2 Samuel 20
20
O Seba vazdiniaol po David
1Saia iek lleno bilacho katar e vicha e Benjamineki kai ikhardola Seba chavo katar o Bikri, kai basalda e tuturuga, ta phenda:
¡Inai amen niso e Davidea ta o chavo e Isaieko ni ka del amen phuv. Suako lleno te llaltar kai pi chara!#1 R 12.16; 2 Kr 10.16.
2Ta sa e llene katar o Israel mukle e Davide ta lleletar pala o Seba o chavo katar o Bikri. A e llene katar o Juda llele pala lengo charo, llele katar o Jordan llik o Jerusalem.
3Ta kana o David avilo kai po cher ando Jerusalem, lia e des konkubine kai muklaia te arakhen o cher ta phangla len ande iek cher. Kote o charo dia len te jan ta arakhla len, ta nikada ios ni sovto lenchar. Gia e konkubine achile phangle ande gua cher, ta zivisarde sargo phivlia llik kana mule.#2 S 15.16; 16.22.
4Mapalal o charo phenda e Amasaeke:
Ikhar e murusen katar o Juda, ta aide karinga lenchar ande trin llive.
5Ta o Amasa llelo te ikharel e llenen katar o Juda, a ni avilo ando vreme kai saia te avel. 6Ta o David phenda e Abisaieke:
O Seba ka cherel amenge mai but bilachipe neko so cherda amenge o Absalon. Le e slugen katar cho gazda, ta rode le mai anglal te malavel iek foro kai truial si le zidura ta ka gurudol kote.
7Ondaka likiste te roden le e boñikura katar o Joab, ta i llele lenchar e kereteura, e peleteura ta sa e murusa mai tromane, ta likiste katar o Jerusalem te roden e Seba chavo katar o Bikri. 8Ta kana avile pasa e pechina bari kai si ando Gabaon, likisto o Amasa te maladol lenchar. Ta o Joab saia furiado ande patave marimake, ta pe po kavisi inllarela iek churi kai pelitar kana llala. 9Ondaka o Joab phenda e Amasaeke:
¿Sar san phlala? Ta e vastea o chacho istarda e Amase katar leke chor te chumidel le.
10Ta o Amasa ni dikhla e churi kai saia ando va e Joabeko. Ta o Joab ranisarda e Amase ando panchto pasuaro ta sa leke porra rispisaile pe phuv. Mulo bi te del le e churiaia pale. Mapalal o Joab ta leko phlal o Abisai rodie e Seba chavo katar o Bikri. 11Ta iek katar e boñikura e Joabeke thodape pasa o Amasa, ta phenda:
¡Ko ka llal pe rig e Joabeki ta e Davideki, te llal e Joabea!
12A o Amasa taulilape po drom ande po rat. Ta suako lleno kai nakhela po drom achela te dikhel le. Gua boñiko kana dikhla kai sa achena te dikhen e Amasa chudino ande po rat, thoda le pe iek rig e dromeki ta ucharda le e patavenchar. 13Ta kana thode e Amasa pe iek rig e dromeki, sa e boñikura kai llana e Joabea rodie e Seba chavo katar o Bikri.
14O Seba nakhlo pe sa e viche katar o Israel llik kai o Abel Betmaka, ta sa e llene katar o Barim chidinaile ta llele lea. 15Ta kana o Joab ta leke boñikura avile ando Abel Betmaka, thodepe truial katar o foro ta vazdie iek phurd te sai den pe foro, ta mangena te peraven o zido. 16Ondaka iek diskinia bizai urkisarda ando foro, ta phenela:
¡Asunen man! ¡Asunen man! ¡Phenen e Joebeke te avel karinga soke me mangav te dav orba lea!
17Kana o Joab avilo late, voi puchla le:
¿Tu san o Joab?
Vou phenda:
Ea, me sem.
Ta voi phenda:
Asun e alava katar gaia sluga chiri. Ta o Joab phenda:
Asunav.
18Ta voi phenda:
Omanglal phenena gia: O lleno kai mangel te llanel vareso, te puchel e llene katar o foro Abel. 19Inai mange drago o maripe, ta me sem iek diskinia chachi ando Israel, a tu mange te zatri iekhe bare foro katar o Israel. ¿Soke mange te zatri e phuv kai del amen o Del?
20O Joab phenda lake:
¡Te na del o Del te zatriv e foro, te mukav le zatrime! 21Inai gia, soke iek lleno katar o burdo o Efraim kai ikhardol Seba, vazdinailo te marelpe e Davidea. An le mande ta me ka llautar katar o foro.
Ta e diskinia phenda e Joabeke:
Amen ka chuda leko soro katar o zido e foroko.
22Ondaka e diskinia dia orba bizaimaia e llenenchar katar o foro. Ta von chinde o soro katar o Seba, ta chudie le e Joabeke. Mapalal o Joab basalda e sing, ta vou ta leke boñikura lleletar katar o foro, suako iek kai pi chara. Ta o Joab irisailo kai o charo ando Jerusalem.
E mai preche boñikura katar o David
2 S 8.15-18; 1 Kr 18.14-17
23O Joab sai o mai baro boñiko ando Israel, ta o Benaias o chavo katar o Joiada, sai o mai baro boñiko katar e kereteura ta e peleteura, 24ta o Adoram arakhela e love e phuviake, a o Josafat chavo katar o Ajilud arakhela e lila. 25O Seva saia o pismiri, o Sadok ta o Abiatar sea e popura. 26O Ira katar o Jair, i vou saia popo katar o David.
Currently Selected:
2 Samuel 20: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
