2 Samuel 16
16
O David ta o Siba
1Kana o David nakhlo mai incha katar o than mai vazdino katar o burdo, o Siba kai saia sluga katar o Mefi Boset likisto de malavel le. Ta o Siba anela dui magarche kai inllarena dui stotine marrne, stotina pogache drakhake, stotine marrne cherde simochinenchar suke, ta iek morchi moliaki.#2 S 9.9-10. 2Ta o charo phenda e Sibake:
¿Soke ane sa gala ezgode?
Ta o Siba phenda leke:
E magarche si te llan pe lende e familia katar o charo, e marrne ta e drakha suke si te jan e sluge, ta e mol si te pien gola kai ka chinion po pusto.
3Ta o charo puchla le:
¿Kai talo o unuko che gazdako?
Ta o Siba phenda leke:
Llelotar ando Jerusalem, soke phenda gia:
Akana o foro e Israeleko ka iril mange e charoina me dadeki. 4Ondaka o charo phenda e Sibake:
Sa so si le o Mefi Boset, si chiro.
Ta o Siba dia changa angla o charo ta phenda leke:
¡Dav tut fala glamno charo pala so chere mange, daboida te dikhe pe ma dragostimaia, gazda murno! 5Ta o charo avilo llik kai o Bajurin. Ta iek lleno katar e familia e Sauleki kai ikhardola Simei, chavo katar o Gera, likisto te malavel le ta dela le armaia, 6ta chudela barra ando David ta ande sluge e charoke. Ta sa o foro ta sa e murusa mai tromane sea pe chachi ta po stingo e Davideko. 7Ta o Simei dela le armaia ta phenela leke:
¡Llatar katar, lleno bilacho kai samo mundare! 8¡O Del dukhada tut pala sa o mundaripe kai cherdan e familiake katar o Saul, te sai ave tu o charo! ¡Akana o Del dia e charoina ande va che chaurreke o Absalon, ta dik pelan isto ande cho bilachipe, soke san iek lleno kai samo mundare!
9Ondaka o Abisai chavo katar o Seruia, phenda e charoke:
¿Soke gava llukel mulo del armaia e charo? ¡Isto akana ka chinav leki kor!
10Ta o charo phenda:
Tumen na phenen niso katar murne ezgode, chave e Seruiake. Te si kai vou del man armaia, gua si soke o Del phenda leke te cherel le. ¿Ko sai puchel e Devle, soke chere gia?
11Ta o David phenda e Abisaieke ta leke slugenge:
Isto mo chavo mangel mundarel man. ¡Gachin ios ka mangel te mundarel man iek lleno katar e vicha e Benjamineki! Muken le, o Del phenda leke te del man armaia. 12Sai avel kai o Del ka dikhel mo tristope, ta ka blagosil man pala e armaia kai asundem allive.
13Ta kana o David ta e llene kai llana lea phirena po drom, o Simei llala po ogoia rig katar o burdo ta dela armaia e Davide ta chudela barra ta prajo. 14Ta o charo ta sa o foro kai saia lea avile chinie, ta achile kote te lelpe lendar o chinipe.
O Absalon del ando Jerusalem
15O Absalon ta e israelitura die ando Jerusalem, ta lenchar saia o Ajitofel. 16Ta o Jusai arkita, o amal e Davideko, likisto te maladol e Absalonea, ta urkindo phenela:
¡Te zivil o charo, te zivil o charo!
17Ta o Absalon phenda e Jusaieke:
¿Gia chere che amaleke? ¿Soke ni llelan che amalea?
18Ta o Jusai phenda leke:
¡Nasti, soke me morabi te avav kote kai si o esvirime e Devletar ta e forotar katar o Israel! 19¿Kako sluga morabi te avav me? ¿Inai e chaveko katar mo amal? Isto gia sar radisardem angla cho dad, ka radiv angla tu.
20Ondaka o Absalon puchla e Ajitofele:
¿So phene mange kai morabi te chera?
21Ta o Ajitofel phenda e Absaloneke:
Amisao e konkubinenchar che dadeke kai thoda len te arakhel o cher, ta sa o foro ka asunel kai cho dad murzil pe tute pala so cherdan, ta gia ka len zor e llene kai si tuia.
22Ondaka vazdie iek chara upral po cher, ta o Absalon amisailo kote pe dadeke konkubinenchar angla e akha katar sa o Israel.#2 S 12.11-12. 23Ta ande gola llivesa kana puchena e Ajitofele so saia te cheren, saia sargo kana puchena e Devle. Gia mislinape katar o David ta katar o Absalon.
Currently Selected:
2 Samuel 16: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
