te bariol e char.
5Mi familia inai gia e Devlea,
a o Del achilo po alav manchar ostade,
sa so phenda si chacho ta ka cherel le.
O Del ka cherel te dobiv,
ta ka del man so mangav.
6A e bilache ka aven sargo e karrne suke
kai niko ni lel len e vastea.
7A gua kai mangel te dodil len
cherel le ikhe sastrea ta iekhe jarniea,
ta phabarel len isto kote.
E mai tromane boñikura e Davideke
1 Kr 11.10-47
8Gala si e anava katar e mai tromane boñikura e Davideke: O Joseb Basebet o takmonita, gazda katar e trin mai tromane: O Adino eznita, kai iek drom mundarda ojto stotine murusen iekhe jarniea. 9Ta o Eleazar chaurro katar o Dodo o ajojita, iek katar e trin mai tromane kai sea e Davidea kana mardepe e filisteonenchar ta e boñikura katar Israel nasena. 10O Eleazar mardape e filisteura lligo ni chinilo leko va ta o jarni achilo lipime pe leko va. Gua llive o Del cherda te dobin e israelitura, ta o foro llelo e Eleazarea samo te len e ezgode kai mukle e filisteura.
11Mapalal letar saia o Sama chaurro katar o Age o ararita. E filisteura chidinaile ando Leji, kote saia iek umal pherdi lenteje, ta o foro nasloia katar e filisteura. 12A vou thodape po maskaral katar o umal te arakhel la, ta i mundarda e filisteonen, ta o Del cherda te dobil.
13Iek drom kana saia o vreme kai chidena e simiche, trin katar e tranda murusa mai tromane avile te dikhen e Davide ande pechina katar o Adulam. E filisteura sea logle ande bari umal katar o Refaim. 14O David saia ande iek cher lachardo e marimake, ta ando Belen saia iek cher boñikonengo katar e filisteura. 15Ta o David phenda so zelila:
¡Voliva te del man vareko te piav pai katar o bunari kai si ando Belen pasa o udar e foroko!
16Ondaka trin katar e tromane die ando pero katar e filisteura, ta ikande pai katar o bunari kai saia pasa o udar e foroko, ta ande le e Davideke. A o David ni kamla te piel ta chudia le dino e Devleke, ta phenda: 17¡Ioi Devla, cher te na piav katar gava pai! ¿Sar ka piav o pai kai ande le e murusa kai thode po zivoto ande bari dar te sai anen le mange? Ta ni kamla te piel.
18Ta o Abisai, o phlal katar o Joab, chaurro katar o Seruia, saia o mai preche maskar e tranda tromane. Vou mundarda pe lansaia trin stotine llenen, ta cherdilo but glamno e trinenchar. 19O Abisai saia o mai baro maskar e tranda ta cherdilo lengo gazda, a ni saia sargo e trin mai tromane.
20Mapalal letar, o Benaias chaurro katar o Joiada, kai saia chaurro katar iek lleno katar o Kabseel kai radila but ta cherela bare ezgode. Gava Benaias mundarda duie moabitonen kai sea zurale sargo lionura. Isto vou fulisto ando bunari ta mundarda iekhe liono iek llive kana perela iv. 21Ta i mundarda iekhe ejipsio kai saia but baro. E ejipsio saia le iek lansa po va, a o Benaias mardape lea iekhe kastea. Lia katar o ejipsio e lansa ta mundarda le laia. 22Gua cherda o Benaias chaurro katar o Joiada, ta cherdilo glamno e trinenchar. 23O Benaias saia pinllardo maskar e tranda, a ni saia sargo e trin mai tromane. Ta o David thoda le gazda katar e boñikura kai arakhena le.
24O Asael, phlal katar o Joab, i vou saia katar e tranda tromane. O Eljanan, chaurro katar o Dodo katar o Belen. 25O Sama jarodita, o Elika jarodita. 26O Jeles o paltita, o Ira chaurro katar o Ikes o tekoita. 27O Abiezer katar o Anatot, o Mebunai jusatita. 28O Salmon ajojita, o Maarai netofatita. 29O Jeleb chaurro katar o Baana, i vou saia katar o Netofa. O Itai chaurro katar o foro Ribai katar o Gabaa kaia saia ande phuv katar o Benjamin. 30O Benaias piratonita. O Idai katar e len kai si ando Gaas. 31O Abi Albon arbatita, o Azmavet barjumita. 32O Eliaba saalbonita, o Jonatan katar e chaurre katar o Jasen. 33O Sama o ararita, o Ajiam chaurro katar o Sarar ararita. 34O Elifelet chaurro katar o Ajasbai chaurro katar o Maaka, o Eliam chaurro katar o Ajitofel gilonita. 35O Jezrai karmelita, o Paarai arbita. 36O Igal chaurro katar o Natan katar o Soba, o Bani gadita. 37O Selek amonita, o Najarai beerotita kai pomozila e Joabe, chaurro katar o Seruia. 38O Ira itrita, o Gareb itrita. 39O Urias itita. Sa sea tranda ta efta llene.
Currently Selected:
2 Samuel 23: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
